‘Etetal Wõt Ilo Burukuk Ibben Christ’

“Kin menin, einwõt kom ar bõk Christ Jesus Iroij, komin etetal wõt ilo burukuk ibben.”​—Kolosse 2:6, New World Translation.

1, 2. (a) Ewi wãwen an Bible kwalok kin mour in tiljek eo an Enoch ilo an karejar ñan Jehovah? (b) Ewi wãwen an kar Jehovah jibañ kij ñan etetal ibben, einwõt an Kolosse 2:6, 7 kwalok?

KWO nañin kar lale ke an juõn ladik jidikdik etetal ibben jemen? Ladik jidikdik eo ej kajeoñe kajjojo makitkit ko an jemen, turin mejen ej errabõlbõl kin nebar; jemen ej jibañ e, turin mejen make emeram kin yokwe im buñburu. Ilo jejjet, Jehovah ej kajerbal ejja wãwen pija in wõt ñan kalikar juõn mour kin jerbal eo etiljek ñan e. Ñan wanjoñok, Nan in Anij ej ba bwe maan eo etiljek Enoch “e ar etetal iben Anij [eo emol].”​—Genesis 5:24; 6:9.

² Ejja einwõt an juõn jemen naj kar jibañ ladik eo nejin edik ñan etetal ibben, Jehovah emwij an letok ñan kij jibañ eo emõntata. Ear jilkintok juõn wõt Nejin ear keotak ñan lal. Ilo buñten ne ko otemjej in mour aetok eo an ijin ion lal, Jesus Christ ear wãppen an kalikar Jemen ilañ. (John 14:9, 10; Hebrew 1:3) Inem ñan ad maroñ etetal ibben Anij, jej aikwij etetal ibben Jesus. Ri jilek Paul ear je: “Kin men in, einwõt kom ar bõk Christ Jesus Iroij, komin etetal wõt ilo burukuk ibben, im en elle okrami im kalek kom ilo E im komin bin ilo tõmak, einwõt emwij katakin kom, im lutõklok kin tõmak ilo kamolol.”​—Kolosse 2:6, 7 (NW).

3. Ekkar ñan Kolosse 2:6, 7, etke jemaroñ ba bwe elõñlok men ñan etetal ilo burukuk ibben Christ jen baj baptais wõt?

³ Kinke rej kõnan etetal ilo burukuk ibben Christ, kate ir anõk buñten nee ko an rewãnik, ri school in Bible ro emol burueir rej baptais. (Luke 3:21; Hebrew 10:7-9) Ibelakin lal, ilo 1997 wõt, elõñlok jen 375,000 rar bõk buñten nee in eaorõk​—juõn joñan eo ilõñinlok jen 1,000 kajjojo ran. Laplok in elap an kabwilõñlõñ! Bõtab, nan ko an Paul emwij jei ilo Kolosse 2:6, 7 rej kwalok bwe elõñlok men ekoba ilo etetal ilo burukuk ibben Christ jen baj baptais wõt. Nan in Greek eo ej ukõt “etetal wõt” ej kwalok juõn makitkit eo ej aikwij wõnmanlok wõt. Bareinwõt, Paul ej kobaiktok bwe etetal ibben Christ ejelet emen men ko: eddek okran ilo Christ, kalek ilo e, bin ilo tõmak, im lutõklok kin kamolol. Jen etale kajjojo nan ko im lale wãwen an jibañ kij wõnmanlok wõt im etetal ilo burukuk ibben Christ.

Eddek ke ‘Okram ilo Christ’?

4. Ta melelen ‘eddek okran ilo Christ’?

⁴ Moktata, Paul ej je, ej aikwij eddek ‘okrad ilo Christ.’ (Keidi Matthew 13:20, 21.) Ewi wãwen an juõn armij maroñ jerbal ñan an eddek okran ilo Christ? Eokwe, okar ko okran juõn menin eddek renojak jen an alikar loi, ak elap tokjeir ñan menin eddek eo​—rej kõmman bwe en bin im lelok õn. Ilo wãwen in lok wõt, joñok im katak eo an Christ rej jelet kij mokta ilo jab alikar loe, rej oktak im bed ilo lemnak ko ad im buruõd. Inem rej letok õn im kakajurlok kij. Ñe jej kõtlok bwe ren beek lemnak im makitkit ko ad, im bebe ko ad, jej emmakit ñan wujleplok mour ko ad ñan Jehovah.​—1 Peter 2:21.

