Ñãt eo Jen Jeblak Iben Ro Rej Itoklimo?
1. Ar kõmõn dri kalor ro ej kitibuj ta?
1 Ñõn kõmõn dri kalor ro ej kitibuj ar jeblak iben jabrewõt eo ej kwalok an itoklimo in katak kin karõk eo an Jeova kin Ailiñ eo. (Matu 28:19, 20) Ien eo emõntata ñõn jeblak enaj atartar ion ien eo ebellok ñõn kij im bar eo im ej itoklimo. Etke emõn bwe en mõkõj ar jeblak iben armij eo?
2, 3. Etke jen kar kate in jeblak ilo ien eo emõkõjtata?
2 Etke En Mõkõj Ar Jeblak? Ejjab to im enaj jemlok jerbal in kwalok nan kin “nan emõn kin ailiñ eo” im jemlokõn jukjuk in ber in ej ebak. (Matu 24:14; UBS, 1 Pit. 4:7) Kin men in, toõn wõt an bellok “ran in lomor” ñõn ro rej itoklimo, jej aikwij ‘kate kij ilo jerbal in kwalok nan.’ Ej melelen bwe jenaj jeblak ilo ien eo emõkõjtata ñõn jibõñ ro im rej itoklimo.—2 Kor. 6:1, 2; 2 Tim. 4:2.
3 Elap an Setan kõnan kokkure jabrewõt inen Ailiñ eo me jej jeore iburuen ro rej itoklimo kake. (Mark 4:14, 15) Ro uan baamle ko, dri jerbal ro mõtõm, im ro jet ekkã air kajirere kake ro im rar kwalok air itoklimo. Ar mõkõj in jeblak enaj kamaroñ kij ñõn kalek armij eo kin men ko jar bwebwenato kaki mokta jen an ro jet bõprae itoklimo eo an.
4. Jen ien eo moktata jar lolok ir, ewi wãwen ar maroñ kõmõn berberin ar jeblak?
4 Karõk Ien: Emõn bwe jen kalikar ien eo jenaj jeblak ñe jej kajemlok ien lolok eo moktata. Kwalok juõn kajitõk im kwonaj uake ñe kwonaj bar lolok ir. Elap tokjen bwe kwon jeje ilo juõn buk bwe kwon jab meloklok. Elañe eor am maroñ, kajitõk elañe kwo maroñ jeblak ran eo tok juõn ak ejjab to tokelik. Elañe kwar kennan iben ilo Jãdede ak Jabõt, im armij eo ej jerbal ilo wik eo, bwelen enaj mõnõnõ in bar lo yuk lokõn juõn wik ilo ejja ran eo wõt. Ñe kwoj karõk ien ñõn jeblak, lale bwe kwon kejbãrok nan ko am.—Matu 5:37.
5. Ewi wãwen ar mõkõj in jeblak enaj jibõñ kij ñõn kajejit jerbal eo Jisõs ear letok ñõn kõmõn dri kalor ro?
5 Eor un ko remõn iber bwe jen jeblak iben ro rej itoklimo ilo ien eo emõkõjtata. Karõk ien iben, inem jeblak ilo mõkõj kinke “ekaru ien.” (1 Kor. 7:29) Enaj laplok tõbrõk ilo ar jerbal ñe emõkõj ar jeblak iben ro rej itoklimo kin ennan kin Ailiñ eo.