Kwonaj Ke Kejbãrok Am Mour Jime?

“Ñõn ien aõ mij i jamin jolok aõ jime jen ña.”​—JOB 27:5.

1, 2. Kain jerbal in ekkal rot eo jej aikwij bõk kunar ie, im ta kajitõk ko jenaj etali?

PIJAIKI am lale jiña ko kin mweo kwoj karõk ñõn kaleke. Kwolukkun bwilõñ kin an keie wãwen kar karõke. Kwoj mõnõnõ ilo am lemnok kin wãwen ko me kwe im baamle eo am maroñ bõk tokjen jen mweo. Ak, kwojjab errã ke, bwe karõk kein im jabrewõt men ko kwar lemnok kaki renaj kar ejelok tokjeir elañe kwojjab kaleke mweo, jokwe iloan, im kejbãroke?

² Ilo ejja wãwen in wõt, jemaroñ lemnok bwe mour jime ej juõn karkar elap an aurõk me enaj bõktok emõn ñõn kij im ro rejitenburu iber. Ak enaj ejelok tokjen ar lemnok kin mour jime elañe jejjab kate kij ñõn kwaloke im kejbãroke ilo mour eo ar einwõt juõn Kristian. Ilo lõl in ranin, ekkã an lukkun lap wõnan ñõn kalek juõn im. (Luk 14:28, 29) Eindreinlok wõt, meñe ej bõk elap ien im kate ñõn kalek juõn wãwen mour ejime, men in elap an or tokjen. Inem jen etale jilu kajitõk ko: Ewi wãwen jemaroñ erom armij ro me rej kwalok air mour jime? Ewi wãwen jemaroñ kejbãrok ar mour jime einwõt juõn Kristian? Elañe juõn armij ear jab kejbãrok an mour jime iomin juõn ien, ta eo emaroñ kõmõne?

Ewi Wãwen Jemaroñ Erom Armij Ro me Rej Kwalok Air Mour Jime?

3, 4. (a) Ilo wãwen it ko Jeova ej jibõñ kij kalek ar mour jime? (b) Ewi wãwen jemaroñ kalek ar mour jime, einwõt kar Jisõs?

³ Jaar lo ilo katak eo lok iman bwe Jeova ej koutiej kij ilo an kõtlok bwe jen mõke bebe elañe jenaj armij ro me rej kejbãrok mour jime. Ak ekamõnõnõ bwe ejjab kõtlok bwe jen mõke iar ikijen men in. Ej katakin kij kin ewi wãwen jemaroñ ejaake karkar in eaurõk, im ilo joij ej letok jitõb kwojarjar eo an me ej jibõñ kij ñõn jerbale katak ko an. (Luk 11:13) Ej bareinwõt kejbãrok mour in jitõb eo an ro rej kate ir ñõn etetal ilo jime.​—Ken. 2:7.

⁴ Ewi wãwen an kar Jeova katakin kij bwe jen kejbãrok ar mour jime? Ilõñin men otemjej, ej ilo an kar jilkintok Nejin, Jisõs, ñõn lõl. Jisõs ear bokake ilo aolepen mour eo an, “E ar bokake ñõn mij.” (Pil. 2:8) Ilo men otemjej ear kõmõni, Jisõs ear bokake Jemen ilõñ, meñe ilo ien eo ear iion wãwen ko relukkun bin ñõn e. Ear ba ñõn Jeova, “En jab ankil Aõ a Am wõt.” (Luk 22:42) Kij kajuju jej aikwij kajitõkin kij mõke, ‘Eor ke iba ejja lemnok in wõt ñõn bokake?’ Ilo ar bokake kin juõn un emõn, jenaj armij ro me rej kejbãrok air mour jime. Lemnok kin jet wãwen ko ilo mour me elukkun aurõk ñõn ar bokake.