5. Ewi wãwen ad maroñ “ejaake juõn kõnan” kin mõñã eo ilo jitõb?

⁵ Jesus ear yokwe jelãlokjen eo jen Anij. Ear keidi einwõt mõñã. (Matthew 4:4) Bwe, ilo Katak eo an ion Tol eo, ear elij 21 nan ko jen ralitõk kajjojo book ko ilo Jeje ko ilo Hebrew. Ñan anõk joñok eo an, jej aikwij kõmman einwõt an ri jilek Peter kõketak​—“komin mako” mõñã eo ilo jitõb “einwõt niñniñ ro rej kab lotak.” (1 Peter 2:2, NW) Ñe juõn niñniñ ej kab lotak ej kõnan mõñã, ej kalikar kõnan eo an elap. Elañe ejjab wãwen dein ad eñjake ilo ien in kin mõñã ko ilo jitõb, nan ko an Peter rej kakajur kij ñan “ejaake” kõnan in. Ewi wãwen? Nan in kaiñi eo jej loe ilo Psalm 34:8 emaroñ jibañ: “O kwon erjoñ im lo bwe Jeova e joij.” Elañe jej ekkeini ad “erjoñ” Nan in Anij, Bible eo, bõlen ilo am konono juõn mõttan kajjojo ran, jenaj lo ej mõñã eo emõn ilo jitõb. Tokelik, kõnan eo ad enaj eddeklok.

6. Etke elap tokjen ñan kalmenlokjen kin men eo jej konono?

⁶ Bõtab, elap tokjen bwe en emõn ad meme mõñã ñe emwij ad kadeloñe iloan loñid. Inem jej aikwij kalmenlokjen kin men eo jej konono. (Psalm 77:11, 12) Ñan wanjoñok, ñe jej konono book eo The Greatest Man Who Ever Lived, (Armij eo Elaptata Ear Mour) kajjojo jebta elap tokjen ñan kij elañe jej bõjrak im kajitõkin kij make: ‘Ta kadkad eo kadkadin Christ ij loe ilo bwebwenato in, im ewi wãwen aõ maroñ anõke ilo mour eo aõ make?’ Kalmenlokjen ilo wãwen in enaj kamaroñ kij ñan jerbale men eo jej katak. Inem, ñe jej jelmae juõn bebe, jemaroñ kajitõk ibbed make ta eo Jesus emaroñ kar kõmmane. Elañe jej kõmmane bebe eo ad ekkar ñan menin, jej kalikar an mol an eddek okrad ilo Christ.

7. Ta eo ej aikwij lemnak eo ad kin ekan ko rebin ilo jitõb?

⁷ Paul ej bareinwõt rejañ kij ñan bõk “ekõn ko rebin,” mol ko remũlallok in Nan in Anij. (Hebrew 5:14) Konono aolepen Bible eo emaroñ mejenkajjik eo ad mokta ilo menin. Inem elõñlok unin tel ko ñan katak, einwõt katok in binmour eo an Christ, bujen ko kajjo wãweir Jehovah ear kõmmani ibben armij ro an, ak jet ian ennan in kanan ko ilo Bible. Elõñ menin katak ko remaroñ jibañ kij nome im mei ekkan ko rebin ilo jitõb einwõt kein. Ta mejenkajjik eo kin bõk jelãlokjen rot in? Ej, jab ñan letok ñan kij un eo ñan kemjãje, ak ñan kalek yokwe eo ad ñan Jehovah im kebaklok kij ñan e. (1 Korint 8:1; James 4:8) Elañe jej kõnan bõk jelãlokjen in, jerbale ilo ad mour, im kajerbale ñan jibañ ro jet, enaj mol ad kajeoñe Christ. Menin enaj jibañ kij bwe en jimwe an eddek okrad ilo e.

