Kajerammõn Eo An Jehovah Ion “Eneo” Ened

“Jabdewõt men enaj mour ijo den eo ej tortok ie tok.”​—EZEKIEL 47:9, New World Translation.

1, 2. (a) Ewi joñan aorõk in den? (b) Ta eo den eo ilo river eo ilo vision eo an Ezekiel ej pijaiki?

DEN ej juõn men ekabwilõñlõñ. Aolep men ko rej mour rej atartar ion. Ejelok juõn iad emaroñ to an mour elañe ejelok den. Jej bareinwõt atartar ion ñan karreo, kinke den emaroñ kaunlok im karreoik men ko retton. Inem jej kwal enbwinid, nuknuk ko ad, meñe mõñã ko kijed ie. Kõmman eindein emaroñ lomoren mour ko ad.

² Bible ej kajerbal den ñan pijaik menin letok ko ilo jitõb an Jehovah kin mour. (Jeremiah 2:13, NW; Jon 4:7-15) Menin letok kein ekoba karreoik armij ro an ikijen katok in binmour eo an Christ im jelãlokjen eo kin Anij jej loe ilo Nan eo an. (Dri Epesõs 5:25-27) Ilo temple in vision eo an Ezekiel, river eo ekabwilõñlõñ ej torlok jen temple eo ej kakõlleik kain jerammõn ko rej letok mour. Ak ñããt eo river eo ej torlok, im ta melelen ñan kij rainin?

Juõn River ej Torlok ilo Juõn Eneo Emwij an Jeblak

3. Ta eo Ezekiel ear iione, einwõt air report kake ilo Ezekiel 47:2-12 (NW)?

³ Einwõt ri kamakoko ilo Babylon, armij ro an Ezekiel rar aikwiji menin letok ko an Jehovah. Inem, ear menin kakajur ñan an Ezekiel lo juõn den ej waloktok jen ijo ekwojarjar im torlok jen temple eo! Juõn enjel ej joñe ijo den eo ej tortok ie kin joñan in 1,000-cubit joñan kõtan ko. Mũlal in ear laplok jen joñan kolelen neen ñan bukien mũlal in im ñan katin mũlal in ñan juõn river ñan tutu ie. River eo ej bõktok mour im kõn in kemourur bũdej. (Ezekiel 47:2-11, NW) Kar jiroñlok Ezekiel: “Enaj eddek bwijin kain keinikkan itõrerein den eo. Bwilikeir rejamin aemedlok, im rejamin bõjrak jen air kalle.” (Ezekiel 47:12a, NW) Ke aetin den eo ej deloñe Lomalo in Mij​—ijo ejelok mour ie​—ej mour im jiblõñtak! Lwe in iik. Juõn jikin emõn ñan iik.

4, 5. Kanan eo an Joel kin juõn river ewi wãwen an einlok wõt eo an Ezekiel, im etke elap tokjen menin?

⁴ Kanan aibujuij in emaroñ kar kakememej ri Jew ro rar kamakoko kin bar juõn kanan emwij kar je elõñlok jen ruo ebeben ko lok iman: “Jen mweo imõn Jehovah enaj toor juõn unjen den, im ej aikwij kaemololoik komlal in Acacia Wijki ko.”a (Joel 3:18, NW) Kanan eo an Joel, einwõt eo an Ezekiel, ej kanan bwe juõn river enaj toor jen mweo imõn Anij, temple eo, im bõktok mour ñan juõn jikin eo emõrã.

⁵ Imõniaroñroñ eo iumin elõñ yiõ ko etto an kamelele bwe kanan eo an Joel ej jejjet kitien ilo ien kein ad.b Inem, emol bwe menin ej mol im einlok wõt vision eo an Ezekiel. Ilo eneo emwij kajeblake an armij ro an Anij rainin, einwõt ilo Israel eo etto, kajerammõn ko an Jehovah rej lukkun toor im alikar loi.

