Etke Jej Aikwij Kejbãrok Ar Mour Jime?

“O Jeova kwon ekajet iõ, . . . kin aõ jime ilo ña.”​—SAM 7:8.

1, 2. Ta jet ian wãwen ko ekkã air walok me rej aituerõke mour jime eo an juõn dri Kristian?

PIJAIK ilo lemnok eo am kin wãwen kein jilu: Jet dri jikuul ro rej kajirere kake juõn ladrik. Rej kajeoñ in kaillu e bwe en kanejnej ak ire ibeir. Enaj ke ukot nana kin nana, ak enaj drebij an illu im illok jen ir? Juõn eman ej mõke ian ilo mweo im ej lale Internet ak aluij TV. Ilo idriñ juõn pija in kelwan ej walok. Enaj ke wõnmanlok im aluije, ak enaj kune computer eo ak jeniji pija eo? Juõn Kristian kõra ej bwebwenato iben jet kõra ro jein im jãtin ilo congregation eo, im bwebwenato eo ej oktõk im jino konono nae juõn eo ilo congregation eo. Enaj ke bõk kunan ilo kain bwebwenato rot in, ak enaj kajeoñ in ukote ta eo rej konono kake?

² Meñe wãwen kein jilu rej oktõk jen dron, aolepeir rej kitibuj air kate ñõn kejbãrok air mour jime einwõt juõn Kristian. Kwoj ke lemnok kin mour jime eo am ñe kwoj jelmae inebata ko, aikwij ko, im mejenkajik ko am ilo mour? Jen ran ñõn ran, armij ro ekkã air lemnok kin baotokiir, ejmour eo air, aituerõk ko ñõn kabwe aikwij ko air, ien ko remõn im nana rej iioni iben ro jerair, im bwelen kin ro rej yokwe ir. Bwelen kij bareinwõt elap ar lemnok kin men kein. Ak, ta eo Jeova ej itoklimo kake ñe ej etale buruer? (Sam 139:23, 24) Ej kin jime in wãwen mour eo ar.

3. Ta jokãlet eo ejejuan Jeova ear letok ñõn kij kajuju, im ta eo jenaj etale ilo katak in?

³ Jeova, dri Letok “men in letok emõn im wãppen,” ear letok elõñ kain menin letok ko ñõn kij kajuju. (Jem. 1:​17) Kin e, eor iber menin letok ko einwõt enbwiner, lolãtãt eo ar, ejmour, im elõñ kabel ko rekajjo jen dron. (1 Kor. 4:7) Bõtab Jeova ejjab jibed kij ñõn kwalok ar mour jime. Ej kõtlok bwe jen mõke kãlet ñõn ejaake karkar in iber. (Dut. 30:19) Inem, jej aikwij etale ta in mour jime ak wãnik. Jenaj bareinwõt etale jilu un ko unin karkar in elap an aurõk.

Ta in Mour Jime?

4. Mour jime ej kitibuj ta, im ta eo jemaroñ katak jen kien eo an Jeova ikijen menin mour ko rar katok kaki?

⁴ Elõñ armij rejjab lukkun jela ta melelen mour jime. Ñõn wanjoñok, ñe dri kien ro rej kemjãje bwe ejime wãwen air jerbal, ekkã air lemnok bwe rej mol. Karkar in eaurõk, ak ej mõtõn wõt karkarin mour jime. Einwõt kar kajerbale ilo Baibel, mour jime ej kitibuj mwil emõn im tiljek. Nan ko ilo kajin Hibru me rej ekkejel ñõn nan in “jime” ej melelen wãppen, eyu, ak ejelok likjõp. Juõn ian nan kein kar kajerbale kin menin katok ko rar lelok ñõn Jeova. Jeova ear buñburuen kake juõn menin katok elañe ear wãppen, ak ejjab utame. (Riit Livitikõs 22:19, 20.) Jeova ear lap an koweik ro rar kejekron nan in jiroñ eo an ilo air lelok menin mour ko reajkup, nañinmij, ak bilo ñõn air katok kaki.​—Mal. 1:​6-8.

