Kilen bwe En Em̦m̦anl̦o̦k Wõt Ad Kwal̦o̦k Naan—Likũt Juon Kajjitõk ñan Bar Jepl̦aak

Unin an Aorõk Kõl In: Ñe jej iioone juon eo me eitoklimo, jej aikuj bar jepl̦aakl̦o̦k ippãn ilo iien ko me ej pãd ilo m̦weo im̦õn bwe jen maroñ utdikdiki ineen m̦ool eo me jaar kalibwini. (1 Ko. 3:6) M̦okta jãn ad etal jãn armej eo, ekkã ad pukot juon wãween ñan ad maroñ bar jepl̦aakl̦o̦k ippãn im kajjitõk ñããt eo enaaj em̦m̦an ñan bar ro̦o̦ll̦o̦k. Bareinwõt, em̦m̦an ñe jej kwal̦o̦k juon kajjitõk ñane bwe jen l̦ak ro̦o̦ll̦o̦k tokãlik jebwebwenato ippãn kake. Men in enaaj kõm̦m̦an an armej eo kijoorore ad bar jepl̦aakl̦o̦k, im ñe ewõr uwaakin kajjitõk eo ilo bok eo jaar likũti ippãn, enaaj l̦apl̦o̦k an kõn̦aan riiti. Ñe jej pukot juon wãween ñan kãitoklimoen armej eo enaaj kõm̦m̦an bwe en pidodo ad bar jepl̦aak im bwebwenato ippãn kõnke jejel̦ã ta eo jemaroñ kõnnaan kake tokãlik, im armej eo enaaj jel̦ã kadede ta ko jej pojak in kõnnaan kaki. Ñe jebar jepl̦aak im iioone, jemaroñ kõmel̦el̦eiki bwe jaar jepl̦aakl̦o̦k in tõn uwaake kajjitõk eo me jaar bõklõñtak iien eo l̦o̦k, innem wõnm̦aanl̦o̦k.

Kilen Kõm̦m̦ane:

Ñe kwõj kõpooj ta ko kwõnaaj ba ñe kwõnaaj em̦ ñan em̦, kwõn bar kõpooj juon kajjitõk me kwõmaroñ kwal̦o̦k im tokãlik jepl̦aakl̦o̦k im uwaake. Bõlen juon kajjitõk me ewõr kõmel̦el̦ein ilo bok eo kwõj lel̦o̦k ilo raan eo, ak emaroñ juon kajjitõk me ewõr uwaakin ilo juon iaan bok in katak ko ad, im kwõmaroñ kwal̦o̦k kõn bok eo ilo iien eo kwõj bar jepl̦aakl̦o̦k ippãn armej eo.
M̦okta jãn am̦ kõjem̦l̦o̦k am̦ bwebwenato ippãn juon eo eitoklimo, kwõn kwal̦o̦k bwe kokõn̦aan nãj bar bwebwenato ippãn im kwal̦o̦k kajjitõk eo me kwaar kõpooje. Ilo jet territory ko, el̦ap an armej poub im ekkã aer m̦akoko in kõm̦m̦an iien ñan ad bar lol̦o̦k er. Ñe kwõj kile bwe ãindein, kwõmaroñ ba: “Iien eo in ke me ekkã am̦ pãd ilo m̦wiin? [Kõtl̦o̦k an uwaak.] Wiik in lal̦, im̦õn̦õn̦õ in bar bõjraktok jidik im uwaake kajjitõk in . . . Ak ñe kwõpoub ilo iien en̦ ij bar ro̦o̦ltok, kwõmaroñ ba tok wõt.”
Ñe em̦õj am̦ karõk juon iien ñan bar jepl̦aak ippãn armej eo kwaar kõnnaan ippãn, kwõn kajejjet karõk eo am̦. (Matu 5:37) Ãlikin am̦ bar jepl̦aak ippãn armej eo, kwõn bar likũt juon kajjitõk ñan am̦ maroñ bar jepl̦aak im bwebwenato ippãn.

Kõm̦m̦ane Men in ilo Allõñ In:

Ñe kwõj kõpooj ta ko kwõmaroñ ba ñe kwõnaaj kwal̦o̦k naan, kwõn bar kõpooj juon kajjitõk ñan am̦ bar jepl̦aak im uwaake. Im kwõmaroñ bar kwal̦o̦ke ñan rukwal̦o̦k naan ro jet m̦õttam̦.