‘O Anij, Jilkintok Meram Eo Am’

“O Anij, jilkintok meram eo am im mol eo am, men kein make ren tel iõ.”—PSALM 43:3, New World Translation.

1. Ewi wãwen an Jehovah kwalok karõk ko an?

JEHOVAH ej lukkun joij kin wãwen eo ej kõmmane karõk ko an ro ri karejaran rejelã kaki. Jen an kalikar mol eo ilo juõn wõt ien einwõt meram eo elap an tamtam, ej jidik kake ilo an kameramlok kij. Ralokin etetal eo ad ilo ialin mour eo jemaroñ keidi ñan juõn etetal eo eaetok juõn ri etetal ej wanlallok ie. Ej jino jen ke ej jibboñ wõt im jidik wõt an lolokjen. Ke jidik wõt an al jino taklõñtak ion aejet, ri etetal eo ej maroñ kile jejjo men ko ibelakin. Men ko jet itulik lok ejaad tab an loi. Ak ke al ej etal wõt im takliñtak, eaetoklok an maroñ lo kõtan eo ettoloklok. Eindein kin meram in jitõb eo Anij ej letok. Ej kõtloktok ñan kij jejjo men ko ilo juõn ien. Nejin Anij, Jesus Christ, ear letok jelã eo ilo jitõb ilo juõn wãwen eo einlok wõt. Jen etale wãwen an kar Jehovah kejelãik armij ro an ilo ien ko etto im wãwen an kõmman eindein rainin.

2. Ewi wãwen an kar Jehovah lelok ejelok kalijeklok ilo ien ko an Christian ro jinoin?

² Ro rar ejaake 43 Sam bõlen kar ro nejin Korah. Ke rej ri Livai, rar bõk kajerammõn ñan katakin armij ro kin Kien eo an Anij. (Malachi 2:​7, NW ) Bwebõta, Jehovah kar Ri Katakin eo air Elap, im rar reilok ñan e einwõt Unjen meletlet otemjelok. (Aiseia 30:20) “O Anij, . . . jilkintok meram eo am im mol eo am,” ri jeje Sam ear jar. “Men kein make ren tel iõ.” (Psalm 43:​1, 3, NW ) Toan wõt an kar ri Israel ro tiljek ñan e, Jehovah ear katakin ir ial ko an. Ilo ebeben ko tokelik, Jehovah ear kajerammõn ir kin meram im mol in juõn men eo ekabwilõñlõñ. Anij ear kõmman eindein ke ear jilkintok Nejin ñan lal in.

3. Ilo wãwen et eo katak eo an Jesus ear melejoñe ri Jew ro?

³ Einwõt armij eo Jesus Christ, Nejin Anij kar “maram in lõl.” (Jon 8:​12) Ear katakin armij ro “elõñ men ko kin parebõl ko”​—men ko rekãl. (Mark 4:​2, NW ) Ear jiroñlok Pontius Pilate: “Ailiñ eo aõ e jab jen lõl in.” (Jon 18:36) Menin kar juõn lemnak ekãl ñan juõn ri Rom im emol ñan armij in ri Jew ro, bwe rar lemnak Messiah eo enaj kar kõttãik ailiñ in Rom im kajeblak Israel ñan aibujuij eo an mokta. Jesus ear kwalok meram eo jen Jehovah, ak nan ko an rar jab kamõnõnõik iroij ro an ri Jew ro, ro “rej yokwe nebar an armij elap jen nebar an Anij.” (Jon 12:42, 43) Elõñ wõt ian armij ro rar kãlet air eddeb wõt ñan manit ko an armij jen air bõk meram in jitõb eo im mol eo jen Anij.​—Psalm 43:​3, NW; Matu 13:15.

4. Ewi wãwen ad jelã bwe ri kalor ro an Jesus renaj kar etal wõt im eddeklok ilo jelãlokjen?

⁴ Bõtab, jejjo ro emol burueir maan im kõrã rar bõk ilo air lañliñ kin mol eo Jesus ear katakin kake. Rar wõnmanlok wõt ilo melele eo air kin karõk ko an Anij. Bõtab, ke jemlokin mour eo an ri Kaki eo air ion lal ear ebaktok, ear lõñ wõt men ñan air katak. Jesus ear jiroñ ir: “Bar elõñ men ko iba bwe In ba ñõn kom, a kom jab maroñ in bõki kiõ.” (Jon 16:12) Aet, ri kalor ro renaj kar etal wõt im eddeklok ilo melele kin mol eo an Anij.