Juõn Toor eo Ekajur in Jerammõn ko

6. Kabũtũktũk eo kin bõtõktõk ion lokatok in vision eo en kar aikwij kakememej ri Jew ro kin ta eo?

⁶ Ta eo ej unjen kajerammõn ko an Anij ion armij ro an emwij air jeblak? Eokwe, lale bwe ej den eo ej toor jen temple eo an Anij. Eindeinlok rainin, jerammõn ko rej itok jen Jehovah ikijen temple eo an elap ilo jitõb​—karõk eo ñan kabuñ eo erreo. Vision eo an Ezekiel ej kobaiktok juõn tibdik eo elap tokjen. Ilo melaj eo ituloa, den eo ej tortok im kijone lokatok eo, iturõk in wõt. (Ezekiel 47:1, NW) Lokatok eo ej bed iolaplap in temple in vision eo. Jehovah ej kanuij kejbãrok ilo an kwalok ñan Ezekiel im ro jet bwe bõtõktõk in juõn men eo rej katok kake ren kabũtũktũk ion. (Ezekiel 43:13-18, 20, NW) Lokatok eo elap melelen ñan ri Israel ro otemjej. Bujen eo air ibben Jehovah emwij kar kabine etto wõt moktalok wõt ke Moses ear kabũtũktũk bõtõktõk ion juõn lokatok ijo iturin Tol Sinai. (Exodus 24:4-8) Ibbũtũktũk in bõtõktõk eo ion vision in lokatok eo ear kakememej ir bwe ñe renaj jeblak ñan eneo eneir emwij kajeblake, kajerammõn ko an Jehovah renaj toor im alikar toan wõt air kautiej bujen eo air ibben.​—Duteronomi 28:1-14.

7. Ta melele eo Christian ro rainin rej loe ilo lokatok in kõkkar eo?

⁷ Eindeinlok, armij ro an Anij rainin rej jerammõn ikijen juõn bujen​—juõn eo emõnlok, bujen eo ekãl. (Jeremiah 31:31-34, NW) Bareinwõt etto wõt ke rar kabine ikijen bõtõktõk, eo an Jesus Christ. (Dri Hibru 9:15-20) Rainin, meñe jej bed ibwiljin ri kabit ro, ro rej mõttan bujen in, ak ibwiljin “s̃ip” ro jet, ro rej bõk tokjen, jej lo melele eo elap ilo lokatok in kõkkar eo. Ej kõkkar kin ankil an Anij ilo kobalok eo ibben katok eo an Christ. (Jon 10:16; Dri Hibru 10:10) Ejja einwõt lokatok in kõkkar eo ilo tuiolaplap in temple eo ilo jitõb, katok in binmour eo an Christ ej tuiolaplap eo ñan kabuñ eo erreo. Ej bedbed eo ñan jeorlok jerawiwi ko ad im eindein ñan kejatdikdik ko ad otemjej kin ilju eo ej itok. (1 Jon 2:2) Kin menin jej kate kij mour kin kien eo ej kobalok ibben bujen eo ekãl, “kien eo an Christ.” (Dri Galetia 6:2) Toan wõt ad kõmman menin, jenaj bõk tokjen jen menin letok ko an Jehovah kin mour.

8. (a) Ta eo ear jako jen melaj eo ituloa in vision in temple eo? (b) Ikijen ta eo priest ro ilo vision in temple eo rar maroñ karreoik ir make kake?

⁸ Juõn tokjen rot in ej juõn jutak eo erreo iman mejen Jehovah. Ilo vision in temple eo, melaj eo ituloa ewõr juõn men eo ejako ie im elap tokjen ilo melaj in imõn kabbed eo im ilo temple eo an Solomon​—juõn basin elap, tokelik kar naetan juõn lomalo, ñan an priest ro kwalkol ie. (Exodus 30:18-21; 2 Kronikel 4:2-6) Ta eo priest ro ilo temple eo ilo vision eo an Ezekiel rar maroñ kajerbale ñan karreo? Eokwe, unjen den eo ej toor ilo tuloan melaj eo! Aet, Jehovah enaj kar kajerammõn ir kin wãwen ko ñan lañliñ kin juõn jutak eo erreo, ak kwojarjar.

