“Eo Erik” Ear Erom “Juõn Tausan”
“Eo erik e naj juõn tausan, im eo e niñ juõn ailiñ e kajur.”—AISEIA 60:22.
1, 2. (a) Etke marok ej kalibubu lal in rainin? (b) Ewi wãwen meram eo an Jehovah ear wõnmanlok im tak ion armij ro an?
“MAROK e naj kalibubu lõl, im marok jiliñliñ, ro dri ailiñ ko; a Jeova e naj tak iom, im naj lo An aibujuij iom.” (Aiseia 60:2) Nan kein rejejjet an kwalok kin wãwen ko ilo lal in jen 1919. Christendom ear karmijeteik kakõlle eo kakõllan bed eo an Jesus Christ einwõt iroij, “maram im lõl” eo. (Jon 8:12; Matu 24:3) Kinke “elap an illu” Satan, eo eutiejtata ian “ro iroij in marok i lõl,” ebeben in kein ka20 kar ien eo elaptata an lej im lap an wõr jorrãn ie ilo bwebwenato in armij. (Reveles̃õn 12:12; Dri Epesõs 6:12) Enañin aolep armij rej bed ilo marok ilo jitõb.
2 Ak, meram ej romak wõt rainin. Aibujuij in Jehovah ej ‘tak’ ion ri karejar ro an, bwen ri kabit ro, ro ion lal rej binej jenkwon “kõra” eo ilañ. (Aiseia 60:1) Elaptata jen ien eo kar kõtlok ir jen air kamakoko ñan Babylon ilo 1919, rein rar kwalok aibujuij eo an Anij im rar kõmman bwe en ‘romak air maram iman mejen armij.’ (Matu 5:16) Jen 1919 ñan 1931, meram in Ailiñ eo ear romak lok ke rein rar jolok bwen kein lukluk in lemnak in Babylon ko. Orair ear laplok ñan elõñ ñoul thousand ke Jehovah ear kajejjet kitien kallimur eo an: “Ilo ejelok likjap I naj aintok kom otemjej Ri Israel ibben don, kom otemjej ro rej bed wõt. Ilo burukuk I naj likit ir, einwõt bwijin sheep ko ilo worwor eo air, einwõt juõn melaj eo eobrak kin bwijin sheep; kom naj lañliñ kinke eneo enemi enaj bar obrak kin armij.” (Micah 2:12, New World Translation) Ilo 1931, aibujuij an Jehovah ear alikar lok an tak ion armij ro an ke rar bõk ãt eo Ri Kennan ro an Jehovah.—Aiseia 43:10, 12.
3. Ewi wãwen ear alikar bwe meram eo an Jehovah enaj tak ion ro jet ijellokin ri kabit ro?
3 Aibujuij an Jehovah enaj tak ion bwen “bwij erik” eo wõt ke? (Luk 12:32) Jab. Ilo September 1, 1931, magazine in The Watch Tower ear jitõñlok ñan bar juõn kumi. Ilo juõn kamelele emõn kin Ezekiel 9:1-11, (NW), ear kwalok bwe emaan eo ewõr kein jeje ibben me eon kein rej konono kake ej pijaik bwen ri kabit ro. Wõn ro im “emaan” in ej kakõlleiki demair? “Sheep ro jet,” ro kejatdikdik eo air ej ñan mour indio ilo juõn paradise ion lal. (John 10:16, NW; Sam Ko 37:29) Ilo 1935 kar kile kumi in “sheep ro jet” bwe rej mõttan “jar elap . . . jen ailiñ otemjej” eo ri jilek John ear lo ir ilo juõn vision. (Reveles̃õn 7:9-14) Jen 1935 ñan kiõ, elap wõt air kar jerbal in aintok jar eo elap.