Meram eo ej Etal wõt im Romak

5. Ta kajitõk eo ear jarjar ilo ebeben eo kein kajuõn, im wõn eo ear bed eddo eo ibben ñan kõmman mejelan?

⁵ Elikin an Jesus mij im jerkakbiji, meram eo jen Anij ear romak im laplok an meram jen mokta. Ilo juõn vision eo ear lelok ñan Peter, Jehovah ear kalikar bwe ri Gentile ro rar jab mwijmwij remaroñ kar oktak im ri kaloran Christ. (Jerbal 10:​9-​17) Menin kar juõn menin kalikar! Mekarta, juõn kajitõk ear walok tokelik: Jehovah ear aikwiji ke an ri Gentile rein aikwij mwijmwij elikin air oktak im Christian? Kajitõk in ear jab wõr uak in ilo vision eo, im wãwen eo ear oktak im juõn menin konono ekakijeekek ibwiljin Christian ro. Ear aikwij kõmman mejelan, elañe jaab inem burukuk eo air eaorõk renaj kar rupe. Kin menin ilo Jerusalem, “ro dri jilik im elder ro rej kweloklok bwe ren bebe kin men in.”​—Jerbal 15:​1, 2, 6.

6. Ta kilen eo ri jilek ro im maan ritto ro rar lore ke rar lemnak kin kajitõk eo kin mwijmwij?

⁶ Ewi wãwen an ro rar bed ilo kwelok eo maroñ kar beek ankilan Anij ñan ri Gentile ro rej tõmak? Jehovah ear jab jilkinlok juõn enjel bwe en tel ilo konono ko, im ear jab kwalok juõn vision ñan ro rar bed ie. Ak, ri jilik ro im maan ro reritto ilo jitõb rar jab likit ir im ejelok air ialin tel. Rar lemnak kin nanin kamol eo jen jet Christian ri Jew ro rar lo wãwen an Anij kar jino jerbal ibben armij in ailiñ ko, lutõklok jitõb kwojarjar eo an ion ri Gentile ro rar jab mwijmwij. Rar bareinwõt etali Jeje ko ñan ialin tel. Tokjen menin, ri jilek James ear kõmmane juõn an ennan eo ear bedbed ion jeje ko rekameramram. Ke rar etale menin kamol eo, ankilan Anij ear etal im alikar. Ro jen ailiñ ko rar jab aikwij mwijmwij ñan air lañliñ kin buñburu eo an Jehovah. Ri jilek ro im maan ro reritto ilo jitõb rar jab jerwane ien ilo air mõkaj in likit bebe eo air bwe en maroñ tel Christian ro mõttair.​—Jerbal 15:12-​29; 16:4.

7. Ilo wãwen et eo Christian ro ilo ebeben eo kein kajuõn rar wõnmanlok ie?

⁷ Ilo air jab einwõt ri tel ro an kabuñ in ri Jew ro, ro rar debij wõt manit ko an ro jimmair, elõñ wõt ian Christian ri Jew ro rar lañliñ ke rar bõk jelãlokjen in ekãl im emõn kin karõk eo an Anij ikijen armij in ailiñ ko, meñe ilo air bõke ear aikwiji juõn oktak in lemnak ikijen armij in ri ailiñ ko. Jehovah ear kajerammõn jitõb in ettã buru eo air, im “congregation ko rar wõnmanlok wõt ilo air kabini ilo tõmak eo im ñan kalõñlok orair jen ran ñan ran.”​—Acts 15:31; 16:​5, NW.

8. (a) Ewi wãwen ad jelã bwe rar maroñ watõk an laplok meram elikin an ebeben eo kein kajuõn itok ñan jemlokin? (b) Ta kajitõk ko ewõr tokjeir jenaj etali?

⁸ Meram in Jeje ko ear etal wõt im romak ilo aolepen ebeben eo kein kajuõn. Ak Jehovah ear jab kalikar ilo tibdikin karõk ko an ñan Christian ro jinoin. Ri jilek Paul ear jiroñlok ri tõmak ro mõttan ilo ebeben eo kein kajuõn: “Bwe kiõ jej lo ilo kapjur etnar ikijen juõn kilas aen.” (1 Corinthians 13:​12, NW ) Kilas rot in ear jab emõn an romak iaejetlok. Inem, ilo jinoin, melele kin meram eo ilo jitõb enaj kar wõr joñan. Elikin an mij ri jilek ro, meram eo ear etal im tũnar iumin jidik ien, ak ilo ien kein kiõ jelãlokjen eo ilo Jeje ko emwij an oktak im lap. (Daniel 12:​4, NW) Ewi wãwen an Jehovah kejelãiklok armij ro an rainin? Im ewi wãwen ad aikwij uak ñe ej kalaplok jelãlokjen eo ad kin Jeje ko?

