Liki ilo Juõn Lõl Ejjab Wãppen

“MEN eo emõn I kõnan, I jab kõmõne, a nana eo I jab kõnan, eñin ij kõmmõne.” Kwoj lo ke mol in menin ilo wãwen eo ibbõm? Kwon elloetak in jela bwe ri jilek Paul ear bed ibben ejja abañ in wõt; ak e kar juõn emaan emõn tiljek in Christian eo an. Menin ejjab juõn menin idabtõk ke? Ilo letter eo an ñõn Christian ro ilo Rome, Paul ear etale abañ eo: “A elañe ij kõmõn men eo I jab kõnan, e jab ña ij kõmõne, a jerawiwi eo ej jokwe ilo ña.” Jerawiwi et eo ej jitõñlok ñõn e, im ewi wãwen an kar ellã jene bwe en maroñ juõn emaan eo etiljek?​—Rome 7:19, 20.

Moktalok ilo letter eo an, Paul ear je: “Kin men in, einwõt kin juõn armij jerawiwi ej dreloñ ilo lõl, im mij kin jerawiwi, im ein drein mij e ar itok ion armij otemjej, bwe ir otemjej r’ar jerawiwi.” “Armij” eo kar Adam. (Rome 5:12, 14) Jerawiwi eo an Adam​—jerawiwi eo an maan eo moktata, Adam​—ej men eo ear kõmmõn menin an armij otemjelok jolete jab wãppen im ej juõn un eo unin debij wõt tiljek ej juõn lukkun menin aitwerõk.

Lemnak eo an Paul kin “jerawiwi eo jinointata,” einwõt kar naetan mokta, ejjab juõn men eo ejedeed ilo bõke rainin kinke ennan eo ilo Bible kin kõmõnmõn rej kajekdone itok wõt jen etale ko an armij make im elap wõt air bõk lemnak ko kin evolution, (armij rar walok jen menin mour ko). “Scholar ro ak ro rej etale katak kein emwij air iunlok aolepen melelen eo” ej eñin wãwen eo juõn kamelele eo ilo ran kein ej kwalok kake kin Rome 5:12-14. Ak buki yiõ ko remotlok, melele ko ilo Bible rekin etal wõt im kamelele bwe “ke Adam ear jerawiwi . . . ear katton ro otemjej bwijjin kin jerawiwi in im kin tokjen ko an.”a

Jinoin an Jako Tiljek

Ejja einwõt bed eo an Adam, maan eo moktata, elõñ rainin rej kajekdone, eindein bareinwõt Satan, Devil eo, armij rej iunlok bwe ej einwõt juõn inoñ.b A eo ewor an maroñ, Jesus Christ, ej jiroñ kij bwe Satan “ear jab jutõk ilo mol,” einwõt ba, ear jab tellokin liki. (John 8:44) Im kar kamadmõd eo an Satan eo ear kõmmõn an Adam im lio belen, Eve, jumae Jehovah im rupe tiljek eo air iumin melejoñ.​—Genesis 3:1-19.

Kinke kij otemjej jej wõnlõltak jen Adam, kij otemjej jaar jolete ad itok wõt in jerawiwi. Ri meletlet eo Solomon ear ba: “Emol ejelok juõn armij dru wãnik ion lõl, eo ej kõmmõn emõn, im e jab bwir.” (Ecclesiastes 7:20) Ak, jabdewõt armij emaroñ wor liki ilo e. Ewi wãwen an menin maroñ? Kinke ejjab aikwij juõn armij ewãppen ñõn debij an tiljek.

Tiljek​—Tokjen ko

Ñõn ad juõn armij in tiljek menin ej letok juõn juburu eo emwilõl. Ad bõk tellokin liki ilo mejen Anij menin ej bõktok ãjinkij ko rej indio. Rainin, “juõn jar elap” in ri kabuñ ro remol ej bojak in deloñelok juõn lõl ekãl in ainemõn im burukuk, ibben jerammõn eo ñõn mour indio. (Revelation 7:9) Tiljek ilo men ko elap tokjeir ilo mour erreo im kabuñ jej aikwij debiji, meñe elõñ melejoñ ko ilo jukjuk im bed in im elõñ men ko rebin Satan emaroñ bõktok ion ro ri karejaran Anij. Ak liki bwe ilo kajur eo Jehovah ej letok, kwo maroñ lo tõbrak!​—Pilippai 4:13.

Ilo an konono kin ien in im ien eo ej itok, ri jeje psalm David ej rejañ kij otemjej ke ej ba, ilo juõn jar in kamolol ñõn Jehovah: “A kin ña, Kwoj baur iõ ilo aõ wãnik, im likit iõ iman mejõm ñõn in drio. Emõnõnõ wõt Jeova . . . Amen im Amen.”​—Psalm 41:12, 13.

[Kamelele ko itulal]