4. Wõn ro rej “kiñ ro” im “ro dri ailiñ ko” me Aiseia 60:3 ej konono kaki?
4 Kanan eo ilo Aiseia ear konono kin jerbal in aintok in ke ej ba: “Im ro dri ailiñ ko re naj itok ñõn maram eo am, im kiñ ro ñõn rabõlbõl in am tak.” (Aiseia 60:3) Wõn “kiñ” ro rej konono kake ijin? Bwen 144,000 ro me, ibben Jesus Christ, rej iroij ro ilo Ailiñ in lañ im rej tel ilo jerbal in kwalok nan. (Dri Rom 8:17; Reveles̃õn 12:17; 14:1) Rainin, oran “dri ailiñ ko,” ro me kejatdikdik eo air ej ñan mour ion lal im rar itok ñan ibben Jehovah ñan bõk nan in jiroñ ko im rej kir ro jet ñan air kõmman eindein, ej laplok jen jejjo wõt thousand bwen ri kabit ro.—Aiseia 2:3.
Ri Karejar ro Rekijejeto an Jehovah
5. (a) Ta mol ko rej kwalok bwe kijejeto eo an armij ro an Jehovah ejañin kar diklok? (b) Ailiñ ta ko kar wõr laplok ko rekabwilõñlõñ ilo 1999? (Lale chart eo ilo page 17-20.)
5 Elukkun lap kijejeto Ri Kennan ro an Jehovah ilo ran kein rar kwaloki ilo aolepen ebeben in kein karoñoul! Im meñe elaplok ijjibed ko, ear jab diklok kijejeto eo air ke ej ebaklok yiõ eo 2000. Ear lap air kaorõk kien in an Jesus: “Komin ilok, im kõmõn dri ailiñ ko otemjej bwe ren dri kalora.” (Matu 28:19, 20) Oran ri kwalok ro kin news eo emõn ilo yiõ in jerbal eo eliktata an ebeben in kein karoñoul ear tõbar juõn laplok ekãl in 5,912,492 ri kwalok ro. Rar kajerbal juõn joñan ekabwilõñlõñ kin 1,144,566,849 awa ko ñan konono ibben ro jet kin Anij im karõk ko an. Rar kõmman 420,047,796 bar jeblak ko ibben ro rar kwalok air itoklimo im rar katak Bible ilo ejelok wõnãn ibben 4,433,884 armij ro. Ej juõn record ekabwilõñlõñ kin jerbal eo ekijejeto!
6. Ta karõk eo ekãl kar kõmmane ñan pioneer ro, im uak et eo ear walok?
6 Ilo January ilo yiõ eo lok, Governing Body eo ear kõmman juõn kejelã kin juõn oktak in awa ko ñan pioneer ro. Elõñ rar kortokjen men in ñan deloñ ilo jerbal in regular ak auxiliary pioneer. Ñan wanjoñok, ilo alliñ ko emen jinoin 1999, ra eo ilo Netherlands rar bõk emen alen elõñlok in application ko ñan regular pioneer jen ilo ejja ien eo wõt ilo yiõ eo lok. Ghana ear report: “Jen ien eo ear jino jerbal mejenkajjik eo ekãl in awa ko, oran ro rej regular pioneer ear laplok wõt.” Ilo yiõ in jerbal eo ilo 1999, oran pioneer ro ibelakin lal ear tõbar 738,343—juõn wãwen ekabwilõñlõñ ñan kwalok ‘kijejeto ilo jerbal ko remõn.’—Taitõs 2:14.
7. Ewi wãwen Jehovah ear kajerammõn jerbal eo ekijejeto an ri karejar ro an?
7 Jehovah ear kajerammõn ke jerbal in ekijejeto? Aet. Ikijen Isaiah ej ba: “Kwon reiliñlok iturõm, im lo: ir otemjej rej kweloktok, rej itok ñõn ibõm; lõmaro nejõm re naj itok jen etolok, im limaro nejõm, re naj bõktok ir ilo peir.” (Aiseia 60:4) “Lõmaro nejõm” im “limaro nejõm” rekabit im emwij aintok ir rej jerbal wõt ilo kijejeto ñan Anij. Im kiõ, sheep ro jet an Jesus rej aintok ir ñan turin “lõmaro nejin” im “limaro nejin” rekabit an Jehovah ilo 234 ene ko im ailiñ ko ilo lojet.
