Jerammõn Ñan Ro Rej Lelok Aibujuij Ñan Anij

“Re naj itok im kabuñ imam, O Iroij [Jehovah], im re naj kaibujuij etõm.”​—SAM 86:9.

1. Etke jemaroñ lelok aibujuij ñan Anij ñan joñan eo elaplok jen men in kõmanman ko rejjab mour?

JEHOVAH ej tellokin bõk nebar jen men in kõmanman ko an otemjej. Meñe men in kõmanman ko an rejjab mour rej kaibujuij e ilo ejelok ainikien, kij armij ewõr maroñ eo ibbed ñan kõmmanwa, lolokjen, kamolol, im kabuñ. Inem, ri jeje sam ear ba ñan kij: “Komin lamij ñõn Anij kin lõñliñ, aolepen lõl. Komin al im kwalok an etan aibujuij; kaibujuij im nebar E.”​—Sam 66:​1, 2.

2. Wõn ro rar uake kien eo ñan lelok aibujuij ñan etan Anij, im etke?

² Enañin aolep armij ro rej makoko in kile Anij ak lelok aibujuij ñan e. Bõtab, ilo 235 ene ko, elõñlok jen jiljino million Ri Kennan ro an Jehovah rej kwalok bwe rej lo “men ko an” Anij ilo men ko ear kõmanmani im “roñ” ilo ejelok nan ak ainikien kin an men in kõmanman ko kennan kin E. (Dri Rom 1:​20; Sam 19:​2, 3) Ilo air katak Bible eo, rar bareinwõt jelã kajjen im yokwe Jehovah. Sam 86:​9, 10 ear kanan lok iman: “Ro dri ailiñ ko otemjej, Kw’ar kõmõnmõn ir, re naj itok im kabuñ imam, O Iroij [Jehovah], im re naj kaibujuij etõm. Bwe Kwe kwo laplap, im Kwoj kõmõn men in bwilõñ ko; Kwe wõt kwo Anij.”

3. Ewi wãwen an “jar eo elap” kabuñ ñan Anij “ran im boñ”?

³ Ilo ejja wãwen in lok wõt Reveles̃õn 7:9, 15 ej kwalok kin juõn “jar elap” in ri kabuñ ro “rej korijer ñõn [Anij] ran im boñ ilo tempel eo An.” Ejjab melelen bwe Anij ej jibed ri karejar ro an bwe ren nebar e im jab kakije, bõtab ri kabuñ ro an rej bed ilo juõn dolul ej bed ibelakin lal. Inem ñe ej boñ ilo ene ko jet, ri karejar ro an Anij ilo ene ko jet rej boub in kwalok nan. Inem jemaroñ ba bwe rej lelok aibujuij ñan Jehovah ran im boñ. Mõttan jidik “men otemjej eor air menono” renaj kalaplok ainikeir im nebar Jehovah. (Sam 150:6) Bõtab, mae ien eo, ta eo kij kajjojo jemaroñ kõmmane ñan lelok aibujuij ñan Anij? Ta melejoñ ko jej maroñ jelmaiki? Im ta jerammõn ko rej bed iman ro rej lelok aibujuij ñan e? Ñan uaki kajitõk kein, Jen etale juõn bwebwenato ilo Bible eo ikijen Gad bwijin Israel.

Juõn Aitwerõk ilo Ien Etto

4. Ta aituwerõk eo bwij eo an Gad ear jelmae?

⁴ Mokta jen air deloñlok ilo Enen Kallimur eo, ro uan Gad bwijin Israel rar kajitõk elañe remaroñ kar jokwe ilo juõn ailiñ emõn ñan kau ko bwe ren bed ie iturear in River Jordan. (Bwinbwin 32:​1-​5) Ñan jokwe ijo ear melelen bwe renaj kar jelmae elõñ melejoñ ko rekauwatata. Komlal in Jordan​—juõn jikin emõn ñan bõprae ri tarinae ro, ear kejbãrok bwij ko bwijin Israel iturilikin Jordan. (Joshua 3:​13-​17) Bõtab, ikijen ene ko iturear in River Jordan, book eo The Historical Geography of the Holy Land, jen ri jeje eo George Adam Smith, ej ba: “Aolep ene ko rar jokkair wõt juõn, enañin kar ejelok jikin kone ko ilo ene jemaden in Arabia eo elap. Kin men in ear bellok wõt ñan ri itoitak ro rekwuli ejelok jikiir im rar nitbwili ene eo yiõ otemjej.”