Meram eo ej Etal wõt im Meramlok

9. Ta kilen eo ejeja im bolemen kin katak Bible Ri Katak Bible ro jinoin rar kajerbale?

⁹ Ilo ien kein kiõ romak eo jinoin emol in meram eo ear ijjino ilo quarter eo kein kajuõn in ebeben eo kein kajoñoul ratimjuõn ke juõn kumi in Christian maan im kõrã ro ear jino juõn kõnan ñan katak kin Jeje ko. Rar ejaake juõn kilen eo emõn ñan katak Bible. Juõn ej kwalok juõn kajitõk; inem kumi eo enaj etale aolep eon ko rej kwalok kake ilo Jeje ko. Ñe juõn eon ilo Bible eo ear einwõt idaptõk ibben eo juõn, Christian rein remol rar kajeoñ kakwon eon kein ruo. Ilo air jab einwõt ri tel ro an kabuñ ilo ran ko, ri School in katak Bible ro (kar jelã kake ir einwõt Ri Kennan ro an Jehovah) rar beek ñan air kõtlok Jeje ko Rekwojarjar, jab manit ak tõmak ko ejaak in armij, bwe ren air ri tel. Elikin air etale aolep menin kamol eo ewõr ilo Jeje ko, rar kõmmane juõn lokbook in jemlok ko air. Ilo wãwen in jelãlokjen eo air kin elõñ nanin kaiñi ko rej bedbed ion Bible ear alikar.

10. Ta menin jibañ ko rar jibañ ñan katak Bible Charles Taze Russell ear jei?

¹⁰ Eo ear jenolok an emõn ibwiljin ri School in Bible ro kar Charles Taze Russell. Ear je jiljino book ko ñan katak Bible im title in kar Katak ko ilo Jeje ko. Brother Russell ear karõk ñan an je book eo kein kajiljilimjuõn, eo ear kameleleik Bible eo ilo book in Ezekiel im Revelation. “Jabdewõt ien ij lo key eo,” ear ba, “I naj je Volume eo kein kajiljilimjuõn.” Bõtab, ear kobaiktok: “Elañe Iroij ej lelok key eo ñan bar juõn, e maroñ je.”

11. Ta ekkeitak eo ewõr ikõtan joñan ien im melele eo ad kin karõk ko an Anij?

¹¹ Ennan in lok iman jen C. T. Russell ej kalikar juõn mol eo elap tokjen ilo maroñ eo ad ñan melele jet ial ko ilo Bible​—karõk in ien. Brother Russell ear jelã bwe ear jab maroñ iuni meram eo ñan an romak ion book in Revelation elaplok jen an juõn ri etetal eo eaetok an etetal maroñ kõmman bwe al en taklõñtak mokta jen ien eo emwij karõk ñan an tak ie.

Kalikare​—Ak ilo Ien eo an Anij

12. (a) Ñããt eo emõntata melele ie kin kanan in Bible? (b) Ta joñok eo ej kwalok bwe maroñ eo ad ñan melele kanan in Bible ej atartar ion kõrkan ien ko an Anij? (Lale footnote eo.)

¹² Ejja einwõt an ri jilek ro kar melele elõñ kanan ko kin Messiah eo elikin wõt mij im jerkakbiji eo an Jesus, Christian ro rainin remelele kin kanan eo ilo Bible ilo tibdikin eo emõntata elikin wõt an kar jejjet kitien. (Luk 24:15, 27; Jerbal 1:​15-​21; 4:​26, 27) Revelation ej juõn book in kanan, inem jej aikwij watõk ñan an lukkun lap ad melele kake ke wãwen ko ej kwalok kaki rej bellok. Ñan wanjoñok, C. T. Russell ejamin kar maroñ jimwe an jelã melelen kõkõllen kidu awia eo eijurjur-unokan rej kwalok kake ilo Revelation 17:​9-​11, ke dolul ko me kidu in ej jutak ikijir, etan, League of Nations im United Nations, rar jab bed mae ien elikin mij eo an.a