5, 6. (a) Ta wanjoñok ko rej kwalok bwe ekkã ar kaurõki men ko reyu ak rejjab jorran? (b) Armij ro rej aikwij ke wãppen ñõn kejbãrok mour jime eo air? Kemelele.

⁵ Lemnok eo ñõn bukot im kaurõk men eo ewãppen ak eyu ejjab kãl. Ñõn wanjoñok, pijaik ilo lemnok eo am juõn eo ej ae im bukot buk ko reaurõk im ej lo juõn buk me eto an kar bukote, ak ej kile bwe ejoko jet peij ko reaurõk iloan. Ilo buromõj, emaroñ karole ñõn jikin buk ko. Ak pijaiki juõn kõra ej etetal ion barijit, im ej ae libbukwe. Kin an lukkun bwilõñ kin an aibujuij im lõñ kain libbukwe ko, jen ien ñõn ien ej jillok im jibwe juõn ñõn lale. Ewi ian men kein enaj bõki? Men ko reyu im rejjab jorran. Ilo ejja wãwen in wõt, Anij ej bukot armij ro me eor ibeir juõn buru ewãppen.​—2 Kron. 16:9.

⁶ Ak, kwomaroñ lemnok elañe mour jime ej aikwij am lukkun wãppen. Kinke jej jolit jerawiwi im jab wãppen, jemaroñ lemnok kin kij mõke einwõt buk eo ejoko jet peij ko, ak libbukwe eo ejorran jidrik. Ej eindrein ke am lemnok jet ien? Kwomaroñ liki bwe Jeova ejjab kõtmene bwe jen wãppen otem wãppen. Ejamin kõtmene jen kij elap jen joñõn maroñ eo ar.a (Sam 103:14; Jem. 3:2) Bõtab, ej kõtmene bwe jen kejbãrok ar mour jime. Inem, eor ke oktõk ikõtan wãppen im mour jime? Aet. Ñõn wanjoñok: Juõn likao ej yokwe jiroñ eo ej iten mareiki. Ilo mol ejamin kõtmene bwe en wãppen ak enaj kõtmene bwe lio en yokwe wõt e kin aolepen buruen. Ilo ejja wãwen in wõt, Jeova ‘ejjab kõnan bwe jen kabuñ ñõn jabrewõt men ijellokin.’ (Ex. 20:5, UBS) Ejjab kõtmene bwe jen wãppen, ak bwe jen yokwe e kin aolepen buruer, im kabuñ ñõn e wõt.

7, 8. (a) Ta joñok eo Jisõs Kraist ear likiti ikijen mour jime? (b) Ilo Baibel eo, ta melelen mour jime?

⁷ Jemaroñ kememej uak eo an Jisõs ke rar kajitõk iben kin ta kien eo elaptata ian kien ko jet. (Riit Mark 12:28-​30.) Jisõs ear jab baj kwalok wõt uak eo ak ear mour ekkar ñõn uak eo an. Ear likit joñok eo elaptata ilo an yokwe Jeova kin aolepen an lolãtãt, buruen, an, im an kajur. Ear kalikar bwe jejjab kwalok mour jime ilo nan ko wõt, ak ikijen kõmõn ko ar remõn me rej walok jen juõn buru emol. Ar kejbãrok ar mour jime ej aikwij ar lor buñten neen Jisõs.​—1 Pit. 2:​21.

⁸ Inem, melele eo kin mour jime ekkar ñõn Baibel eo ej: Tiljek ñõn Jeova kin aolepen buruer, im ñõn karõk ko an im ankil an. Ar kejbãrok ar mour jime ej melelen bwe ilo mour eo ar jen ran ñõn ran, jej kate ñõn kabuñburuen Jeova Anij. Men ko reaurõk iben Jeova rej ejja men ko wõt jej kaurõki ilo mour ko ar. Jen etale jilu un ko unin an aurõk men in.

