Jodikdik Ro, Komin Kememej Ri Kõmanman Eo Ami Kio

“Kwon bareinwõt kememej Eo Dri Kõmõnmõn yuk ilo ran ko ñe emõn ridtõm.”​—EKK. 12:1.

1. Ewi wãwen Jehovah ej kwalok an liki ri kabuñ ro an remõn ded?

JEHOVAH ej watõk Christian jodikdik ro einwõt mõlawi ko raorõk im aemlolo. Emol, ear kanan bwe ilo ran in ‘kajur’ eo an Nejin, likao im jiroñ ro emõn ded renaj ‘mõnõnõ im lelok ir mõke’ ilo jerbal eo an Christ. (Sam 110:3) Kanan in enaj kar jejjet kitien ilo juõn ien ñe jarlepju in armij ro rejamin itoklimo kin Anij, renaj mad kin kõnan ko air make im kin money, im renaj kiblia. Ak, Jehovah ear jelã bwe jodikdik ro me rar kabuñ ñan e renaj oktak. Elap an liki kom likao im jiroñ ro!

2. Kememej Jehovah ej kitibuj ta?

² Lemnak kin lañliñ eo an Anij ñe ej lo an ro remõn ded kememej e einwõt Ri Kõmanman eo air. (Ekk. 12:1) Emol, kememej Jehovah ej kitibuj elaplok jen ad baj lemnak wõt kin e. Ej aikwij ad emmakit im jerbal​​—einwõt kõmman men ko rej kabuñburuen, im kõtlok bwe kien ko im nan in kaiñi ko an ren tel kij ilo mour eo ad ran otemjej. Ej bareinwõt melelen ad liki Jehovah, ilo ad jelã bwe elap an itoklimo ñan jibañ kij. (Sam 37:3; Ais. 48:​17, 18) Ej eindein ke am eñjake kin Ri Kõmanman eo am?

“Kwon Liki Jeova Kin Aolepen Buruõm”

3, 4. Ewi wãwen an kar Jesus kwalok an liki Jehovah, im etke eaorõk ñan ad liki Jehovah rainin?

³ Joñok eo emõntata kin juõn eo ear liki Anij kar Jesus Christ. Ear mour ekkar ñan nan ko ilo Jabõn Kennan Ko 3:​5, 6 “Kwon liki Jeova kin aolepen buruõm, im kwon jab atartar ion jelalokjen eo am: Kwon kwalok E ilo ial ko am otemjelok, inem E naj bakajen ial ko am.” Ejjabto elikin an kar baptais, Satan ear kebak Jesus, im kajeoñ in kabo e ñan bõk kajur im aibujuij eo an lal in. (Luk 4:​3-​13) Jesus ear jab jebwãbwe. Ear jelã bwe “mweiuk, im nebar, im mour” eo emol rej “wõnan etã buru im mijõk Jeova.”​​—Ken. 22:4.

⁴ Arõk im kibbon rej kadkad ko relap kadkadin armij ro ilo ran kein. Ilo wãwen mejatoto rot in, ej menin meletlet ñan ad lor joñok eo an Jesus. Kememej, bareinwõt, bwe Satan enaj kõmman joñan wõt an maroñ ñan kareel ri karejar ro an Jehovah bwe ren illok jen ial eo eaidik ej tellok ñan mour. Ekõnan lo bwe aolep ren etetal ilo ial eo edebakbak me ej tellok ñan mij. Komin jab kõtlok bwe en mone kom! Jen an eindein, komin beek ilo buruemi bwe komin kememej Ri Kõmanman eo ami Elap. Liki e kin aolepen buruemi, im bõk “mour eo emol,” eo enaj itok ilo mõkaj.​​—1 Tim. 6:​19.

Jodikdik Ro, Komin Meletlet!

5. Ewi lemnak eo am kin ilju eo an lal in?

⁵ Jodikdik ro me rej kememej Ri Kõmanman eo air remeletlet jen ro jet me rej dettair wõt. (Read Sam 119:​99, 100.) Kin air bõk lemnak eo an Anij, relukkun jelã bwe mõttan jidik lal in enaj jako. Meñe ilo mour eo ami ekadu, ejelok bere komar lo bwe elaplok an armij mijak im inebata kin ilju im jeklaj. Elañe komij school wõt, bõlen komar roñ kin pollution (etton mejatoto, ene, lojet, im men ko eierlok wõt), elaplok an bwil mejatoto, an jako bukin wijki ko, im abañ ko eierlok wõt. Armij ro elap air inebata kin wãwen kein rej walok, ak Ri Kennan ro an Jehovah wõt relukkun melele bwe rej mõttan kakõlle eo me ej jitõñlok ñan jemlokin lal eo an Satan.​​—Rev. 11:18.