“Jerbal Emõn Otemjej”
8. Ilo ‘jerbal emõn’ ta ko Ri Kennan ro an Jehovah rej kijejeto kaki?
8 Christian ro ewõr eddo eo ñan kwalok kin news eo emõn kin Ailiñ eo im ñan jibañ ro rej itoklimo ñan erom ri kalor ro. Ak “emwij kõkõmõnmõn [ir] ñõn jerbal emõn otemjej.” (2 Timote 3:17) Kin men in, ilo yokwe rej lale family ko air, kwalok karuwainene, im lolok ro renañinmij. (1 Timote 5:8; Dri Hibru 13:16) Im ro rej mõnõnõ in lelok ir make rej bõk kunair ilo jerbal ko einwõt ñan kalek Kingdom Hall ko—juõn jerbal me ej bareinwõt kwalok juõn ennan. Ilo Togo, elikin air kalek juõn Kingdom Hall, ro rej bõk eddon juõn kabuñ in charismatic ilo bukwon eo ear kõnan jelã etke Ri Kennan ro an Jehovah rar maroñ kalek em ko air make ak kabuñ eo air ear aikwij kõllã wõnãn ri jerbal ro ñan kõmman men in! Togo ej report bwe air kalek Kingdom Hall ko remõn im bin ear jelet ro ri turiir ilo emõn bwe jet armij rej kajeoñ in rent ak kalek moko imwiir ilo bukwon ko ijo renaj kar kalek kingdom hall ko ie.
9. Ri Kennan ro an Jehovah rar emmakit ilo wãwen ta ko ke ear walok jorrãn ko?
9 Jet ien, ebar wõr juõn kain jerbal emõn rej aikwij kõmmane. Ilo elõñ ene ko ilo yiõ in jerbal eo lok jorrãn ko rar walok, im ekkã an Ri Kennan ro an Jehovah bed ijo moktata ñan lelok jibañ. Ñan wanjoñok, elõñ jikin ko ilo Honduras rar jorrãn jen Hurricane Mitch. Ra eo ear mõkaj in kajutak committee ko ñan lale men ko rej aikwiji im kõmman karõk ko ñan lelok jibañ. Ri Kennan ro ilo Honduras im ilo elõñ ailiñ ko jet rar jabawõt kin nuknuk ko, mõñã ko, uno ko, im men ko jet rej aikwiji. Regional Building Committee ko rar kajerbal kabel ko air ñan bar kalek moko imõn armij. Ejjabto, kar jibañ ro jeid im jatid me rar jorrãn ñan bar jeblak ñan makitkit ko ekkã air kõmmani. Ilo Ecuador, ke juõn ibwijleplep ear kokkure jet moko, Ri Kennan ro an Jehovah rar itok in jibañ ro jeiir im jatiir im rar jorrãn. Elikin an lo wãwen eo ebolemen rar jerbale jorrãn ko, juõn ri utiej ilo kien ear ba: Elañe I maroñ kajerbal kumi in, I naj kõmman elõñ men in bwilõñ ko! Armij ro einwõt kom ren kar bed ilo aolepen mõttan ko ilo lal in.” Jerbal rot kein im remõn rej bõktok nebar ñan Jehovah Anij im ej men in kamol kin “jerbal in Anij eo ewõr tokjen kin men otemjej.”—1 Timothy 4:8, NW.
Rej “Kãki Einwõt juõn Kõro”
10. Meñe ej diklok oran ri kabit ro, etke etan Jehovah rej keañ kake einwõt ejañin kar walok jen mokta?
10 Jehovah ej kajitõk kiõ: “Wõn rein rej kãki einwõt juõn kõro, im einwõt muli ko ñõn windo ko air? Emol ailiñ ko redrik re naj kõtar Iõ, im wa ko an Tarshish mokta, bwe ren ektõktok lõmaro nejõm jen etolok . . . Im ro drua maijet re naj kalek worwor ko am, im kiñ ro air re naj korijer ñõn yuk.” (Aiseia 60:8-10) Ro mokta ñan emmakit ñan ‘tak’ eo an Jehovah kar “lõmaro nejin,” Christian ri kabit ro. Inem ear itok “ro drua maijet,” jar eo elap, ro rej karejar ilo tiljek ñan ri kabit ro jeiir im jatiir, im lor tel eo air ñan kwalok kin news eo emõn. Kin men in, meñe oran ri kabit ro ej diklok, etan Jehovah rej keañ kake ibelakin lal einwõt ejañin kar walok jen mokta.