Kwoj ‘Kalek Kom ke ilo Christ’?

8. Ta melelen ‘kalek kom ilo Christ’?

⁸ Kin wãwen eo tok juõn kin etetal ilo burukuk ibben Christ, Paul ej mõkaj im oktaklok jen juõn annañ eo jej loe ñan bar juõn​—jen juõn menin eddek ñan juõn em. Ñe jej lemnak kin juõn em eo rej kaleke, jejjab lemnak kin bedbed eo wõt ak bareinwõt kããn mweo ej jutaklõñtak im alikar loe, kin elap jerbal. Ilo wãwen in lok wõt, jej aikwij kate kij kalek im ejaake kadkad ko im manit ko einwõt ko an Christian. Jerbal rot in me elap jerbale ejjab nojak ñan loe, ejja einwõt an kar Paul jeje ñan Timothy: ‘Bwe am wõnmanlok en alikar ñõn ro otemjej.’ (1 Timothy 4:15; Matthew 5:16) Ta jet ian jerbal ko an Christian rej kalek kij?

9. (a) Ñan kajeoñe Christ ilo jerbal in kwalok nan eo ad, ta jet ian mejenkajjik ko jemaroñ karõki? (b) Ewi wãwen ad jelã bwe Jehovah ekõnan bwe jen lañliñ ilo jerbal in kwalok nan eo ad?

⁹ Jesus ear kakien kij ñan kwalok nan im ñan katakin kin news eo emõn. (Matthew 24:14; 28:19, 20) Ear likit joñok eo ewãppen, kennan ilo beran im bolemen. Bwebõta, ejamin joñan an emõn ad jerbal wõt kar e. Bõtab, ri jilek Peter ej likit mejenkajjik in ñan kij: “A komin kokwojarjar Kraist einwõt Iroij ilo buruemi, im komin pojõk ien otemjej bwe komin uak ñõn jabrewõt armij ej kajitõk ibemi kin unin kejatrikrik eo ej iloami, a kin inemõn im mijõk.” (1 Peter 3:15) Elañe kwoj jab eñjake am “pojõk ien otemjej bwe komin uak,” kwon jab ebwer. Likit mejenkajjik ko ewõr kõmmanwa ie ñan jibañ yuk kebakelok joñan eo. Kebojak lok iman emaroñ kamaroñ yuk bwe en einjuõn ennan ko am ak kobaik juõn ak ruo eon ko. Kwo maroñ likit jet mejenkajjik ko ñan likit elõñlok book in Bible ko, ñan kõmman an lõñlok am bar jeblak, ak ñan jino juõn katak kin Bible. Men eo elap lemnak kake ejjab kin joñan an elõñ​—einwõt ilo oran awa ko, book ko kwoj lilok, ak katak ko​—ak joñan emõnin. Likit mejenkajjik ko ewõr kõmmanwa ie im jibadõk ñan tõbari emaroñ jibañ kij ñan lañliñ ilo ad lelok kij make ilo jerbal in kwalok nan. Eñin men eo Jehovah ekõnan​—ñan ad jerbal ñan e “ilo lõñliñ.”​—Psalm 100:2; keidi 2 Korint 9:7.

10. Ta jet ian jerbal ko jet an Christian jej aikwij kõmmani, im ewi wãwen an men kein jibañ kij?

¹⁰ Ebareinwõt wõr jerbal ko jej kõmmani ilo congregation eo eo rej kalek kij ilo Christ. Men eo elaptata tokjen ej kwalok yokwe ñan don, bwe eñin men eo kakõllan kile Christian ro remol. (John 13:34, 35) Ñe jej katak wõt, elõñ iad jej ebakelok ri kaki eo ad, bwe men in ej eindein. Bõtab, jemaroñ ke kiõ lor nan in kakabilek eo an Paul ñan “laplok buruemi” ilo ad jelã ro jet ilo congregation eo? (2 Korint 6:13) Elder ro bareinwõt rej aikwiji yokwe eo ad im kamolol. Ilo ad karejar ibbeir, jibadõk im bõk nan in kakabilek eo air jen Jeje ko, jenaj kõmman bwe jerbal eo air ebin en laplok an bidodo. (Hebrew 13:17) Ilo ejja ien eo wõt, enaj wõr kunan menin ñan kalek kij ilo Christ.