1. Mour Jime eo Ar im Aituerõk Eo kin Iroij Potata eo An Jeova

9. Ewi wãwen mour jime eo ar ej ekkejellok ñõn aituerõk eo kin iroij potata eo an Jeova?

⁹ Iroij potata eo an Jeova ejjab wawa ion mour jime eo ar. Iroij potata eo an ejime, ej indrio, im ej jelet lõñ im lõl. Enaj eindrein wõt, jekron ta eo jabrewõt menin kõmõnmõn ko rej ba ak kõmõni. Bõtab, elap air kar kananaik iroij potata eo an Anij ilõñ im ilõl. Kin men in, ej menin aikwij ñõn kamol iman jitõb ro im armij ro bwe iroij eo an ejime, wãnik, im eor yokwe. Einwõt dri Kennan ro an Jeova, jekõnan bwebwenato iben jabrewõt armij ro rej mõnõnõ in roñjake kin iroij potata eo an Anij. Ak ewi wãwen kij kajuju jemaroñ kõmõn jokãlet ko im jerbal ekkar ñõn ar kile iroij potata eo an? Ewi wãwen ar kwalok bwe jej kãlet Jeova einwõt Iroij Potata eo ar? Ej ilo ar kejbãrok ar mour jime.

10. Ta nan in kinaklok eo Setan ear kõmõne ikijen mour jime eo an armij, im ewi wãwen kwokõnan uake?

¹⁰ Lemnok kin ewi wãwen ej kitibuj mour jime eo am. Ilo juõn wãwen, Setan ear ba bwe ejelok juõn armij enaj jurake iroij potata eo an Anij, ak korijer ñõn e ilo yokwe eo ejelok kibbon ie. Iman aolep enjel ro rar kweloklok, Devil eo ear ba ñõn Jeova: “Kil wõt kil, aet, men otemjej iben juõn armij e naj lelok kin an mour.” (Job 2:4) Lale bwe Setan ear jab kinaklok wõt armij eo ewãnik Job ak bareinwõt armij otemjej. Ilo jejit Baibel eo ej naetan Setan “dri kinaklok ro jeim im jãtim.” (Rev. 12:10) Ej kinaklok Jeova im ba bwe dri Kristian ro, ekoba kwe, rejamin kejbãrok air tiljek ñõn Jeova. Setan ej ba bwe kwonaj karmijete Jeova bwe kwon kejbãrok mour eo am. Ewi eñjake eo am kin nan in kinaklok kein nae yuk? Kwoj kõnan ke bõk ien in emõn ñõn kamol bwe Setan ej juõn dri riõp? Ilo am kejbãrok am mour jime, kwomaroñ kõmõne men in.

11, 12. (a) Ikijen bebe ko ar jen ran ñõn ran, ta wanjoñok ko rej kalikar bwe rej ekkejellok ñõn aituerõk eo kin mour jime eo ar? (b) Etke ar kejbãrok mour jime eo ar ej juõn jerammõn?