5, 6. (a) Ewi wãwen an kar Devid kalikar kin aurõkin ar kejbãrok ar mour jime meñe ro jet rejjab lo kij? (b) Ta aituerõk ko dri Kristian ro ranin rej iioni kin mour jime ñe rej mõke iair?

⁵ Jej aikwij bokake Jeova meñe jej lemnok bwe jej mõke iar. Dri jeje sam eo, Devid, ear lo aurõkin an kejbãrok an mour jime ilo ien ko ke ear mõke ian. (Riit Sam 101:2.) Kin an juõn kiñ, ekkã an kar Devid ber ibwiljin armij ro. Ejelok berre bwe ekar or ien ko ke elõñ buki, ak elõñ tausan, armij ro rar loe. (Keiri Sam 26:12.) An kejbãrok an jime ilo ien rot kein ear lukkun aurõk, kinke kiñ eo ear aikwij likit juõn joñok emõn ñõn armij ro an. (Dut. 17:18, 19) Bõtab, Devid ear katak bwe meñe ear mõke ian ‘ilo mweo imõn’ ear aikwij etetal wõt ilo jime. Ak ta kin kij?

⁶ Jej lo nan ko an Devid ilo Sam 101:3 me ej ba: “Ijamin likit iman meja jabrewõt men in drike.” Elõñ ien ko rebellok ranin ñõn ar lali men ko retton, elaptata ñe jej mõke iar. Elõñ rej iion aituerõk in ñe rej kajerbal Internet ak aluij TV. Ebiruru ñõn reel ñõn lali men kein rejakkar, im bareinwõt pija in kelwan ko. Ak ñõn kõmõni men kein ej ke kwalok ar bokake Anij eo me ear kakõrmol Devid ñõn je nan kein? Aluij pija in kelwan emaroñ kokkure kij, kinke ej kakajurlok kõnan ko rekibbon im nana, ej kokkure bõklikõt eo ar, kokkure mour in belele ko, im ej katton lemnok ko an aolep ro rej bõk kunair.​—Ken. 4:​23; 2 Kor. 7:1; 1 Tes. 4:​3-5.

7. Ta nan in kaiñi eo emaroñ jibõñ kij ñõn kejbãrok ar mour jime ñe jej mõke iar?

⁷ Emol, ejelok juõn ian dri korijer ro an Jeova ej mõke ian. Ilo yokwe Jemeruij ilõñ ej lale kij. (Riit Sam 11:4.) Elap an Jeova mõnõnõ ñe ej lo am jumae menin kabo ko! Ilo am kõmõne men in, kwoj eoroñ nan in kakkõl eo an Jisõs eber ilo Matu 5:​28. Inem, kwon beek ilo buruõm ñõn jab aluij pija ko me renaj kabo kwe ñõn kõmõn men ko renana. Kwon jab jolok am mour jime kin men eo ekajookok ñõn aluij ak riiti men ko rejakkar!

8, 9. (a) Ta aituerõk eo Daniel im lõmaro mõtõn rar jelmaiki ikijen mour jime eo air? (b) Ewi wãwen Kristian jodrikdrik ro ranin rej kamõnõnõik buruen Jeova im dri Kristian ro mõtair?

⁸ Jemaroñ bareinwõt kejbãrok ar mour jime ilo ar bokake Jeova ñe jej ber ibwiljin ro rejjab tõmak. Lemnok kin Daniel im lõmaro jilu mõtõn. Ilo ien eo ke rar jodrikdrik, kar bõk ir ñõn Babilõn bwe ren dri kamakoko. Ilo jikin in, kin air ber ibwiljin armij ro me rejjab tõmak im rejjab jela Jeova, dri Hibru rein emen rar ber iomin ijjibed ko ñõn mõña men ko kien eo an Anij ear kamoiki. Kinke ro jemeir im jineir, dri Ju ro reridto, im pris ro rar jab maroñ lo ta eo rej kõmõne, emaroñ kar biruru an lõmarein lemnok kin elõñ un ko ñõn air jab bokake kien eo an Anij. Wõn eo enaj jela? Jeova wõt emaroñ jela. Inem rar jutõk bin im bokake e meñe rar ber iomin ijjibed ko im ilo kauwatata.​—Dan. 1:​3-9.