11. Ta lemnak eo ewõr tokjen jej aikwij bõke kin baptais?

¹¹ Baptais ej juõn ien ekairujruj! Bõtab, jej aikwij jab kõtmene kin ien otemjej ilo mour elikin ien eo bwe en bar joñan wõt juõn an kairujruj. Juõn mõttan eo elap ilo ad kalek kij ilo Christ ejelet ad “etetal ilo lajrak ilo ejja ial in wõt.” (Pilippai 3:16, NW) Ejjab melelen menin juõn style in mour eo ejelimo im kamõkmõk. Ej melelen etetal manlok wõt ilo juõn line eo ejimwe​—einwõt ba, kalek mantin ko remõn mantin jitõb im eddeb ñani jen ran ñan ran, yiõ ñan yiõ. Kememej, “eo e naj kijinmij ñõn jemlokõn, e in e naj mour.”—Matthew 24:13.

Kwe “Kwoj Bin ke ilo Tõmak eo”?

12. Ta melelen “bin ilo tõmak”?

¹² Ilo ennan eo an kein kajilu ilo an kwalok kin ad etetal ilo burukuk ibben Christ, Paul ej rejañ kij ñan “bin ilo tõmak.” Juõn version ej konono, “kabine ikijen tõmak eo,” kinke nan in Greek eo Paul ear kajerbale emaroñ melelen “ñan kabine, jortoklik, im kõmman bwe en jab ukoktak ekkar ñan kien.” Ke jej eddeklok ilo jelãlokjen, rej bar letok ñan kij un eo ñan lo bwe tõmak eo ad ilo Jehovah Anij emõn bedbedin, ilo mol, emwij ejaake ekkar ñan kien. Tokjen eo ej juõn laplok ilo ad bin ilo tõmak. Ej oktak im laplok an bin ñan lal eo an Satan ñan ukõtlok kij. Menin ej kakememej kij kin nan in kõketak eo an Paul ñan “jibarbar ñõn men in wãppen.” (Hebrew 6:1) Ritto im bin ilo tõmak rej jimor jibwe pein don.

13, 14. (a) Ta men in kauwatata ko Christian ro ilo ebeben eo kein kajuõn ilo Kolosse rar jelmaiki ñan air bed wõt im bin ilo tõmak? (b) Ta eo emaroñ kar kainebataik ri jilek Paul?

¹³ Christian ro ilo ebeben eo kein kajuõn ilo Kolosse rar jelmae menin kamijak ko ñan tõmak eo air ebin. Paul ear kakkõl: “Komin kejbãrok kom bwe ejelok juõn en rakimi kom kin katak in meletlet eo an ak kin am mon bata, ekar ñõn bwebwenato mokta an armij rõn, im ñõn irinekatak ko an lõl, im jab ñõn Kraist.” (Kolosse 2:8) Paul ear jab kõnan bwe ri Kolosse ro, ro rar oktak im armij ro an ailiñ eo an Nejin Anij in yokwe eo,” ren bõklok ir, im rakimi ir jen jerammõn eo air ilo jitõb rej bed ie. (Kolosse 1:13) Telbiloik ir kin ta? Paul ear jitõñlok ñan “katak in meletlet,” ien eo dein nan in ej walok ilo Bible. Ear konono ke kin katak in meletlet eo an ri meletlet in Greek ro, einwõt Plato im Socrates? Meñe rein kar juõn menin kauwatata ñan Christian ro remol, ilo ran ko, nan in “katak in meletlet” ear wõr juõn melele elap belakin. Ekkã an jitõñlok ñan lemnak ko an elõñ kumi in armij ro​—meñe ko an kabuñ. Ñan wanjoñok, emaan in ri Jew ro ilo ebeben eo kein kajuõn einwõt Josephus im Philo rar naetan kabuñ ko air juõn katak in meletlet​—bõlen ñan kalaplok an kareelel.