13. Ta eo jet ien ej walok ñe meram ej romak ion juõn unintel ilo Bible?

¹³ Ke Christian ro jinoin rar katak bwe ri Gentile ro rejañin mwijmwij rar maroñ oktak im ri tõmak ro mõttair, oktak in ear tellok ñan juõn kajitõk ekãl kin aikwij eo ñan armij in ailiñ ko bwe ren mwijmwij. Menin ear kamakit ri jilek ro im maan ritto ro ilo jitõb ñan air etale aolepen menin konono in kin mwijmwij. Ejja joñok in wõt ej mol rainin. Juõn meram eo eromak in meram eo ion juõn menin konono ilo Bible jet ien ej tellok ñan ri kabit ro ri karejaran Anij, “dri korijer e tiljek im meletlet,” ñan an bar etale menin konono ko ewõr kõtair ñan don, einwõt an wanjoñok in tok ilokan ilo ran kein kalikare.​—Matu 24:45.

14-16. Ewi wãwen an kar juõn kajjimwe ilo lemnak eo ad kin temple eo ilo jitõb jelet melele eo ad kin Ezekiel chapter 40 ñan 48?

¹⁴ Ilo 1971 juõn kamelele in kanan eo an Ezekiel rar je ilo book eo “The Nations Shall Know That I Am Jehovah”​—How? (Ailiñ ko Renaj Jelã Bwe Ña Jehovah​—Ewi Wãwen?) Juõn chapter ilo book in ej konono ilo tukaduin vision eo an Ezekiel kin juõn temple. (Ezekiel, chapter 40-​48) Ilo ien eo, men eo rar kalimjeklok kar wãwen an naj kar jejjet kitien temple in vision eo an Ezekiel ilo lal eo ekãl.​—2 Piter 3:​13.

¹⁵ Bõtab, ruo katak ko rar jei ilo Imõniaroñroñ eo an December 1, 1972, ear jelet melele eo ad kin vision eo an Ezekiel. Rar konono kin temple eo elap ilo jitõb ri jilek Paul ear kwalok kake ilo Hebrews chapter 10. Watchtower in ear kamelele bwe loan ijo Ekwojarjar im melaj eo itulowa in temple eo ilo jitõb ear jitõñlok ñan wãwen eo an ri kabit ro ke rej bed wõt ion lal. Ke rar etale Ezekiel chapter 40 ñan 48 ilo yiõ ko tokelik, rar melele kake bwe einwõt an temple eo ilo jitõb jerbal rainin, eindein temple eo Ezekiel ear lo ilo vision eo ej bareinwõt aikwij jerbal rainin. Ewi wãwen?

¹⁶ Ilo vision eo an Ezekiel, rej lo an priest ro makitkit ilo melan temple eo ke rej jerbal ñan bwij ko rejjab bwijin priest. Alikar priest rein rej jutak kin jerbal in “pris ro im iroij ro,” ri kabit ro ri karejaran Jehovah. (1 Piter 2:9) Bõtab, rejamin jerbal ilo melan temple eo ijin ion lal iumin Thousand Yiõ ko in an Christ Iroij. (Reveles̃õn 20:4) Elap wõt ijo ilo tõre en, elañe ejjab aolepen, ri kabit ro renaj karejar ñan Anij ilo temple eo ilo jitõb ijo Kwojarjar Otem Kwojarjar, “a iloan lõñ eo.” (Dri Hibru 9:​24) Ke rej lo an priest ro ilok ñan melan ko ilo temple in ilo Ezekiel, vision in ej walok an jejjet kitien rainin, ke jet ian ri kabit ro rej bed wõt ion lal. Ekkar ñan menin, magazine eo an March 1, 1999, ear kwalok juõn lemnak in kajimwe kin un in. Eindein, ej alikar lok ñan jemlokin ebeben eo kein ka 20, meram eo ilo jitõb ear romak ion kanan eo an Ezekiel.

Mõnõnõ in Kajimwe Lemnak eo Am

17. Ta kajjimwe ko emwij am kõmmani ilo lemnak eo am jen ke kwar itok ñan juõn jelãlokjen in mol eo, im ewi wãwen an wõr tokjeir ñan yuk?