⁹ Ibelakin lõl, jodrikdrik ro me rej korijer ñõn Jeova rej lor ejja ial in wõt, ikijen air bokake kien eo an Anij ñõn dri Kristian ro, im rej makoko in kõtlok bwe ijjibed ko renana an ro mõtair ren anjo ioir. Ñe kom jodrikdrik ro komij jab bõk kunami ñõn bõk uno in karek ko, kõmõn men ko relej, kanõjnij, mour in lũñ, ak kõmõn men ko jet renana, komij bokake Jeova im komij kejbãrok ami mour jime. Ilo wãwen in enaj or tokjen ñõn kwe mõke, im kwonaj kamõnõnõik buruen Jeova im dri Kristian ro mõtõm!​—Sam 110:3.

10. (a) Ta lemnok ko rebwir kin lũñ rar tel jet jodrikdrik ro ñõn jolok mour jime eo air? (b) Ewi wãwen mour jime ej tel kij ñõn emmakit ilo juõn wãwen ej kwalok bwe jej kile uõta eo kin lũñ?

¹⁰ Elañe jej juõn kõra im jej jerbal iben juõn eman, ak jej juõn eman im jej jerbal iben juõn kõra, jej bareinwõt aikwij bokake kien eo an Jeova kin mour jime. Jejela bwe Nan eo an Jeova ej kemo lũñ. Bõtab, ebiruru ar bo im bõk juõn lemnok me ej kõtlok ar kõmõni men ko rejakkar. Ñõn wanjoñok, jet jodrikdrik ro rar kajerbal loñiir ak lokair ñõn kamõnõnõik dron ilo jakkar ak ruo armij rej kajerbal peir ñõn ikkure kin dron ilo jakkar, im rej bõk lemnok eo bwe men kein rejjab nana kinke rej lemnok bwe rejjab “babu iben dron.” Jodrikdrik rein rej meloklok, ak remaroñ kãlet ñõn air kejekron ta eo Baibel ej ba kin lũñ, bwe nan in lũñ ej kitibuj aolep mõnit kein, im kin mwil kein renana remaroñ bukwelok juõn armij elañe ej kõmõne.a Ak, men eo enanalok, ej bwe rej kejekron aikwij eo ñõn kejbãrok air mour jime. Kinke jej kate kij ñõn kejbãrok ar mour jime, jejjab kajeoñ in bukot un ko ñõn ar kõmõni men ko renana, ak kajeoñ in kõmõn juõn mõnit me emaroñ tellok ñõn jerawiwi im bwijrõk mokta jen ar maroñ bõk kaje. Jejjab lemnok wõt kin kaje eo me congregation eo emaroñ letok ñõn kij. Jen men in, jej lemnok ñõn kõmõn men eo enaj kamõnõnõik buruen Jeova im bõprae men eo enaj kaburomõj e. Jen ar lale ewi joñõn ar maroñ kebaklok kij ñõn jerawiwi, jej aikwij ber etolok jen e im “ko jen lũñ.” (1 Kor. 6:​18) Ilo wãwen in jej kwalok bwe jej armij ro emol air jime.

Ewi Wãwen Jemaroñ Kejbãrok Ar Mour Jime?

11. Etke kajuju ien ar bokake eaurõk? Kwalok juõn wanjoñok.

¹¹ Jej kalek ar mour jime ilo ar bokake, im ilo ar kijenmij in bokake jej kejbãrok ar mour jime. Ar bokake juõn wõt alen emaroñ drik tokjen, ak elañe elõñ alen, ej lukkun kalikar an jime wãwen mour eo ar. Ñõn wanjoñok: Juõn wõt birõk emaroñ drik tokjen, ak elañe jej karõk elõñ birõk ko iben dron, jemaroñ kalek juõn im emõn. Inem ilo ar wõnmanlok wõt im bokake elõñ alen, jej kejbãrok ar mour jime.​—Luk 16:10.