5. Ewi wãwen an kar Jacob rejañ armij ro an Gad bwe ren uak ke rar bed iumin jumae?

⁵ Ewi wãwen an kar bwij eo an Gad kijenmij iumin melejoñ in? Elõñ ebeben ko mokta, ke ear bojak in mij, jimmair Jacob ear kanan: “Gad, juõn jar e naj kobaj e; a e naj kajur tokelik.” (Jenesis 49:19) Ilo jinoin ñe jej baj lemnak wõt kin nan kein jemaroñ ba bwe ear juõn nan ekaburomõj. Bõtab, ilo mol, nan kein rar jiroñ Ri Gad ro bwe ren jumae ir ilo tarinae eo. Jacob ear kallimure ir bwe elañe rar kõmman eindein, ri rakim ro renaj kar luji tarinae eo ilo juõn wãwen ekajookok, im Ri Gad ro renaj kõple ir.

Abañ ko Jej Jelmae ilo Kabuñ eo Ad Ran Kein

6, 7. Ewi wãwen an Ri Christian ro ilo ran kein rej einlok wõt bwij eo an Gad?

⁶ Einwõt bwijin Gad, Ri Christian ro ran kein rej jelmae elõñ melejoñ ko jen jukjuk im bed eo an Satan; ejelok wãwen ko rekabwilõñlõñ jen lañ ñan kejbãrok kij jen ad jumae melejoñ ko air. (Job 1:​10-​12) Elõñ iad jej aikwij kijenmij iumin melejoñ ko ilo school, kabwe aikwij ko ad ilo kanniek, im katakin ajiri ro nejid. Jejjab kõnan meloklok kin melejoñ ko jen iloa. Jet iad jej aikwij kijenmij “juõn kãliklik ilo kõniek” ikijen juõn nañinmij. (2 Dri Korint 12:​7-​10) Ro jet rej eñtan kin air ebwer ak buromõj. “Ran ko re nana” rej itok jen bwijwõlã remaroñ kabañ Christian ro reritto jen air jerbal ñan Jehovah ilo kijejeto einwõt mokta.​—Ekklisiastis 12:1.

⁷ Bareinwõt ri jilek Paul ear kakememej kij bwe “aruij oktak e jab . . . iben jaran jitõb renana ijo ko i lõñ.” (Dri Epesõs 6:​12) Ran otemjej jej jerwawa iman mejen “jitõbõn lõl,” jitõbõn jumae im nana eo me Satan im dimõn ro an rej kaitoklimoen armij bwe ren bõke. (1 Dri Korint 2:​12; Dri Epesõs 2:​2, 3) Einwõt Lot eo ear mijak Anij, ilo ran kein jemaroñ inebata kin men ko renana armij ro ibelakid rej konono im kõmmani. (2 Piter 2:7) Jej bareinwõt ejerwawa ñan jumae eo an Satan. Satan ej tarinaik bwen ri kabit ro, “rej kejbãrok kien ko an Anij im kennan an Jisõs.” (Reveles̃õn 12:17) Bareinwõt, “bar jet [an Jesus] s̃ip” rej jelmae jumae eo an Satan ikijen kien ko rej kabõjrak im matõrtõre kij.​—Jon 10:16.

Ebwer Ke ak Jumae?

8. En kar ewi wãwen ad uake jumae eo an Satan, im etke?

⁸ Ta uak eo ad ñan jumae ko an Satan nae kij? Einwõt bwijin Gad ilo ien etto, jej aikwij kajur ilo jitõb im jumae ekkar ñan nan in jiroñ ko an Anij. Ekaburomõj bwe, jet rar mõk im ebwer iumin inebata ko an mour, im jokwõd air ineke eddo ko air ilo jitõb. (Matu 13:20-​22) Juõn Ri Kennan ear konono kin unin an eiet ri kwelok ro ilo congregation eo: “Ro jeõm im jatõm remõk. Relukkun inebata im buromõj.” Emol bwe, elõñ un ko unin an armij ro mõk ilo ran kein. Inem, ebidodo air watõk kabuñ eo an Anij einwõt bar juõn inebata, juõn eddo elap. Ak lemnak in ej juõn lemnak emõn ke?