¹¹ Aituerõk eo kin mour jime eo am ej kõmõn bwe ran otemjej mwilim im jokãlet ko am relukkun aurõk. Bar lemnok kin wãwen ko jilu jaar konono kaki moktalok. Ewi wãwen air naj kejbãrok air mour jime? Ladrik eo me ej bõk kajirere jen dri jikuul ro ej lukkun kõnan ukot nana kin nana, ak ej kememej nan in kakkõl in: “Kom jitenburu, komin jab irenwõne kin kom, a lelok jikin ñõn illu eo: bwe emwij je, Kwonaõ irenwõne, I naj nawõnan, Iroij e ba.” (Rom. 12:19) Inem ej illok jen ir. Eman eo me ej mõke ian ilo mweo im ej lale Internet ak aluij TV emaroñ wõnmanlok wõt im aluij pija in kelwan eo, ak ej kememej nan in kakabilek eo ej ekkejellok ñõn nan ko an Job: “I ar kõmõn juõn bujen iben meja; inem ekijkan aõ maroñ in reilok ñõn juõn virjin?” (Job 31:1) Ilo ejja wãwen in wõt, leo ej makoko in aluij pija ko retton im nana kin an watõki bwe rebaijin. Kõra eo me ej bwebwenato iben kumi in kõra ro im ej roñ juõn nan in ruruwe, ej bwijrõk kinke ej kememej nan in tel eo: “Kij otemjej jen kabuñburuen dron ilo emõn, ñõn kalek ir.” (Rom. 15:2) Nan in ruruwe eo emaroñ kar kwaloke ñõn ro jet ejjab menin kalek. Ejjab kwalok nan ko remõn kin dri Kristian eo jein im jãtin; im ejjab kabuñburuen Jemen ilõñ. Inem ej kãlet bwe en jab bõk kunan im ej kajeoñ in ukot bwebwenato eo.

¹² Ilo kajuju wãwen kein, dri Kristian eo ej kõmõn juõn jokãlet me ej ba ilo juõn wãwen: ‘Jeova ej Iroij eo aõ. Inaj kajeoñ in kõmõne men eo ej buñburuen kake.’ Ñe kwoj kõmõn jokãlet im bebe ko am, kwoj ke bareinwõt kajeoñ in kabuñburuen Jeova? Elañe kwoj kõmõne men in, kwoj bokake nan ko me kar je ilo Jabõn Kennan Ko 27:11: “Nejiõ, kwon meletlet, im kamõnõnõik buruõ, bwe in uak ñõn eo ej kinak iõ.” Ej juõn jerammõn elap ñõn ar maroñ kamõnõnõik buruen Anij! Ejjab lap tokjen ke ñõn ar kate kij ñõn kejbãrok mour jime eo ar?

2. Berber in Ekajet eo an Anij

13. Ewi wãwen nan ko an Job im Devid rej kwalok bwe mour jime ej berber eo me Jeova ej ekajete kij kake?

¹³ Jej lo bwe mour jime eo ar ej kamaroñ kij ñõn jutõk kin iroij potata eo an Jeova. Kin men in, ej berber eo me Anij emaroñ kajerbale ñõn ekajete kij. Job ear lukkun melele kin mol in. (Riit Job 31:6.) Job ear jela bwe Anij ej pauni aolep armij ro ilo “kein paun ejime,” ilo an kajerbal kien in ekajet ko an rewãppen ñõn joñe jime eo ar. Devid ear ba juõn men einlok wõt in: “Jeova e naj ekajet dri ailiñ ko: O Jeova kwon ekajet iõ kin aõ wãnik, im kin aõ jime ilo ña. . . . Bwe Anij ewãnik Ej melejoñ buru ko im lemnok ko.” (Sam 7:​8, 9) Jejelã bwe Jeova emaroñ lo ijo emũlõltata ilo juõn armij, ilo nan in kõkkar ilo “buru ko im lemnok ko.” Bõtab, jej aikwij kememej ta eo ej bukote. Einwõt an kar Devid ba, Jeova ej ekajete kij ekkar ñõn mour jime eo ar.

14. Etke jen jab bõk lemnok eo bwe jab wãppen eo ar enaj bõprae kij jen ar kejbãrok ar mour jime?

¹⁴ Pijaiki an Jeova etale elõñ billion buruen armij ro ranin. (1 Kron. 28:9) Ewi emakijkij in an lo an juõn drebij an mour jime? Ilo mol, ejeja! Bõtab, jejjab aikwij bõk lemnok eo bwe kin ar jab wãppen, men in ej bõprae ar maroñ kejbãrok ar mour jime. Okõtõn men in, eor iber un ko remõn ñõn liki, einwõt kar Devid im Job, bwe Jeova enaj lo ar kejbãrok ar mour jime, meñe jejjab wãppen. Kememej bwe mour wãppen ejjab kõmõn bwe juõn en kejbãrok an mour jime. Kar or jilu wõt armij ro rar ber ion lõl me rar wãppen, im ruo iair, Adam im Iv, rar likjõp in kejbãrok air mour jime. Meñe eindrein, elõñ million armij ro rejjab wãppen rar lo tõbrõk ilo air kõmõne men in. Kwomaroñ bareinwõt.