12. Ewi wãwen Devid ear likit juõn joñok emõn kin an kejbãrok an mour jime ke ear iion matõrtõr im jab ekajet jime?

¹² Ñe jej kijenmij iomin abañ ko, matõrtõr, im ekajet jab jime, jej bareinwõt kamol ar mour jime. Lemnok kin joñok eo ilo Baibel kin Devid. Ke ear juõn likao, ear kijenmij iomin matõrtõr jen kiñ eo me en kar jutõk kin maroñ eo an Jeova. Ak, Kiñ Saul ekar luji buñburu eo an Jeova im ear lukkun ebanbane Devid, eo me Jeova ear kãlete. Bõtab, Saul ear iroij iomin jet yiõ im kajerbal dri tõrinae ro an Israel ñõn bukote Devid. Jeova ear kõtlok bwe ekajet jab jime in en wõnmanlok iomin jet yiõ ko. Devid ear ke illu nae Anij? Ear ke lemnok bwe ejelok unin an kijenmij? Jaab, ear kwalok wõt an koutiej maroñ eo an Saul einwõt eo Anij ear kabite, ke ear makoko in mõn Saul ilo ien eo ke ear bellok ñõn e.​—1 Sam. 24:​2-7.

13. Ewi wãwen jemaroñ kejbãrok ar mour jime elañe juõn ear kaillu ak kalõkatip kij?

¹³ Elukkun emõn joñok in an Devid ñõn kij ranin! Jej mõtõn juõn congregation in armij ro rejjab wãppen ibelakin lõl, im jabrewõt emaroñ nana an kõmõn ñõn kij ak emaroñ illok jen mol eo. Emol, jej jerammõn ñõn mour ilo juõn ien ñe armij ro an Jeova einwõt juõn rolul ejamin jorran. (Ais. 54:17) Ak meñe eindrein, ewi wãwen ar naj emmakit elañe juõn enaj kaburomõj kij ak kõmetak buruer? Elañe jej drebij ar illu nae dri tõmak eo mõtar, inem mour jime eo ar ñõn Anij emaroñ ber ilo kauwatata. Kõmõn ko an ro jet ak mwiliir en jab naunin ar illu nae Anij ak illok jen mol eo. (Sam 119:165) Ar kijenmij wõt ilo ien melejoñ ko enaj jibõñ kij ñõn kejbãrok ar mour jime.

14. Ro rej kejbãrok air mour jime rej emmakit ilo wãwen it ñõn oktõk ko rej walok ilo rolul eo an Anij im kin kajime ko kin katak ko?

¹⁴ Jemaroñ bareinwõt kejbãrok ar mour jime ilo ar bõprae ar kõrraati im bukot likjõp ko kin oktõk ko rej walok ilo rolul eo an Anij. Inem ej melelen men in bwe jej kwalok ar tiljek ñõn Jeova. Elaplok an kejerammõn armij ro an kiõ jen mokta. Elaplok air koutiej kabuñ eo emol ilo aolepen lõl jen kar ien ko etto. (Ais. 2:​2-4) Ñe rej kõmõn kajime ak oktõk ko ñõn kemelele kin eon ko ilo Baibel ak wãwen jej kõmõni men ko, jen mõkõj im bõki ak bokaki. Jej mõnõnõ ñõn lo menin kamol ko bwe maram in mol eo ej alikarlok. (Ken. 4:​18) Elañe ebin ñõn ar melele kin juõn oktõk, jen kajitõk iben Jeova ñõn jibõñ kij ñõn melele kin oktõk eo. Ilo ejja ien in wõt, jen bokake im kejbãrok ar mour jime.