9. Ewi wãwen inek ine eo an Christ ej kaemololo kij?

⁹ Lemnak mõk kin ta eo Jesus ear ba ñan jar in armij ro ilo ran ko an me rar ebwer kin inebata ko an mour: “Komin itok ñõn iba, kom otemjej rej jerbal im ban, im I naj kakijeik kom.” Jesus ear ba ke bwe kaemololo eo enaj itok ilo ad kadiklok jerbal eo ad ñan Anij? Jen men in, Jesus ear ba: “Komin bõk Aõ ine im likite i aerami, im katak iba, bwe Ij inemõn im etã buruõ im kom naj lo an ami kakije.” Juõn ine ear juõn alal ak mãl juõn men in mour ak armij ear kajerbale ñan inek juõn eddo ion. Inem, etke juõn armij ear kõnan bõk ine eo? Ejjab ke bwe ebwe an lap “eddo ko” jej ineki kadede? Aet, ak jemaroñ ukõt nan in Greek e in im ba: “Komin bed iumin ine eo aõ ibba.” Baj lemnak mõk: Jesus ej mõnõnõ in jibañ kij ñan eiki eddo eo ad! Jejjab aikwij atartar ion kajur eo ad make wõt.​—Matu 9:​36; 11:28, 29, footnote; 2 Dri Korint 4:7.

10. Ta tokjen ko rej walok ñe jej kaibujuij Anij?

¹⁰ Ñe jej bõk ine eo Jesus ej letok ñan kij einwõt ri kalor ro an, jej jumae Satan. “Komin jumae devil im e naj ko jen kom,” Jemes 4:7 ej kallimur kake. Ejjab melelen bwe enaj bidodo jumae Devil eo. Jej aikwij lukkun kate kij ñan karejar ñan Anij. (Luk 13:24) Ak Bible eo ej kallimur ilo Sam 126:5: “Ro rej jeõr ilo dren in kemjalal, re naj marmir ilo lõñliñ.” Aet, jej kabuñ ñan juõn Anij ewõr kamolol ibben. Ej “lelok jinekjij ñõn ro rej kabukõt E,” im ej kajerammõn ro rej lelok aibujuij ñan e.​—Dri Hibru 11:6.

Kaibujuij Anij einwõt Ri Kwalok Ro an Ailiñ eo

11. Ewi wãwen an jerbal in ñan kejbãrok kij jen jumae ko an Satan?

¹¹ Jesus ear kakien: “Komin ilok im kõmõn dri ailiñ ko otemjej bwe ren dri kalora.” Jerbal in kwalok nan ej jerbal eo elaptata ñan “katok ñõn Anij kin wijtak ien otemjej.” (Matu 28:19; Dri Hibru 13:15) Ñe jej “naballin [need] kin [kein jerbal in kwalok] gospel in ainemõn” ej juõn mõttan eaorõk ñan “ken tõrinae” eo​—jojomar eo ad nae jumae ko an Satan. (Dri Epesõs 6:​11-​15) Wijtak Anij ilo jerbal in kwalok nan ej juõn wãwen emõn ñan kakajur tõmak eo ad. (2 Dri Korint 4:​13) Ej bõprae kij jen ad lemnak kin men ko rej kabwer kij. (Dri Pilippai 4:8) Bõk kunad ilo jerbal in kwalok nan ej kõtlok bwe jen lo mõnõnõ ilo ad kamao ibben ri kabuñ ro mõttad im kakajur don.

12, 13. Ewi wãwen family ko remaroñ bõk tokjen jen air keini in kwalok nan? Kwalok wanjoñok.

¹² Bareinwõt jerbal in kwalok nan ej juõn jerbal emõn ñan aolep ro uan family eo. Emol bwe, ajiri ro rej aikwij ien ikkure. Bõtab, ien eo juõn family ej bõk kunan ilo jerbal in kwalok nan ejjab aikwij juõn ien ej jalimo im kamõk ir. Jemen im jinen ajiri ro remaroñ kalaplok air mõnõnõ kin jerbal in ilo air katakin ajiri ro nejiir bwe ren bolemeir ilo jerbal in kwalok nan. Ejjab ke bwe ajiri ro remõnõnõ in kõmmane men ko rej kabel in kõmmani? Ilo air kwalok juõn lemnak ejokkin wõt juõn, im jab iun ro nejiir bwe ren kõmmane men ko ellã jen joñan maroñ ko air, jemen im jinen ajiri ro remaroñ jibañ ir ñan lo lañliñ ilo jerbal in kwalok nan.​—Jenesis 33:13, 14.