6. Ewi wãwen kar mone jet jodikdik ro?

⁶ Ekaburomõjmõj, bwe jet jodikdik ri karejar ro an Anij rar bõjrak jen air ekkõl wõt im rar meloklok bwe ekadu ien ñan jukjuk im bed in. (2 Pit. 3:​3, 4) Kin air kamao ibben armij ro renana ak aluiji pija in kelwan, ro jet rar bo ilo aujid in lũñ. (Ken. 13:​20) Ekaburomõjmõj elañe jej luji buñburu eo an Anij kiõ ke ej ebak ñan jemlokin! Jen an eindein, jej aikwij katak jen ta eo ear walok ñan Ri Israel ro ilo 1473 B.C.E. ke rar kajutak imõn kabbed ko air ilo ene emõn biken an Moab, ke rar bojak in deloñ ilo Enen Kallimur eo. Ta eo ear walok ijo?

Rar Buñ ke Ebak ñan Ijo Rar Jibadõke

7, 8. (a) Ta kõl eo Satan ear kajerbal ilo ene emõn biken an Moab? (b) Ta kõl eo Satan ej kajerbale rainin?

⁷ Ilo ien eo, ealikar bwe kar kõnan eo an Satan ñan bõprae Ri Israel ro jen air bõk menin jolet eo kar kallimur ñan ir. Elikin an kar ri kanan eo Balaam likjap in koole Ri Israel ro, Satan ear kajerbal juõn kõl elaplok an etao; ear kajeoñ in bõprae air bõk kajerammõn jen Jehovah. Kõrã ro redeeo ilo Moab rar kaal tok ir, im ilo ien in Devil eo ear lo tõbrak. Armij ro rar jino lũñ ibben kõrã ro nejin Moab im rar badikdik ñan Baal in Peor! Meñe menin jolet eo air eaorõk, Enen Kallimur eo, ear ebak, enañin 24,000 Ri Israel ro rar luji mour ko air. Ear juõn jorrãn elap!​​—Bwin. 25:​1-3, 9.

⁸ Rainin, emõkaj ad kebak juõn ene emõnlok kar kallimur kake​​—jukjuk im bed eo ekãl. Einwõt ekkã an kar kõmmane mokta, Satan ej bar kajerbal lũñ ñan kokkure armij ro an Anij. Joñan an kar kien ko kin mwil emõn ilo lal in oktak im lukkun nana, rej watõk lũñ einwõt juõn manit ejjab nana im homosexuality (maan ro ak kõrã ro rej mijkaieik don) einwõt jokãlet in kõnan eo an juõn armij. Juõn Christian sister ear ba, “Ilo mweo imõ im ilo Kingdom Hall eo wõt ajiri ro nejiõ rej katak bwe homosexuality im belele ñe rejañin mare renana iman mejen Anij.”

9. Ta eo emaroñ walok ñe kõnan eo ñan belele ekajurlok, im ewi wãwen jodikdik ro remaroñ kamadmõde men in?

⁹ Ro remõn ded me rej kememej Ri Kõmanman eo air rej jelã bwe babu ibben don ej juõn menin letok ekwojarjar im ej ekkeijaklok ñan mour im neje. Kin men in, rej kile bwe belele ej aikwij ekkar ñan tel eo an Jehovah​​—ñe emwij air mare. (Hib. 13:4) Bõtab, ilo ien eo ñe kõnan eo an juõn jodikdik ñan belele ekajurlok jen mokta im jelet lemnak eo an ilo jab jimwe, emaroñ bin an kejbãrok juõn mour erreo.” Ta eo kwomaroñ kõmmane ñe lemnak ko rejõkkar rej jiktok ilo lemnak eo am? Kwon jar ilo mol jen buruõm ñan Jehovah bwe en jibañ yuk ñan lemnak wõt kin men ko rerreo. Ien otemjej Jehovah ej roñjake ro rej reilok ñan e kin juõn buru emol. (Read Luk 11:​9-​13.) Bwebwenato ko rekõketak remaroñ bareinwõt jibañ ñan ukõt lemnak eo am.

Kãlet Mejenkajjik ko Am ilo Meletlet!