Ta Elañe Juõn Ejjab Kejbãrok An Mour Jime?

15. Wõn eo wõt emaroñ jolok am mour jime?

¹⁵ Kajitõk in ejjab ke kõmõn ar lukkun lemnok? Einwõt ar kar katak ilo katak eo mokta, mour jime elap an aurõk. Elañe ejelok, jeban ejaak juõn kõtan ebak iben Jeova im enaj ejelok ar kejatrikrik. Kememej men in: Eor juõn wõt emaroñ kõmõn bwe kwon jolok am mour jime. Armij in ej kwe mõke. Job ear lukkun melele kin mol in ke ear ba: “Ñõn ien aõ mij i jamin jolok aõ jime jen ña.” (Job 27:5) Elañe kwoj bõk ejja lemnok in wõt im kwoj ber ebak ñõn Jeova, men in enaj jibõñ yuk ñõn kejbãrok mour jime eo am.​—Jem. 4:8.

16, 17. (a) Elañe juõn armij ear kõmõne juõn bwir elap, ial it eo ebwir en jab bõke? (b) Ial it eo ejime en bõke?

¹⁶ Mekarta, jet rar likjõp ñõn kejbãrok air mour jime. Einwõt an kar walok ke dri jilik ro rar ber ion lõl, ekkã an jet dri Kristian ro ranin kõmõn jerawiwi ko relap. Elañe men in ear walok ñõn yuk, ej melelen ke bwe ejelok am kejatrikrik? Jaab. Ta eo kwomaroñ kõmõne? Jen etale mokta ta eo kwon jab kõmõne. Ekkã an armij ro noji bwir ko air jen jemeir im jineir, dri Kristian ro mõtair, ak elder ro. Bõtab, Baibel eo ej kakememej kij: “Eo ej kalibubu bwir ko an, e jamin jerammõn; a eo ej kwalok im illok jen e, e naj bõk tiriamo.” (Ken. 28:13) Ro me rej kajeoñ in noji bwir ko air rej kõmõn juõn bwir elap, kinke rejjab maroñ noje jabrewõt men jen Anij. (Riit Dri Hibru 4:​13.) Jet rej mour ilo ruo wãwen ko. Juõn wãwen ej ilo air kõmõn bwe en einwõt ñe rej korijer ñõn Jeova, ak ilo ejja ien eo wõt rej kõmõn jerawiwi ko relap. Kain armij rot in me ej mour ilo wãwen in, emwij an luji mour jime eo an. Jeova ejjab buñburuen kin kabuñ rot in an ro me rej noji bwir ko air relap. Jen men in, jela mõn rot in ej kaillu e.​—Ken. 21:27; Ais. 1:​11-​16.

¹⁷ Ñe juõn dri Kristian ej kõmõn juõn bwir elap, Baibel eo ej kwalok ilo alikar kin ta eo ej aikwij kõmõne. Ej ien eo ñõn an bõk jibõñ jen elder ro ilo congregation eo. Jeova ear jitõñ elder ro bwe ren jibõñ ro me renañinmij ilo jitõb. (Riit Jemes 5:​14.) Kwon jab kõtlok bwe mijõk in bõk kowe ak kajime en bõpraik yuk jen am bukot jibõñ ñõn kejmour mour in Kristian eo am. Juõn armij emeletlet enaj ke kar kõtlok bwe metõk eo ej walok iomin jidrik ien jen juõn wã ak mijmij en bõprae e jen an kamarmire nañinmij eo ekauwatata ñõn ejmour eo an?​—Hib. 12:11.

18, 19. (a) Ewi wãwen joñok eo an Devid ej kwalok bwe juõn armij emaroñ bar bõk mour jime eo ear luji? (b) Ta bebe eo am ikijen mour jime eo am?