¹⁴ Jet ian katak in meletlet ko remaroñ kar kõmman an Paul lemnak kaki kar men ko kin kabuñ. Tokelik ilo ejja jebta in wõt ilo letter eo an ñan ri Kolosse ro, ear konono ñan ro rar katakin, “Jab jerbale, ak edjoñe, ak uñuri,” ilo wãwen in rej jitõñlok ñan wãwen ko ilo Kien eo ikijen Moses eo ear jemlok kitien ikijen mij eo an Christ. (Rome 10:4) Kobatok ibben katak in meletlet ko an pagan, kareelel ko jet ear wõr kitieir im rar menin kauwatata ñan mour in jitõb an congregation eo. (Kolosse 2:20-22) Paul ear kakkõl nae katak in meletlet eo ear mõttan “irinekatak ko an lõl in.” Katak in tel rot in ewan armij men eo ej unjen.

15. Ewi wãwen ad maroñ bõprae ad oktaklok kin lemnak eo ejjab ekkar ñan jeje ko im ekkã an jelmaik kij?

¹⁵ Kalaplok jelã im lemnak ko an armij ejjab bin an bedbed ion Nan in Anij emaroñ jarõk juõn menin kauwatata ñan bin ilo tõmak eo an Christian. Kij rainin jej aikwij ekkõl kin kain kauwatata rot in. Ri jilek John ear rejañ: “Ro jitenburu, komin jab tõmak jitõb otemjej, a melejoñ jitõb rõn elañe rej jen Anij ke jab ke.” (1 John 4:1) Inem elañe juõn mõttam ri school ej kajeoñ kamol ñan yuk bwe mour ekkar ñan kien ko ilo Bible ej mantin mour eo etto, ak elañe juõn ri turõm ej iten kareel yuk ñan bõk juõn lemnak kin arõk mweiuk, ak elañe juõn mõttam ri jerbal ej jibed yuk ñan kokkure bõklikit eo am ej bedbed ion katak ko jen Bible, ak meñe juõn ri tõmak eo mõttam ej kwalok an notaiki ro jet ilo congregation eo im ej bedbed ion lemnak eo an make, jab bõk men eo rej ba. Kajekdon men eo ejjab errã ibben Nan in Anij. Ilo ad kõmman eindein, jenaj debij wõt ad bin wõt ilo tõmak ke jej etetal ilo burukuk ibben Christ.

“Lutõklok Kin Tõmak ilo Kamolol”

16. Ta men eo kein kemen ilo etetal ilo burukuk ibben Christ, im ta kajitõk eo jemaroñ kajitõkin kij kake?

¹⁶ Men eo kein kemen ilo etetal ilo burukuk ibben Christ me Paul ej kwalok ej bwe jen “lutõklok kin tõmak ilo kamolol.” (Kolosse 2:7, NW) Nan in “lutõklok” ej kakememej kij kin juõn river eo ej lutõklok kobban. Menin ej kwalok bwe ñan kij einwõt Christian, kamolol eo ad ej juõn men eo en etal wõt ak juõn manit. Kajjojo iad emõn en kajitõk, ‘Ij kamolol ke?’

17. (a) Etke jemaroñ ba bwe elap ijo ibbed ñan ad kamolol kake meñe ilo ien ko rejjab kamõnõnõ im bin? (b) Ta jet ian menin letok ko jen Jehovah ko elaptata am eñjake am kamolol kaki?