9. Ewi wãwen an ri kabit ro im ro ilo jar eo elap wõr juõn air jutak eo erreo rainin?

⁹ Eindeinlok, rainin ri kabit ro emwij kajerammõn ir kin juõn jutak eo erreo iman mejen Jehovah. Jehovah ej lale ir einwõt kwojarjar, keañ kin ir wãnik. (Dri Rom 5:1, 2) Ak ta kin “jar eo elap,” me bwij ko rejjab bwijjin priest rej pijaik ir? Rej kabuñ ilo melaj eo itunabõj, im ejja unjen den eo ej tortok ijo me ejja mõttan wõt vision in temple eo. Inem, ejejjet, bwe ri jilek John ear lo jar eo elap rej kõnak nuknuk ko remouj im erreo ke rej kabuñ ilo melaj in temple eo ilo jitõb! (Reveles̃õn 7:9-14) Jekdon ewi wãwen air kõmman ñan ir ilo lal in, remaroñ tõmak bwe toan wõt air jerbale air tõmak ilo katok in binmour eo an Christ, Jehovah ej lale ir einwõt ro rerreo. Ewi wãwen air jerbale tõmak? Ilo air anõk jenkwon neen Jesus, im liki ilo katok in binmour eo.​—1 Piter 2:21.

10, 11. Ta juõn men eo elap tokjen ilo den in kõkkar eo, im ewi wãwen an menin wõr kilan ilo an lap an ereraklok river eo?

¹⁰ Einwõt an dedelok kwalok kake, ebar wõr juõn men kin den in rej kõkkar kake​—jelãlokjen. Ilo Israel eo emwij kajeblake, Jehovah ear kajerammõn armij ro an kin katak ilo Jeje ko ikijen jerbal in priest eo. (Ezekiel 44:23, NW) Ilo juõn wãwen keidi, Jehovah ej kajerammõn armij ro an rainin kin katak Nan eo an emol, ikijen jerbal in “pris ro . . . rokwojarjar.” (1 Piter 2:9) Jelãlokjen eo kin Jehovah Anij, kin karõk ko an kin armij, im elaptata kin Jesus Christ im Ailiñ eo an Messiah ej toor ilo juõn unin den eo ej laplok wõt ilo ran kein eliktata. Elap an mũlallok den eo ilo jitõb ej kaemololo im jej bõke!—Daniel 12:4, NW.

¹¹ Ejja einwõt an ereraklok im mũlallok river eo enjel eo ear joñe, eindein tortok in jerammõn ko in mour eo letok jen Jehovah ej laplok wõt ñan kabwe ñan armij ro rej ibweptok ñan loan eneo ened ilo jitõb emwij kajerammõne. Bar juõn kanan in jeblak eo ear kennan lok iman: “Eo erik e naj juõn tausan, im eo e niñ juõn ailiñ e kajur; Ña Jeova I naj bikbikri ilo ien eo an.” (Aiseia 60:22) Nan kein emwij air itok im mol​—million emwij air kuktok im kobatok ibbed ilo kabuñ eo erreo! Jehovah ear kõmman bwe en lap “den” eo ñan ro otemjej rej jeblaklok ñan e. (Reveles̃õn 22:17) E ej lo bwe dolul eo an ilo lal in ej ajeje Bible ko im book in kamelele Bible ko ilo aolepen belakin lal, ilo buki kajin ko. Ilo wãwen in lok wõt, kwelok ko an Christian im convention ko emwij karõki ibelakin lal bwe aolep ren maroñ bõk den in mol eo ejatõltõl im erreo. Ewi wãwen an menin letok rot kein jelet armij ro?

Den eo Ej Bõktok Mour!

12. (a) Etke wijki ko ilo vision eo an Ezekiel rar maroñ kalle einwõt air kõmman rainin? (b) Ta eo wijki kein rekouwa rej jutak ikijen ilo ien in ien ran ko eliktata?