¹⁷ Jabdewõt eo ej kõnan itok ñan juõn jelãlokjen eo kin mol eo ej aikwij mõnõnõ in “kajibokwe lemnok ko otemjej ñõn bokake Kraist.” (2 Dri Korint 10:5) Menin ejjab bidodo ien otemjej, elaptata ñe ej kajur lemnak ko air kin jet men ko. Ñan wanjoñok, mokta jen katak mol eo an Anij, kwomaroñ kar mõnõnõ in kememej jet ran in kakije ko an kabuñ ibben family eo am. Elikin am kar jino katak Bible, kwar kile bwe kemem kein rej lukkun unjen pagan. Ilo jinoin, kwomaroñ kar jab kõnan jerbale men eo kwar katak. Bõtab, eliktata, yokwe eo ñan Anij ear kamol an kajurlok jen lemnak ko an kabuñ, im kwar bõjrak jen am bõk kunam ilo kemem ko rejjab kamõnõnõik Anij. Jehovah ear jab kajerammõn yuk ke kin bebe eo am?​—Keidi Hibru 11:25.

18. En ewi wãwen ad aikwij emmakit ñe jelãlokjen eo ad kin mol eo ilo Bible ej alikar?

¹⁸ Ien otemjej jej bõk tokjen jen ad kõmmani men ko ilo wãwen eo an Anij. (Aiseia 48:17, 18) Inem ñe lemnak eo ad kin juõn ennan eo ilo Bible rej kalikarlok, jen lañliñ ilo ad kowõnmanlok mol eo! Emol, ad etal wõt ñan ad jab kalijeklok menin ej kamol bwe jej bed ion ial eo ejimwe. Ej “ial an ro dru wãnik ej einwõt maram ilo ien rantak, eo ej maramlok wõt ñõn ran e wãppen.” (Jabõn Kennan Ko 4:​18) Emol, ilo tõre in jej lo jet wãwen ko in karõk eo an Anij “ilo lajrak eo ekabwokbwok.” Ak ñe enaj jũkrõktok ien eo an Anij, jenaj lo mol eo ilo aolepen wãwen aibujuij in, elañe nee ko need rar bed wõt im bin ilo air kar kalbwini ion “ial eo.” Ilo kõtan in manlok, jen jab bwok ilo mol ko Jehovah ear kalikari, kõttar wõt ilo jab kalijeklok ion men ko rejañin lukkun alikar.

19. Ta juõn wãwen eo ñan kalikar bwe jej yokwe mol eo?

¹⁹ Ewi wãwen ad maroñ kalikar yokwe eo ad kin meram eo ilo juõn wãwen eo emõn? Juõn wãwen ej ilo ar ekkeini konono Nanin Anij​—ran otemjej elañe emaroñ. Kwoj lor ke juõn program in ekkeini konono Bible? Imõniaroñroñ im Awake! magazine ko rej bareinwõt letok ñan kij juõn mõñã eo elap im emõn ilo jitõb ñan lañliñ kake. Bareinwõt, lemnak, kin book ko, brochure ko, im publication ko jet ko emwij keboji ñan tokjen eo ñan kij. Im ta kin report ko rej kakajur kij kin makitkit in jerbal in kwalok nan eo kin Ailiñ eo me emwij jei ilo Yearbook eo an Ri Kennan ro an Jehovah?

20. Ta ekkeitak eo ewõr ikõtan meram im mol eo jen Jehovah im ilo ad bed ilo kwalok ko an Christian?

²⁰ Aet, Jehovah ilo juõn wãwen eo emõn ej uak jar eo ej walok ilo Psalm 43:​3 (NW). Ilo jemlokin eon in, jej konono: “O Kwon jilkintok Am maram im mol, ren tel iõ; ren kõtõbar iõ ñõn am tel in kwojarjar, im imõn kaber ko Am.” Kwoj reimanlok ke ñan am kabuñ ñan Jehovah, kobalok ibben juõn jarlepju in armij ro jet? Nanin tel eo ilo jitõb rej letok ilo ien kwelok ko ad ej juõn wãwen eo elap tokjen Jehovah ej letok ñan jab kõmman kalijeklok ilo rainin. Ta eo jemaroñ kõmmane ñan kamũlallok kamolol eo ad kin kwelok ko an Christian? Kemij kir yuk ñan am etale unintel in ilo jar ilo katak in tok ilokan.

[Kamelele eo itulal]

Kwomaroñ Ke Uak?

• Etke an Jehovah kwalok karõk ko an ej wõnmanlok wõt?

• Ewi wãwen an kar ri jilek ro im maan ritto ro ilo Jerusalem namejelan menin konono eo kin mwijmwij?

• Ta kilen eo kin katak Bible Ri School in Bible ro jinoin rar bõke, etke ear juõn men eo einjuõn?

• Kameleleik wãwen an meram eo ilo jitõb walok ilo ien eo an Anij.

[Pija ilo page 10]

Charles Taze Russell ear jelã bwe meram enaj kar romak ion book in Revelation ilo ien eo an Anij