11. (a) Ta eo ej wõnmanlok wõt im kin tokjen ta eo ear walok ilo 1999? (b) Ailiñ ta ko kar wõr oran ko rekabwilõñlõñ kin ro rar baptais ilo 1999? (Lale chart eo ilo page 17-20.)
11 Tokjen men in, elõñ million rej kãtok “einwõt muli ko ñõn windo ko air,” im lo jikin kone iloan congregation an Christian ro. Kajjojo yiõ elõñ buki thousand rej koba ibbed, im ial eo ej bellok wõt ñan bar elõñ. Isaiah ej ba: “Aur ko am re naj bellok ien otemjej; jamin kilik ran ak boñ; bwe armij ren bõktok ñõn kwe mweiuk ko mweien ro dri ailiñ ko.” (Aiseia 60:11) Ilo yiõ eo lok 323,439 armij rar baptais ñan kakõlleik wujleplok eo air ñan Jehovah, im ejañin kar kilike worwor ko. “Men ko remõn jen ailiñ ko otemjej,” ro uan jar eo elap, rej deloñ tok wõt iloan. (Haggai 2:7, NW) Rejjab kajeblak jabdewõt eo ekõnan ilok jen marok. (Jon 12:46) Kejatdikdik bwe aolep rein re ban luji kamolol eo air kin meram!
Kwalok Beran ilo Jelmae Jumae
12. Ewi wãwen ro rej yokwe marok rar kajeoñ in kune meram eo?
12 Ro rej yokwe marok rej dike meram eo an Jehovah. (Jon 3:19) Jet remaroñ kajeoñ in kune meram in. Jej aikwij kõtmene men in. Meñe Jesus, “Eo Maram emol, ej kamaram armij otemjej,” rar kajirere kake, jumae, im eliktata ri ailiñ eo an rar mõn e. (Jon 1:9) Ilujen ebeben eo kein ka20, Ri Kennan ro an Jehovah bareinwõt kar kajirere kake ir, kalbuji, im kemo jerbal eo air, im mõn ir, ke rar kwalok ilo tiljek meram eo an Jehovah. Ilo yiõ ko kiõ, ri kijirãt ro rar kajededlok riap ko ilo news kin ro rej kwalok kin meram an Anij. Jet rekõnan kõmman bwe armij ren tõmak bwe Ri Kennan ro an Jehovah rekauwatata im rej aikwij kõmman joñan ak kemo jerbal eo air. Ri jumae rein rar lo ke tõbrak?
13. Ta tokjen eo ear walok jen ad kwalok mol ko ilo jelã kilen ikijen jerbal eo ad ñan jikin news ko?
13 Jab. Ijo ekkar, Ri Kennan ro an Jehovah rar kebak jikin news ko ñan kamelele kin mol ko. Tokjen men in, etan Jehovah kar konono kake ilo newspaper ko im magazine ko im ilo radio im television. Men in ear wõr tokjen ko remõn ilo jerbal in kwalok nan. Ilo Denmark, ñan wanjoñok, juõn program ilo TV ear jerbale katak eo “Etke tõmak eo an Ri Dane ro ej diklok?” Ibben ro jen kabuñ ko jet, rar interview Ri Kennan ro an Jehovah. Tokelik, juõn kõrã eo ear aluije program eo ear ba: “Ear alikar wõn eo jitõb an Anij ear bed ibbeir.” Lio ear jino an katak Bible eo.
14. Ñan liãjlol eo air, ta eo ri jumae ro rej aikwij kile kake?
