Meanwõd

Men eo Jesus Ear Kõm̦m̦ane

PIJAIN ALWÕJ: Jesus Patiently Helps His Brother

1. Alwõje PIJAIN ALWÕJ EO, ak riiti Jon 7:​3-5 im 1 Korint 15:​3, 4, 7. Innem etale kajjitõk kein:

1. Ewi wãween an kar l̦õm̦aro jatin Jesus em̦m̦akũt ñan ennaan eo an ilo jinoin?

2. Ta eo ej kaalikkar bwe Jesus ear jab ebbweer jãn an kajjioñ jipañ l̦eo jatin, Jemes?

Ta eo Jej Katak jãn Jesus?

2. Jej aikuj kwal̦o̦k meanwõd kõnke ewõr jet armej emaroñ bõk iien ñan aer em̦m̦akũt ñan ennaan eo em̦m̦an jãn ro jet.

Anõke Jesus

3. Kajjioñe bar juon kõl. El̦aññe armej eo ejjab m̦õkaj im ba bwe em̦õn̦õn̦õ in katak Baibõl̦, eokwe jab iuuni. Ñe ekkar, kõjerbal pijain alwõj ko ak kein katak ko ñan jipañe ñan mel̦el̦e ta ko rej wal̦o̦k ñe jej katak Baibõl̦ ippãn armej im tokjãn ko enaaj bũki.

4. Jab keidi armej eo ñan ro jet. Aolep armej reoktak jãn doon. El̦aññe juon nukum̦ ak juon eo kwõj bar jepl̦aak ippãn ej ãliklik in katak Baibõl̦ ak epen an tõmake juon mel̦el̦e jãn Baibõl̦, l̦õmn̦ak kõn etke emaroñ ãindein. Ñan waanjoñak, emaroñ ke wõr juon mel̦el̦e ak tõmak me el̦ap an aorõk ippãn? Ak ej ke iioon ijjiped jãn ro nukũn ak ro ri-turin? Lel̦o̦k iien ñan an l̦õmn̦ak kõn men ko kwaar kwal̦o̦k ñane im ñan lo aorõkin katak ko ilo Baibõl̦.

5. Jar kõn armej eo ej kwal̦o̦k an itoklimo. Kajjitõk ippãn Jeova bwe en jipañ eok ñan dãpij juon l̦õmn̦ak em̦m̦an kõn armej eo im bwe kwõn jouj wõt ilo am̦ kõnono ippãn. Jar bwe en lewaj lol̦o̦kjen̦ ñan jel̦ã el̦aññe ekkar bwe kwõn bõjrak jãn am̦ lol̦o̦k juon eo me edik an itoklimo.—1 Kor. 9:26.