Kilen bwe En Em̦m̦anl̦o̦k Wõt Ad Kwal̦o̦k Naan​—Likũt Juon Kajjitõk ñan Am̦ Bar Jepl̦aak

UNIN AN AORÕK KÕL IN:

Eaorõk bwe jen utdikdiki ine in m̦ool eo me jaar kalibwini ibũruon armej ro. (1Ko 3:6) Ñe jej iioon juon armej me eitoklimo in roñjake, em̦m̦an jen likũt juon kajjitõk ippãn bwe jen maroñ jepl̦aak im bwebwenato ippãn kake. Men in enaaj kõm̦m̦an bwe en reim̦aanl̦o̦k ñan iien eo jenaaj ro̦o̦ll̦o̦k ippãn. Enaaj bar kõm̦m̦an bwe en pidodo ad jel̦ã ta eo jen kõpooje ñan ad bar jepl̦aak. Ñe jej jepl̦aak, jemaroñ ba ñane bwe unin ad etal ej ñan uwaake kajjitõk eo jaar likũt ippãn kar iien eo l̦o̦k.

KILEN KÕM̦M̦ANE:

• Ñe kwõj bũl̦ããn in em̦ ñan em̦ im kwõj kõpooj ta ko kwõnaaj ba, em̦m̦an kwõn bar kõpooj juon kajjitõk kadede bwe kwõn kab kwal̦o̦k ñan rũm̦weo im tokãlik jepl̦aakl̦o̦k im uwaake. Emaroñ juon kajjitõk me uwaak eo epãd ilo bok ak tũrããk eo kwõj lel̦o̦k. Ak emaroñ juon kajjitõk me uwaak eo epãd ilo juon iaan bok ko jej katak ippãn armej kaki im kwõj l̦õmn̦ak in nãj bõkl̦o̦k ñe kwõj bar jepl̦aak.

• Ñe kwõj itõn etal jãn m̦weo, kwõn ba ñan armej eo eitoklimo bwe kokõn̦aan bar jepl̦aakl̦o̦k komiro bwebwenato, innem kiiõ likũt kajjitõk eo kwaar kõpooje. Ñe em̦m̦an, kwõn kajjitõk nõmba in talboon eo an ak mel̦el̦e ko jet ñan am̦ maroñ tõpare.

• El̦aññe kwaar ba ñane bwe kwõnaaj jepl̦aak ilo awa eo em̦õj amiro karõke, kwõn kajejjet naan ko am̦.​—Mt 5:37.