¹³ Bareinwõt, ñe aolep ro uan juõn family rej wijtak Anij rej kalaplok air ebake don. Lemnak mõk kin juõn kõrã ri tõmak eo me leo belen ear illok jen e im ajiri ro nejin lalem. Kiõ ear jelmae juõn aitwerõk ñan kabuk juõn jerbal im kabwe aikwij ko an ajiri ro nejin. Men in ear kõmman ke bwe en lukkun mõk ñan an kabwe aikwij ko an ajiri ro nejin ilo jitõb? Ilo ememej ear ba: “Iar keini in katak Bible im book ko rej bedbed ion Bible im kate wõt in jerbale men ko I ar katak jen e. Iar keini in etal ibben ajiri ro nejiõ ñan kwelok ko im jerbal in kwalok nan.” Ta tokjen ko rar walok jen aõ kate wõt in kõmmane men kein? Ajiri ro nejiõ lalem rar aolep baptais.” Bõk kunam ilo jerbal in kwalok nan kin aolepen buruõm emaroñ jibañ yuk bareinwõt ilo “kakajiririk [ajiri ro nejõm] ilo kaje im kowe an Iroij.”​—Dri Epesõs 6:4.

14. (a) Ewi wãwen an jodikdik ro maroñ kaibujuij Anij ilo school? (b) Ta eo emaroñ jibañ jodikdik ro bwe ren jab jook in kwalok “gospel eo”?

¹⁴ Kom, jodikdik ro, elañe komij jokwe ilo juõn ene kien eo ej kõtloke, komij lelok ke aibujuij ñan Anij ilo am kwalok nan ilo school, ak komij kõtlok bwe mijak armij en kabõjrak kom jen am kwalok nan? (Jabõn Kennan Ko 29:25) Juõn Ri Kennan ej 13-an yiõ ilo Puerto Rico ear je: “Iar jab jook in kwalok nan ilo school eo kinke Ij jelã bwe ej mol eo in. Ilo class eo Ij kwotak peiõ aolep ien im jiroñ ir kin ta eo Iar katak kake jen Bible eo. Elañe ejelok aõ class ilo ien eo, Ij etal ñan library eo im readi book eo Young People Ask (Jodikdik Ro Rej Kajitõk).”a Jehovah ear kajerammõn ke jerbal ko an? Ear reporte: “Jet ien ri school ro mõtta rar kajitõk kin elõñ kajitõk ko im bareinwõt kajitõk elañe remaroñ bõk juõn copy in book eo.” Elañe kwar jenliklik in kõmmane men in, bõlen kwoj aikwij “melejoñ ta ankil an Anij emõn im kabuñburuen im wãppen” ilo am niknik in katak Bible ibbam make. (Dri Rom 12:2) Ñe kwoj tõmak ilo buruõm bwe emol men in, kwojamin “jook kin gospel” eo.​—Dri Rom 1:​16.

Juõn ‘Aor Ebellok’ kin Jerbal

15, 16. Ta “aor” eo ej tellok ñan jerammõn ko remõn ej bellok im jet Ri Christian ro rar deloñe, im ta jerammõn ko rar walok?

¹⁵ Ri jilek Paul ear je bwe “juõn aur elap” ear bellok ñan e. (1 Dri Korint 16:9) Wãwen ko am remaroñ kõtlok ke yuk bwe kwon deloñ ilo juõn aor ñan jerbal? Ñan wanjoñok, bõk kunam ilo jerbal in kwalok nan full-time einwõt juõn regular ak auxiliary pioneer ej kitibuj am kwalok nan iumin 70 ak 50 awa ko ilo kajjojo alliñ. Alikar bwe, Ri Christian ro elap air kamolol kin pioneer ro rej tiljek ilo jerbal eo air. Ak meñe ewõr air maroñ ñan kalaplok awa ko air ilo jerbal in kwalok nan rejjab eñjake bwe reutiej jen ri tõmak maan im kõrã ro mõttair. Jen men in, rej bõk lemnak eo Jesus ear konono kake: “Kim ro dri korijer bãt. Kim ar kõmõn kwonam wõt.”​—Luk 17:10.