¹² River eo ilo vision eo an Ezekiel ej bõktok mour im ejmour. Ke Ezekiel ej katak kin wijki ko renaj kar eddek itõrerein river eo, kar jiroñlok e: “Bwilikeir rejamin aemedlok, im rejamin bõjrak jen air kalle. . . . Keinikkan ko renaj kalle, im bwilikeir renaj jerbal ñan uno.” Etke wijki kein rej kalle ilo wãwen in ekabwilõñlõñ? “Kine den ko ej ñan ir​—im ej itok jen ijo elap an kwojarjar otem kwojarjar.” (Ezekiel 47:12b, NW) Wijki in kõkkar kein rej annañe menin letok ko an Anij ñan kajeblak armij ñan wãppen ion bedbed in katok in binmour eo an Jesus. Ion lal in ilo ien in, bwen ri kabit ro rej tel ilo letok õn ko ilo jitõb im kemour. Elikin an aolep 144,000 ro bõk jinekjej eo air ilañ, tokjen ko rej itok jen jerbal in priest eo air einwõt iroij in jibañ ro ibben Christ im renaj etal wõt ñan loan ilju eo ej itok, im etal wõt ñan an dedelok air tarinaik mij eo ear itok ikijen Adam.​—Reveles̃õn 5:9, 10; 21:2-4.

13. Ta kemour eo ej tõbrak ilo ien kein ad?

¹³ Vision in river eo ej torlok ñan Lomalo in Mij eo ejelok mour ie im kemour jabdewõt men eo ej tõbare. Lomalo in ej pijaik juõn melan eo ilo jitõb im men ko ibelakin remij. Ak mour ej obraklok “ijoko otemjej den eo ruo alen an laplok an tortok ie.” (Ezekiel 47:9, NW) Eindeinlok, ilo ran kein eliktata, armij rej itok ñan air mour ilo jitõb jabdewõt ijo den in mour eo ej toloñe. Ro moktata kar kemour ir kar bwen ri kabit ro ilo 1919. Rar jeblak im mour ilo jitõb jen juõn wãwen mij eo rar bed im jab makitkit ie. (Ezekiel 37:1-14, NW; Reveles̃õn 11:3, 7-12) Den kein elap tokjeir jen ien eo rar tõbar ro jet rar mij ilo jitõb, im ro rar bar jeblak im mour im ejaake juõn jar eo elap ej lõñlok wõt in sheep ro jet, ro rej yokwe im karejar ñan Jehovah. Ejjabto, menin letok in enaj ereraklok ñan jarlepju in armij ro renaj jerkakbiji.

14. Jerbal in iik eo ej laplok ibben an eraklok barijet in Lomalo in Mij ta eo emõn air wanjoñok kake rainin?

¹⁴ Tokjen eo elap tokjen ilo jitõb elap an walok leen. Menin kar wanjoñok kake ikijen jikin iik eo ear lõñ iik ej walok ie ilo barijet ko ilo lomalo eo mokta ear mij. Jesus ear jiroñlok ri kalor ro an: “I naj likit komro dri añwõr armij.” (Matu 4:19) Ilo ran ko eliktata, jerbal in eñwõd eo ear ijjino ibben air kar aintok bwen ri kabit ro, ak ear jab bõjrak ijin. Den eo ej letok mour jen temple eo an Jehovah ilo jitõb, ekoba jerammõn eo kin jelãlokjen eo ejimwe, im ej jelet armij in ailiñ ko otemjej. Jabdewõt ijo lwe in den eo ej tõbare, ej walok mour ie.

15. Ta eo ej kwalok bwe ejjab jabdewõt armij enaj bõk menin letok ko an Anij kin mour, im ta tokjen jemlok eo ñan armij rot kein?

¹⁵ Bwebõta, ejjab aolep rej kiõ uak ñan ennan in keañ in kin mour; im ejamin aolep ro rej jerkakbiji ilo ien Thousand yiõ in Iroij eo an Christ renaj kõmman menin ie. (Aiseia 65:20; Reveles̃õn 21:8) Enjel eo ej keañ bwe mõttan ko ilo lomalo eo rejjab mour. Jikin kein rettã im tutu im ejelok mour ie rej ‘liloki ñan salt.’ (Ezekiel 47:11, NW) Ak kin armij ro ilo ran kein ad, ejjab aolep ro rej bõk den in mour eo letok in Jehovah. (Aiseia 6:10) Ilo Armageddon, ro rar make kãlet ñan air bed wõt ilo juõn wãwen eo ejelok mour in jitõb ie im nañinmij naj lelok ir ñan salt, einwõt ba, renaj jako indio. (Reveles̃õn 19:11-21) Bõtab, ro rar tiljek ilo air idak den kein remaroñ kejatdikdik ñan air mour im lo an jejjet kitien eo eliktata in kanan in.