10. Ta lemnak eo ejelok tokjen jej aikwij bõprae, im ta kajitõk ko jemaroñ kajitõkin kij make?

¹⁰ Juõn un elõñ jodikdik ro ilo lal in rejaje jatõr ak rej bukõt men in kamõnõnõ ko ilo kanniek, ej kinke ejelok air “visõn”​​—ejelok tel jen Anij ak juõn kejatdikdik emol kin ilju im jeklaj. (Ken. 29:​18) Rej einwõt Ri Israel ro me rar bõjrak jen air lor tel eo an Anij ilo ran ko an Isaiah me rar mour wõt kin air “lõñliñ im mõnõnõ, . . . mõña kõniek im irak wain.” (Ais. 22:​13) Jen ami ebanbane armij rot in, etke komij jab kalmenlokjen kin kejatdikdik eo eaorõk me Jehovah ear likit iman armij ro an retiljek? Elañe kwoj juõn jodikdik ri karejaran Anij, kwoj ke kijororetok jukjuk im bed eo ekãl? Kwoj ke kate yuk ñan “mour im jadõr . . . im bukot men in kejatrikrik im kamõnõnõ” me Jehovah ear likit imam? (Tait. 2:​12, 13) Uak eo am enaj jelet mejenkajjik ko im men ko raorõk kwoj likit imam.

11. Etke Christian jodikdik ro me rej school wõt, rej aikwij kate ir ilo air katak?

¹¹ Lal in ekõnan bwe jodikdik ro ren kate ir im jibadõk mejenkajjik ko an lal in. Emol, ro me rej school wõt rej aikwij kate ir ñan bõk juõn education ak jelãlokjen emõn. Kwoj aikwij kememej, mejenkajjik eo am ejjab ñan baj lo juõn jerbal emõn wõt ak bareinwõt bwe kwon juõn tokjen emõn ñan congregation eo im juõn ri keañ kin Ailiñ eo ekeie. Ñan kõtõbrak men in, ej aikwij emõn am communicate ak konono ibben ro jet, ñan lemnak ilo juõn wãwen emõn, im ñan kõmmanwa ibben ro jet ilo juõn wãwen eainemõn im ewõr kautiej. Bõtab, jodikdik ro me rej katak Bible eo im rej kate ir ñan jerbale nan in kakabilek ko ilo mour ko air rej bõk jelãlokjen eo emõntata im rej ejaak juõn bedbed ak foundation emõn kin juõn ilju ewõr tõbrak ie im ej indio.​​—Read Sam 1:​1-3.a

12. Ta joñok eo Christian family ko rej aikwij anõke?

¹² Ilo Israel, ear lukkun aorõk bwe ro jemen im jinen ren katakin ro nejiir. Ritto ro rar katakin im kaminene ro nejiir ilo aolep wãwen mour, elaptata kin men ko lor jitõb. (Dut. 6:​6, 7) Kin men in, Ri Israel ro emõn ded me rar eoroñ jemeir im jineir im ritto ro jet me rar mijak Anij, rar bõk ejjab jelãlokjen eo wõt ak bareinwõt meletlet, lolokjen, melele, im maroñ in lemnak​​—kadkad ko ejej uair me rej walok jen air katak kin Anij im kien ko an. (Ken. 1:​2-4; 2:​1-​5, 11-​15) Christian family ko rainin rej aikwij lemnak bareinwõt kin education eo.

Eoroñ Ro Rej Yokwe Yuk

13. Kain nan in kakabilek rot jet jodikdik ro rej bõki, im etke rej aikwij ekkõl?

¹³ Jodikdik ro rej bõk nan in kakabilek ko jen elõñ armij​​—ekoba ri kakabilek ro ilo school, me ekkã air lemnak kin tõbrak ko ilo lal in. Joij im jar ñan Anij ñan bõk tel jen e ñe kwoj keidi aolep nan in kakabilek rot kein ekkar ñan Nan eo an Anij im book ko me class in ri karejar etiljek im meletlet ej litoki. Jen katak eo am kin Bible eo, kwoj jelã bwe ro redik im ejelok iminene ibbeir rej kein kõjjeroro eo elaptata an Satan. Ñan wanjoñok, ilo jikin kallip in Eden, Eve, eo ediklok an kar wõr an iminene kin mour, ear eoroñ Satan, juõn ruwamaejet me ear jab kwalok an yokwe Eve ñan jidik. Enaj kar lukkun oktak elañe ear eoroñ Jehovah, eo ear kamol an yokwe e ilo elõñ wãwen ko!​​—Jen. 3:​1-6.

