BAR JEPL̦AAK
KATAK 7
Jab Ebbweer
Naanin Kakapilõk: “Rar wõnm̦aanl̦o̦k wõt im jab ebbweer ilo aer katakin im kwal̦o̦k kõn ennaan eo em̦m̦an.”—Jrb. 5:42.
Men eo Paul Ear Kõm̦m̦ane
1. Alwõje PIJAIN ALWÕJ EO, ak riiti Jerbal 19:8-10. Innem etale kajjitõk kein:
Meñe Paul ear iioon jum̦ae, ak ewi wãween an kar wõnm̦aanl̦o̦k wõt im jab ebbweer jãn an jipañ ro rar kwal̦o̦k aer itoklimo?
Ewi joñan ikkutkut in an kar Paul jepl̦aak im katakin ro rar kwal̦o̦k aer itoklimo, im ewi toon an kar kõm̦m̦ane men in?
Ta eo Jej Katak jãn Paul?
2. Jej aikuj kõjerbal iien im maroñ ko ad bwe jen maroñ lo tõprak ilo ad jepl̦aak ippãn armej ro im jino katak Baibõl̦ ippãer.
Anõke Paul
3. Kõm̦m̦an oktak ilo jikejuul̦ eo am̦ bwe kwõn maroñ lol̦o̦k armej eo ilo iien eo em̦m̦an ñane. Kajjitõk ippam̦ make: ‘Iien ta eo enaaj em̦m̦an ñan aõ tõpare? Ñããt eo im ia eo enaaj m̦õn̦õn̦õ in bwebwenato ippa?’ M̦õn̦õn̦õ in bar jepl̦aak ippãn meñe ejjab lukkuun em̦m̦an awa eo ñan kwe.
4. Kõm̦m̦an karõk ñan bar jepl̦aak ippãn. Kajjojo iien ãlikin amiro bwebwenato, kajjioñ karõk juon raan im awa komiro maroñ bar bwebwenato ippãn doon. Kate eok ñan kajejjete iien eo komiro kar karõke.
5. Jab ebbweer. Jab m̦õkaj im l̦õmn̦ak bwe ñe ejeja an armej eo pãd ilo m̦weo im̦õn ak ekkã an poub, mel̦el̦ein bwe ejjel̦o̦k an itoklimo. (1 Kor. 13:4, 7) Ijello̦kun am̦ ãindein, jab ebbweer jãn am̦ kajjioñ tõpar armej in, ak ilo ejja iien eo wõt kõjerbal iien ko am̦ ilo mãlõtlõt.—1 Kor. 9:26.