River eo Ej Toor ilo Paradise

16. Ñããt im ewi wãwen an naj temple in vision eo an Ezekiel wõr jemlok in kitien eo eliktata?

¹⁶ Einwõt kanan ko jet kin jeblak eo, vision eo an Ezekiel kin temple eo ej lo an jejjet kitien eo eliktata ilo ien thousand yiõ ko (Millennium). Inem class in priest eo enaj jemlok an bed ijin ion lal. “Renaj priest an Anij im an Kraist, im re naj kiñ [ilañ] iben iomin tausan yiõ.” (Reveles̃õn 20:6, NW) Priest rein an lañ renaj kobalok ibben Christ ilo jerbale likieo in katok in binmour eo an Christ. Kin menin armij renaj mour ilo wãnik, jeblak ñan wãppen!​—Jon 3:17.

17, 18. (a) Ewi wãwen air kwalok kin juõn river in letok mour ilo Reveles̃õn 22:1, 2, im ñããt eo jinoin ien eo ej jerbal ñan vision in? (b) Ilo Paradise, etke river in den in mour eo ej lo juõn ien an lap an ereraklok?

¹⁷ Tokjen menin, river eo Ezekiel ej loe enaj toor kin den in mour eo elap. Eñin ej ien eo ñan kamolol kin kanan eo emwij je ilo Reveles̃õn 22:1, 2: “Im e ar bakajen ñõn iõ dren in mour, ejatõltõl einwõt kristal, ej torlok jen tron an Anij im Lam iolapin ial eo an. Im i toreren river eo wijki in mour rej kajõb e, im ej jebar leen joñoul im ruo wãwen, im ej kalle aliñ otemjej: im bwilikõn wijki eo ken kemour ro dri ailiñ ko.”

¹⁸ Ilo ien tausan yiõ ko (Millennium, nañinmij otemjej​—enbwin, lemnak, im eñjake​—enaj mwij kemouri. Menin emõn kar pijaiki ikijen “kemour eo an ailiñ ko” ikijen wijki in kõkkar ko. Kamolol kin menin letok ko Christ im 144,000 ro rej jerbali im lolorjaki, “ejelok ri jokwe ijo enaj ba: ‘I nañinmij.’” (Isaiah 33:24, NW) Im river eo enaj deloñ ñan loan ien eo elaptata an ereraklok. Enaj aikwij jededlok im mũlallok bwe en bwe ñan million ro, bõlen billion, armij ro renaj jerkakbiji ro renaj idak den in mour kein rerreo. Vision in river eo ear kemour Lomalo in Mij, bõktok mour ñan ijoko jabdewõt den ko an rej toor ie. Ilo Paradise, maan im kõrã ro renaj bar mour ilo likieo in melele in, renaj bar mour jen mij eo rar jolete jen Adam elañe rej jerbale air tõmak ilo tokjen binmour eo emwij jakelok ñan ir. Reveles̃õn 20:12 ej kanan bwe “book limlim ko” naj kabelloki ilo ran ko, im bar letok meram in melele eo ro emwij air jerkakbiji renaj bõk tokjen jene. Ekaburomõjmõj, bwe jet renaj makoko in bõk kemour, meñe ilo Paradise. Ri jumae rein rej ‘lelok ñan salt’ in jako eo ñan indio.​—Revelation 20:15, NW.

19. (a) Ewi wãwen an naj ajej in eneo jejjet kitien ilo Paradise? (b) Ta eo ilo Paradise jikin kwelok eo ej pijaiki? (c) Ta aorõkin ijo jikin kwelok eo ej bed ie ilo jet kõtan jen temple eo?