¹⁷ Emol, kij aolep ewõr un eo ebwe ibbed ñan ad lutõklok kin kamolol ñan Jehovah ran otemjej. Meñe ilo ien ko elap air nana, emaroñ wõr jet men ko relamwan rej letok jidik ien ellã. Juõn jerad ej kwalok an wõr an lemnak kin kij. Juõn eo ej yokwe ej letok jibañ. Juõn boñ eo emõn kakije ie ej letok kajur. Juõn mõñã eo enno ej kõmman ad jab kwuli. Juõn al an bao, juõn ettõñ an ajiri, juõn meram in mejatoto eo eblue, juõn kõto eo ekaemololo​—men kein otemjej im lõñlok jemaroñ loi ilo juõn wõt ran. Ekanuij bidodo ñan kajettokjen menin letok rot kein. Men kein aolep ejjab wõr aorõkiir ke ñan ad lelok juõn kommol? Rej aolep itok jen Jehovah, Unjen eo an “menin letok emõn im wãppen otemjelok.” (James 1:17) Im ear letok ñan kij menin letok ko relaplok​—mour eo make, ñan wanjoñok. (Psalm 36:9) Bareinwõt, ear letok ñan kij juõn kejatdikdik ñan bõk mour indio. Ñan letok menin letok in, Jehovah ear kõmmane menin katok eo elaptata ilo an jilkintok juõn wõt Nejin ear keotak, eo ear “jitenburu ibben ran otemjej.”​—Jabõn Kennan 8:30; John 3:16.

18. Ewi wãwen ad maroñ kwalok ad kamolol ñan Jehovah?

¹⁸ Inem, emol nan kein an ri jeje psalm: “Men eo emõn in lelok kamolol ñõn Jeova.” (Psalm 92:1) Ilo wãwen in lok wõt, Paul ear kakememej Christian ro ilo Tessalonika: “Ilo men otemjej komin kamolol.” (1 Tessalonika 5:18; Epesõs 5:20; Kolosse 3:15) Kij kajjojo jemaroñ bebe ilo burued ñan kalaplok ad kamolol. Jar ko ad rejjab aikwij ñan kajitõk wõt ñan Anij kin aikwij ko ad. Men kein remõn ilo jikiir. Ak kalmenlokjen kin juõn jeram eo ej kõnan konono wõt ñan yuk ñe ewõr men en ej aikwiji jen kwe! Inem etke kwoj jab jar ñan Jehovah ñan kamolol im nebar e? Ewi joñan jar ko rej kamõnõnõik e ñe ej reilaltak ion lal in ejelok kamolol ie! Tokjen eo kein karuo ej bwe jar rot kein remaroñ jibañ kij ñan lemnak kin men ko remol ilo mour, im kakememej kij kin joñan ad jerammõn.

19. Ewi wãwen an nan ko an Paul ilo Kolosse 2:6, 7 kwalok bwe kij otemjej jemaroñ etal wõt im kõmanmõnlok ad etetal ibben Christ?

¹⁹ Ejjab men in kabwilõñlõñ ke kin joñan meletlet in tel eo jemaroñ bõk jen juõn eon eo ilo Nan in Anij? Nan in kakabilek eo an Paul ñan etal wõt im etetal ibben Christ ej juõn men eo kajjojo iad ej aikwij kõnan bõk ñan buruen. Inem jen kõmman bwe en ‘elle okrad ilo Christ,’ “kalek kij ilo e,” “bin ilo tõmak,” im ‘lutõklok kin kamolol.’ Kakabilek rot in elaptata an lap tokjen ñan ro rekãl rej kab baptais. Ak ej jerbal ñan kij otemjej. Lemnak kin wãwen an juõn okran wijki totolallok im laplok wõt im wãwen an juõn em eo rej kaleke ej utiejlok im utiejlok. Eindein ad etetal ibben Christ ejamin jemlok. Ebwe jikin ñan ad eddeklok ilo jitõb ilo elõñ kajjo wãwen ko ilo mour ko ad. Jehovah enaj jibañ kij im kajerammõn kij, bwe ekõnan bwe jen etetal wõt ibben im ibben Nejin eo jitenburu ibben ilo ejelok jemlokin.

Ewi Wãwen Am Naj Kar Uak?

◻ Ta eo ekoba ilo etetal ilo burukuk ibben Christ?

◻ Ta melelen ñan eddek ‘okran ilo Christ’?

◻ Ewi wãwen ad maroñ ‘kalek kij ilo Christ’?

◻ Etke elap tokjen ñan ad “bin ilo tõmak eo”?

◻ Ta un ko ewõr ibbed ñan ad ‘lutõklok kin kamolol’?

[Pija eo ilo peij 22]

Okran wijki ko emaroñ jab alikar loi, ak rej lelok mõñã ñan wijki eo im añkõiki ilo mãjojo