3. Ar Mour Jime Eaurõk ñõn Kejatrikrik eo Ar

15. Ewi wãwen an Devid kwalok bwe mour jime eaurõk ñõn kejatrikrik eo ar kin ilju im jeklaj?

¹⁵ Kinke mour jime eo ar ej berber eo ñõn an Jeova ekajete kij, elukkun aurõk ñõn kejatrikrik eo ar kin ilju im jeklaj. Devid ear jela bwe men in emol. (Riit Sam 41:12.) Ear kaurõk kejatrikrik eo ñõn an bõk buñburu eo an Anij ñõn indrio. Einwõt dri Kristian ro remol ranin, Devid ear kejatrikrik ñõn mour indrio, im ñõn an druaklok wõt ñõn Jeova Anij ke ear korijer ñõn e. Devid ear jela bwe ear aikwij kejbãrok an mour jime elañe ear kõnan lo an jejit kitien kejatrikrik in. Ilo ejja wãwen in wõt, Jeova ej rejetake kij, katakin kij, tel kij, im kejerammõn kij ñe jej kejbãrok ar mour jime.

16, 17. (a) Etke kwar beek ilo buruõm ñõn kejbãrok am mour jime? (b) Ta kajitõk ko katak eo tok juõn enaj etali?

¹⁶ Kejatrikrik ej aurõk ñõn mõnõnõ eo ar ranin. Emaroñ letok ñõn kij lõñliñ eo jej aikwij ñõn ar maroñ kijenmij kin ien ko rebin. Kejatrikrik emaroñ kejbãrok lemnok ko ar bareinwõt. Kememej, bwe Baibel eo ej keiri kejatrikrik ñõn juõn helmet. (1 Tes. 5:8, UBS) Einwõt juõn helmet ej kejbãrok bõran juõn dri tõrinae ilo ien bata, kejatrikrik ej kejbãrok lemnok ko ar jen men ko renana, im lemnok ko renana me Setan ej kowõnmanloki ilo lõl in ej jokolok. Emol bwe, elañe ejelok ar kejatrikrik enaj ejelok melelen ar mour. Jej aikwij mol ilo ar etale kij mõke, im lukkun lemnok kin wãwen ar mour jime im kejatrikrik eo ej ekkejel iben. Kwon kememej bwe ilo am kejbãrok am mour jime, kwoj rejetake iroij potata eo an Jeova im kejbãrok kejatrikrik eo am eaurõk kin ilju im jeklaj. Kwon drebij wõt am mour jime!

¹⁷ Kinke mour jime elukkun aurõk, jej aikwij etale kajitõk ko jet. Ewi wãwen ar maroñ kwalok mour jime? Ewi wãwen jemaroñ kejbãroke? Im elañe juõn armij ear jab kejbãroke iomin juõn ien, ta eo emaroñ kõmõne? Katak in tok juõn enaj uake kajitõk kein.

[Kamelele Ko Itulal]

Ewi Wãwen Kwonaj Uak?

• Ta in mour jime?

• Ewi wãwen mour jime ej ekkejellok ñõn aituerõk eo kin iroij potata eo an Anij?

• Ewi wãwen mour jime ej letok berber in kejatrikrik eo ar?

[Pija ko ilo peij 5]

Wãwen mour eo ar ran otemjej ej letok elõñ aituerõk ko ñõn ar mour jime