¹⁸ Eor ke kejatrikrik ñõn an bar ejmour ilo jitõb? Kwomaroñ ke bar bõk mour jime eo kwar luji? Bar lemnok kin joñok eo an Devid. Ear kõmõn juõn bwir elap. Ear ankwõnake kõra eo belen bar juõn eman, ear lũñ iben, im ear karõk bwe leo ejelok ruõn en mij. Inem ilo ien eo enaj kar bin ar watõk Devid einwõt juõn eo ejime wãwen mour eo an. Ak, ear or ke kejatrikrik kin wãwen eo ear walok iben? Devid ear aikwij in bõk kowe, im eñin men eo ear bõke. Inem, ukwelok eo an emol ear kõmõn bwe Jeova en tiriamokake e. Devid ear katak jen an kar bõk kowe im ear bar bõk mour jime ilo an bokake Anij im wõnmanlok wõt ilo wãwen in. Mour eo an Devid ej kwalok kin ta eo jej riiti ilo Jabõn Kennan 24:16: “Dru wãnik ej buñ jiljilimjuõn alen, im ej bar jerkak.” Kin ta tokjen eo? Lemnok kin ta eo Jeova ear ba ñõn Solomon kin Devid elikin an kar mij. (Riit 1 Kiñ Ro 9:4.) Anij ear kememej Devid einwõt juõn eo ewãnik. Emol, Jeova emaroñ karreoik dri jerawiwi ro rej ukwelok jen bwir ko air relap.​—Ais. 1:​18.

¹⁹ Aet, kwonaj juõn armij ewãnik im jime ilo am bokake Anij kin yokwe. Kwon drebij wõt am tiljek, im elañe kwoj kõmõn juõn jerawiwi elap, en mol am ukwelok. Ar mour jime elap an aurõk! Kij kajuju en bõk bebe eo an Devid: “A kin ña, I naj etal ilo aõ wãnik.”​—Sam 26:11.

[Kamelele Itulal]

Ewi Wãwen Kwonaj Uak?

• Ewi wãwen kwomaroñ erom juõn armij ej kwalok an mour jime?

• Ilo wãwen it ko kwomaroñ kejbãrok am mour jime?

• Ewi wãwen an juõn armij maroñ bar bõk mour jime eo an?

[Bo̦o̦k eo ilo peij 8]

‘EAR JUÕN MEN ELAP AN KABWILÕÑLÕÑ IM JOIJ’

Juõn kõra me ebõroro im lailim an alliñ ear kwalok nan kein kin juõn ruwamaejet me ear kwalok an joij im mour jime. Liin ear ber ilo juõn mõn mõña, im elõñ auõ ko elikin an kar illok jen mõn mõña eo ear kile bwe ear meloklok nien jããn eo an ijo. Ear or 2,000 dala iloan, elaplok jen joñõn eo ekkã an or iben. Tokelik liin ear konono iben juõn dri jerbal ilo jikin kõmõn nuuj im ba, “Iar lukkun inebata im nana aõ mour.” Ak, juõn jiroñ ear lo nien jããn eo im ilo mõkõj ear kajeoñ in bukote armij eo an. Kin an jab lo tõbrõk, ear bõkloke ñõn mõn bolijmãn, im bolijmãn ro rar lo jikin eo kõra eo ebõroro ej jokwe ie. Lio ear lap an kamolol im ba, “Ear juõn men elap an kabwilõñlõñ im joij lio ear kõmõne.” Etke jiroñ in ear kanuij kate joñõn wõt an maroñ ñõn karol jããn ko? Bwebwenato eo ilo nuuj peba eo ear kwalok bwe jiroñ eo ear juõn ian dri Kennan ro an Jeova, im lio ear ba bwe “unin ear kõmõne men eo ejime ej kin men ko ear katak ilo kabuñ eo ear ridtolok ie.”

[Pija eo ilo peij 9]

Jodrikdrik ro remaroñ kejbãrok air mour jime ñe rej iion melejoñ ko

[Pija wo ilo peij 10]

Devid ear likjõp in kejbãrok