¹⁶ Ñan bõk jerbal in pioneer kwoj aikwij in katakin yuk make, kejbãrok juõn lajrak emõn, im mõnõnõ in karmijeteik kõnan ko am. Bõtab, elukkun lap jerammõn ko rej itok jen e. “Ej juõn jerammõn elap ñan kajerbal Nan in mol eo an Anij ilo jimwe,” Tamika juõn pioneer jodikdik ej ba. “Ñe kwoj pioneer, emakijkij am kajerbale Bible eo. Kiõ ñe ij etal jen em ñan em, imaroñ lemnak kin jeje ko ilo Bible relukkun jejjet ekkar ñan aikwij eo an kajjojo ri mweo.” (2 Timote 2:​15) Juõn pioneer etan Mica ej ba: “Aõ lo wãwen an mol eo jelet mour eo an armij ro ej bar juõn jerammõn ekabwilõñlõñ.” Juõn jodikdik etan Matu ej konono kin lañliñ eo ej bõke ñe ej “lo an juõn armij bõk mol eo. Ejelok bar juõn lañliñ einwõt in.”

17. Ewi wãwen an kar juõn Ri Christian anjo ion lemnak ko an renana kin jerbal in pioneer?

¹⁷ Kwomaroñ ke lemnak ñan am bõk jerbal in pioneer? Bõlen kwokõnan ak kwoj lemnak bwe ejelok am maroñ. “Iar bõk juõn lemnak ejjab emõn kin jerbal in pioneer,” Kenyatte juõn ledik jodikdik ear ba. “Iar lemnak bwe ear jabwe aõ maroñ. Iar jaje kilen keboje nan in kabellok ko ak kamelele ilo kõmmanwa jen Jeje ko ilo Bible.” Bõtab, elder ro rar karõk bwe in jerbal ibben juõn kõrã pioneer eo eritto ilo jitõb. “Iar mõnõnõ in jerbal ibben,” Kenyatte ear ba. “Ear lujur iõ bwe in pioneer.” Ilo am bõk jidik nan in rejañ im katakin, bõlen kwonaj mõnõnõ in bõk jerbal in pioneer bareinwõt.

18. Ta jerammõn ko ro rej deloñ ilo jerbal in missionary remaroñ bõk?

¹⁸ Jerbal in pioneer emaroñ kabellok juõn ien emõn ñan am bõk jerammõn ko jet ilo jerbal. Ñan wanjoñok, jet ri belele remaroñ bõk jerammõn eo ñan katak kin jerbal in missionary im kwalok nan ilo juõn ailiñ etolok. Missionary ro rej aikwij ukõt wãwen mour eo air ñan jokwe ilo juõn ailiñ ekãl, katak juõn kajin ekãl, juõn manit ekãl, im mõñã mõñã ko rekãl. Ak jerammõn ko rej bõki rej kadiklok ad inebata kin abañ ko ad. Mildred, juõn missionary ekabel ilo Mexico, ear ba: “Iar jab buromõj kin bebe eo aõ bwe in erom juõn missionary. Ej juõn jerbal iar kõnan bõke ke iar dik.” Ta jerammõn ko ear bõke jen jerbal in? “Ilo kabijuknen eo aõ ear bin lo juõn eo ekõnan katak Bible. Ak ijin ilo Mexico, Iar jibañ elaptata 4 ri katak ro ñan jino bõk kunair ilo jerbal in kwalok nan ilo juõn wõt ien!”

19, 20. Ewi wãwen jerbal in Bethel, jerbal in ekkal ilo ailiñ ko retolok, im school eo Ministerial Training School rar bõktok jerammõn ko ñan elõñ armij ro?

¹⁹ Bareinwõt jerammõn ko relap rej itok jen ro rej jerbal ilo Bethel ilo office ko an ra ko an Ri Kennan ro an Jehovah. Sven, juõn likao ri tõmak ilo Germany, ear konono kin jerbal eo an ilo Bethel: “Ij lemnak bwe men eo ij kõmmane ewõr tokjen ñan indio. Imaroñ kar kajerbal kabel ko aõ ilo lal in. Ak enaj kar einwõt aõ kadeloñ money ko aõ ilo juõn bank eo ebojak in bankrupt.” Emol bwe, jerbal kin ejelok wõnãn ej juõn men in katok eo elap. Ak Sven ej ba: “Ñe kwoj rol ñan mweo, kwoj jelã bwe men otemjej kwar kõmmani ilo ran eo kwar kõmmani ñan Jehovah. Im kwoj bõk juõn eñjake ekamõnõnõ elap jen men in.”