¹⁹ Bareinwõt ilo ien en, kejjemoj eo an eneo ilo vision eo an Ezekiel enaj jejjet kitien eo eliktata. Ezekiel ear lo an jimwe ajeje eneo; eindeinlok, kajjojo Christian eo ej tõmak emaroñ liki bwe enaj wõr juõn jikin, juõn jolet, ilo Paradise. Bõlen, kõnan eo ñan an juõn armij wõr make imõn ñan jokwe ie im kejbãroke enaj jejjet kitien ilo juõn wãwen lajrak. (Aiseia 65:21; 1 Dri Korint 14:33) Jikin kwelok eo Ezekiel ear loe ear jejjet an pijaiki karõk in jerbal eo Jehovah ej karõke ñan lal eo ekãl. Class in priest eo emwij kabiti enaj etal em jako an bed ilo enbwinin armij ibwiljin armij ro. Vision eo ej kwalok joñan in ilo an pijaiki jikin kwelok eo ilo eneo “aorõk in men eo ekwojarjar emwij an jakolok” im jikin in ewõr jet kõtan ettolokin jen temple eo. (Ezekiel 48:15, NW) Ke 144,000 ro rej iroij ibben Christ ilo lañ, ejjab melelen bwe ejelok en ej jutak ikijen Kiiñ eo ion lal. Armij ro rej kõttã ñan e enaj lap air bõk tokjen jen yokwe in tel eo an im nan in jiroñ eo an class in iroij eo. Bõtab, lukkun jea in kien eo, ejjab bed ilo lal, ak ilo lañ. Jabdewõt armij ion lal, ekoba class in iroij eo, renaj kõttã ñan Ailiñ in Messiah eo.​—Daniel 2:44; 7:14, 18, 22, NW.

20, 21. (a) Etke ekkar etan jikin kwelok eo? (b) Ta kajitõk ko melele eo ad kin vision eo an Ezekiel ej kõmman menin ad kajitõkin kij make?

²⁰ Lale nan ko eliktata ilo kanan eo an Ezekiel: “Jen ran eo im wõnmanlok etan jikin kwelok eo enaj Jehovah Make Ebed Ijo.” (Ezekiel 48:35, NW) Jikin kwelok in ejamin bed ñan lelok kajur ñan armij ak kareelel; ak bed ijo ñan kabine jabdewõt men ankil an armij. Ej jikin kwelok eo an Jehovah, ej kalikar lemnak eo an, yokwe eo an, im wãwen kõmmanwa ko. (Jemes 3:17, NW) Menin ej letok ñan kij menin kamol eo jen okmãnãn in buru bwe Jehovah enaj kajerammõn ekkal eo an kin “lal eo ekãl” in jukjuk im bed eo an armij lok ñan loan juõn ilju eo ej indio.​—2 Piter 3:13.

²¹ Jejjab bwilõñ ke kin jerammõn in ebed imad? Inem, ejimwe, bwe kajjojo iad en kar kajitõk: ‘Ewi wãwen aõ uak ñan jerammõn ko remõn emwij kwaloki ilo vision eo an Ezekiel? Ij tiljek ke ilo aõ jurake jerbal eo overseer ro ewõr air yokwe rej kõmmane, ekoba bwen ri kabit ro im ro remaroñ erom uan class in iroij eo? Emwij ke aõ kõmman bwe kabuñ eo erreo en iolaplap in mour eo aõ? Ij bõk ke im kortokjen den in mour ko elap air tortok rainin?’ Kajjojo iad en etal wõt im kõmman eindein im lañliñ ilo menin letok ko an Jehovah rej ñan indio!

[Kamelele ko itulal]

Ewi Wãwen Am Naj Kar Uak?

◻ Ta eo den ko rej tortok jen temple eo rej pijaiki?

◻ Ta kemour eo Jehovah ear kõmmane ikijen river in kõkkar eo, im etke river eo ear laplok kobban?

◻ Ta eo wijki ko itõrerein river eo rar pijaiki?

◻ Ta eo jikin kwelok eo enaj pijaiki ilo ien Iroij eo ilo ien Millennium eo, im etke etan jikin kwelok eo ekkar?

[Pija ko ilo peij 21]

River in mour eo ej jutak ikijen menin letok eo an Anij kin lomor