14 Ri Kennan ro an Jehovah rej jelã bwe elõñ ilo lal in renaj jumae ir. (Jon 17:14) Ak, rej bõk wõt kakajur jen nan in kanan eo an Aiseia: “Im ro nejin ro rar kejorran yuk re naj itok im barikrik ñõn kwe; im ro otemjej rar kejekron yuk re naj mõjir iturin neõm, im re naj naetõm, Jikin kwelok an Jeova, Zaion eo an Dri Kwojarjar in Israel.” (Aiseia 60:14) Ilo lelñoñ, ri jumae ro ejjabto renaj aikwij kile bwe rar, ilo juõn wãwen, tarinaik Anij make. Wõn eo emaroñ anjo ilo juõn tarinae rot in?
15. Ewi wãwen Ri Kennan ro an Jehovah rej “ninnin milk an ro dri ailiñ ko,” im ewi wãwen rar kwalok men in ilo jerbal in katakin im kwalok nan eo air?
15 Jehovah ej bar kallimur: “I naj kõmõn yuk juõn men emõn potata ñõn in drio . . . Im kwo naj ninnin milk an ro dri ailiñ ko, im naj ninnini tin kiñ ro; im kwo naj jela bwe Ña, Jeova, Ij am Dri Lomor.” (Aiseia 60:15, 16) Aet, Jehovah ej Ri Lomor eo an armij ro an. Elañe rej liki e, renaj bed “ñõn in drio.” Im renaj “ninnin milk an ro dri ailiñ ko,” ilo air kajerbal men ko rej bellok ñan ir ñan kowõnmanlok kabuñ eo emol. Ñan wanjoñok, air kajerbal ilo meletlet jelãlokjen kin computer im communication ko rej kabidodolok air maroñ kõmman magazine in Imõniaroñroñ ilo 121 kajin ko ilo ejja ien eo wõt im Awake! ilo 62. Juõn kain computer software program kar eiki ñan jibañ ir ukõte New World Translation ilo kajin ko rekãl, im jerbal in ukok rot in ej bõktok lañliñ. Ke Christian Greek Scriptures ilo kajin Croatia ear walok ilo 1999, ear toor mejen elõñ thousand armij kin air mõnõnõ. Juõn brother eritto ear ba: “Etto aõ kar kõttar Bible in. Kiõ I maroñ mij ilo ainemõn!” Jaketo-jaketak in New World Translation, ilo eyu in ak mõttan in, ear le jen 100 million ilo 34 kajin ko.
Kien Mour Erreo Eutiej
16, 17. (a) Meñe ebin, etke eaorõk bwe jen kejbãrok kien ko reutiej an Jehovah? (b) Experience ta eo ej kwalok bwe ro redik remaroñ bõprae an lal in katton ir?
16 Jesus ear ba: “Bwe jabrewõt eo ej kõmõnmõn nana ej kijirãte maram.” (Jon 3:20) Ijo tu-rãjet, ro rej bed ilo meram rej yokwe kien ko reutiej an Jehovah. Jehovah, ikijen Isaiah, ej ba: “Armij otemjej am re naj wãnik.” (Aiseia 60:21a) Emaroñ juõn aitwerõk elap ñan kejbãrok kien ko rewãnik ilo juõn lal ijo mour in lũñ, riap, ankwonak, im utiej buru elap an jededlok. Ñan wanjoñok, ilo jet ene ko, economy ko rej laplok im ebidodo air mad in jibadõk mweiuk. Bõtab, Paul ear kakkõl: “A ro re kanuij kõnan bwe ren dri mweie, re buñ ilo kabo im oujir im elõñ mõm ko re bwebwe im nana, rej kamaloñ armij im kokkure ir ilo jikin joko.” (1 Timote 6:9) Ej juõn jerata elap ñe juõn armij ej kamad e make kin makitkit ko an business im ej kajekdon men ko emol air aorõk, einwõt koba ibben Christian ro mõttan, jerbal ko rekwojarjar, kien ko kin mour erreo, im eddo ko an family eo!