²⁰ Jet jeid im jatid rar bõk jerammõn eo kin jerbal in ekkal ilo ailiñ ko retolok. Juõn leo im lio ri belele rar bõk jerbal in ilo ralitõk jikin ko retolok rar je: “Ri tõmak ro mõttad relukkun emõn. Kimnaj lukkun buromõj ñe kimnaj etal jen ir​—enaj kein karalitõk in an ‘rup’ buruõm. Ejelok juõn nan kim maroñ in ba ñan kwalok joñan mõnõnõ eo ekar bed ibbamro!” Inem ewõr Ministerial Training School. School in ej katakin lõmaro rejañin belele kin aikwij ko ilo jitõb. Juõn eo ear kadiojlok jen school in ear ba: “Ebwe an bin kalikar ewi joñan kamolol eo aõ kin school in ekabwilõñlõñ. Bar ta dolul eo ej kamaat an maroñ ñan katakin kim? Ejelok ñan jidik!”

21. Ta aituwerõk eo Ri Christian ro aolep rej jelmae ñe rej jerbal ñan Anij?

²¹ Aet, elõñ aor ko rebellok ñan jerbal. Emol bwe, elõñ iad jejjab maroñ jerbal ilo Bethel ak ilo juõn ailiñ etolok. Jesus ear make kile bwe Ri Christian ro renaj jebar “leen” ko rekajjo jen don ekkar ñan maroñ ko air. (Matu 13:23) Inem, aituwerõk eo ad einwõt Ri Christian ro ej bwe jen kajerbal wãwen ko ad ilo bolemen​—bõk kunad ilo jerbal eo an Jehovah joñan wõt ad maroñ. Ñe jej kõmman men in, jej lelok aibujuij ñan Jehovah, im jemaroñ liki bwe enaj buñburuen kin kij. Lemnak kin Ethel, juõn Christian lellab ilo juõn mõn nañinmij an ritto. Ekkã an kwalok nan ñan ro rej jokwe ilo mweo imõn im kajerbal telephone eo ñan kwalok nan. Meñe emõjno, ej jerbal kin aolepen an ilo jerbal eo an Jehovah.​—Matu 22:37.

22. (a) Bar ta wãwen ko jemaroñ kaibujuij Anij? (b) Ta ien eo ekabwilõñlõñ ej bed imad?

²² Bõtab, kememej, bwe jerbal in kwalok nan ej juõn ian wãwen ko ñan lelok aibujuij ñan Jehovah. Ilo ad kwalok joñok emõn ilo mwilid im baotokid ilo jikin jerbal eo ad, ilo school, ilo moko imõd, jej kamõnõnõik buruen Jehovah. (Jabõn Kennan Ko 27:11) Jabõn Kennan Ko 28:20 ej kallimur: “Elõñ men in jerammõn naj iben armij dri tiljek.” Inem ej aikwij lap ad ‘jeor’ ilo jerbal eo an Anij, im tõmak bwe enaj lap ad madmõd jerammõn ko. (2 Dri Korint 9:6) Ilo ad kõmman eindein, jenaj jerammõn im mour ilo juõn ien eaibujuij ñe “men otemjej eor air menono” renaj lelok aibujuij ñan Jehovah eo ej tellokin bõke!​—Sam 150:⁠6.

[Kamelele eo itulal]

Kwoj Kememej Ke?

• Ewi wãwen an ro don Jehovah karejar ñan Jehovah “ran im boñ”?

• Ta aituwerõk eo bwij eo an Gad ear jelmae, im ta eo Ri Christian ro ran kein rej katak jen e?

• Ewi wãwen an jerbal in kwalok nan kejbãrok kij jen jumae ko an Satan?

• Ta ‘aor’ eo jet armij rar deloñlok iloan, im ta jerammõn ko rar lañliñ kaki?

[Pija eo ilo peij 23]

Einwõt Ri Gad ro rar tarinaik ri kijirãt ro air, Ri Christian ro rej aikwij tarinaik men in jumae ko an Satan

[Pija eo ilo peij 25]

Jej mõnõnõ in kamao im kõketak don ilo jerbal in kwalok nan

[Pija ko ilo peij 26]

Jerbal in pioneer emaroñ kabellok juõn aor ñan jerammõn ko jet, ekoba:

1. Jerbal in ekkal ibelakin lal

2. Jerbal in Bethel

3. Jerbal in Missionary