17 Kejbãrok kien ko rewãnik emaroñ lap an bin ñan ro redik, ke elõñ ro dettan wõt ir rej bõk uno ko rekajur im kõmman mour in lũñ. Ilo Suriname, juõn ladik ewõleo ear kebak juõn ledik 14-yiõ dettan ilo school im kajitõk elañe emaroñ babu ibben. Ledik eo ear makoko, im ear kameleleik e bwe Bible eo ej kemo men rot kein elañe rejañin mare. Ledik ro jet ilo school eo rar kajirere kake e im rar kajeoñ in jibed e ñan ukõt lemnak eo an, rar ba bwe aolep rar kõnan babu ibben ladik eo. Ak ledik eo ear jutak bin ilo bebe eo an. Jet week ko tokelik, doctor ro rar lo bwe ladik eo ear wõr nañinmij in HIV (nañinmij eo ej oktaklok ñan AIDS) ibben im ear lukkun nañinmij. Ledik eo ear mõnõnõ bwe ear bokake kien eo an Jehovah ñan ‘kejbãrok kom jen lũñ.’ (Jerbal 15:28, 29) Ri Kennan ro an Jehovah rej utiej buru kin ro redik ibwiljiir me rej jutak bin kin men ko rejimwe. Tõmak eo air, im eo an ro jemeir im jineir, ej ‘kaibujuij’—bõktok nebar ñan—etan Jehovah Anij.—Aiseia 60:21b.
Jehovah Ear Kõmmane Laplok eo
18. (a) Ta men eo elap Jehovah ear kõmmane ñan armij ro an? (b) Ewõr men in kamol et eo bwe renaj wõnmanlok im laplok, im kejatdikdik ta eo eaibujuij ej kõttar ro rej bed wõt ilo meram?
18 Aet, Jehovah ej kotak meram ion armij ro an, kajerammõn ir, tel ir, im kakajurlok ir. Ilo ebeben eo kein ka20, rar lo jejjet in kitien nan ko an Aiseia: “Eo erik e naj juõn tausan, im eo e niñ juõn ailiñ e kajur; Ña Jeova I naj bikbikri ilo ien eo an.” (Aiseia 60:22) Jen jejjo wõt ilo 1919, “eo erik” ear erom elõñlok jen “juõn tausan.” Im ejañin bõjrak laplok eo! Ilo yiõ eo lok 14,088,751 rar bed ilo Kwojkwoj in Kememej mij eo an Jesus. Elõñ iair rar jab Ri Kennan ro rekijejeto. Jej mõnõnõ bwe rar bed ilo kwojkwoj in eaorõk, im jej rejañ ir bwe ren emmakit lok ñan meram eo. Jehovah ej romak wõt ion armij ro an. Kejam eo ñan dolul eo an ej bellok wõt. Inem, jen aolep bebe ñan bed wõt ilo meram eo an Jehovah. Men in ej walok ilo jerammõn ko relap ñan kij kiõ! Im enaj bõktok elap lañliñ ilo ran ko renaj itok ñe men in kõmanmõn otemjej renaj nebar Jehovah im lañliñ ilo aibujuij eo an ekabwilõñlõñ!—Reveles̃õn 5:13, 14.
Kwomaroñ ke Kamelele?
• Wõn ro rar kwalok aibujuij an Jehovah ilo ran kein eliktata?
• Ta eo ej kwalok bwe kijejeto eo an armij ro an Jehovah ejañin diklok?
o• Ta jet ian jerbal ko remõn me Ri Kennan ro an Jehovah rej boub kaki?
• Meñe jej jelmae elap jumae, jej liki kin ta eo?
[Jaat ilo peij 17-20]
1999 SERVICE YEAR REPORT OF JEHOVAH’S WITNESSES WORLDWIDE
(See bound volume)
[Pija eo ilo peij 15]
Armij rej itok wõt ñan dolul eo an Jehovah
[Pija eo ilo peij 16]
Jej mõnõnõ bwe Jehovah ear kõmman bwe en bellok wõt kejam eo ñan ro rej yokwe meram