14. Etke jej aikwij eoroñ Jehovah im ri tõmak ro jemed im jined jimor?

¹⁴ Ri Kõmanman eo am ej yokwe yuk bareinwõt, im ej kwaloke kin juõn un emol. Ekõnan bwe kwon mõnõnõ ñan indio, jab ñan kiõ wõt! Kin men in, kin joij eo an juõn jemen eyokwe, ej ba ñan yuk im ñan aolep ro rej kabuñ ñan e: “Eñin ial eo, komin etetal iloan.” (Ais. 30:​21) Elañe jemõm im jinõm rej tõmak im yokwe Jehovah, ewõr ibbam bar juõn jerammõn elap. Roñjake ilo kautiej ñan nan in kakabilek eo air ñe kwoj likit mejenkajjik ko im men ko moktata ilo am mour. (Ken. 1:​8, 9) En eindein kinke, rekõnan bwe kwon bõk mour, juõn men elaplok an aorõk jen mweiuk ak utiej ilo lal in.​​—Mat. 16:26.

15, 16. (a) Kin ta eo jemaroñ liki Jehovah kake? (b) Ta eo jemaroñ katak jen men eo ear walok ñan Baruch?

¹⁵ Ro rej kememej Ri Kõmanman eo air rej kõmman bwe en lamwan mour eo air, im liki bwe Jehovah ‘ejamin likit ir’ im ‘ejamin illok jen ir.’ (Read Dri Hibru 13:5.) Kinke lemnak rot in emõn ej idaptõk ibben lemnak eo an lal, jej aikwij kejbãrok bwe jitõb eo an lal in en jab jelet kij. (Ep. 2:2) Ikijen men in, lemnak kin joñok eo an Baruch, ri jeje eo an Jeremiah, eo ear mour ilo ran ko eliktata im bin ñan ailiñ in Jerusalem im ear tellok ñan an jeebeplok jikin kwelok eo ilo 607 B.C.E.

¹⁶ Emaroñ bwe Baruch ear kõnan kakõmõnmõnlok wãwen mour eo an ilo kanniek. Jehovah ear lo men in im ilo joij ear kakkõl Baruch bwe en jab bukõt men ko relap ñan e make. Baruch ear kwalok an ettã buru im meletlet, bwe ear eoroñ Jehovah im ellã im mour jen jeebeplok eo an Jerusalem. (Jerm. 45:​2-5) Ijo turãjet, ro rar mour ilo ran ko an Baruch me rar bukõt men ko relap ikijen mweiuk, im likit bwe Jehovah en kein karuo, ejjabto tokelik rar luji aolep men ko mweieir ñan Ri Chaldea (Ri Babylon) ro. Elõñ rar mij bareinwõt. (2 Kron. 36:​15-​18) Men eo Baruch ear iione emaroñ jibañ kij ñan lo bwe juõn kõtan emõn ibben Anij elaplok an aorõk jen mweie im buñbuñ ilo lal in.

Reilok ñan Joñok ko Remõntata

17. Etke Jesus, Paul, im Timothy rej joñok ko remõn ñan ri karejar ro an Jehovah rainin?

¹⁷ Ñan jibañ kij wõnmanlok ilo ial in mour, Nan in Anij ej letok elõñ joñok ko remõn. Ñan wanjoñok, Jesus ear armij eo ekabel tata ear mour ion lal, ak ear lemnak wõt kin men eo me enaj kar jibañ armij ñan indio​—“nan emõn an ailiñ in Anij.” (Luk 4:​43) Ñan an kõmman bwe Jehovah en moktata ilo an mour, ri jilek Paul ear illok jen juõn jerbal eutiej me emaroñ kar kõmman an mweie im ear kajerbal ien im kajur eo an ñan kwalok kin news eo emõn. Timothy, “nejiõ emol ilo tõmak,” ear kajeoñe joñok eo emõn an Paul. (1 Tim. 1:2) Jesus, Paul, im Timothy rar ke ajlok kin wãwen mour eo air? Jaab ñan jidik! Ilo mol, Paul ear ba bwe ear watõk men ko me lal in ej litoki einwõt “kwobij” ñe keidi ibben jerammõn eo ñan an karejar ñan Anij.​​—Pil. 3:​8-​11.

18. Ta oktak ko relap juõn brother emõn ded ear kõmmani, im etke ear jab ajlok kake bebe eo an?

¹⁸ Elõñ Christian jodikdik ro rainin rej kajeoñe tõmak eo an Jesus, Paul, im Timothy. Ñan wanjoñok, juõn brother emõn ded me ear illok jen juõn jerbal ear bõk elap wõnãn jen e, ear je: “Kin aõ mour ekkar ñan nan in kakabilek ko ilo Bible, ejjabto tokelik iar bõk elõñ jerammõn ko ilo jikin jerbal eo. Meñe iar bõk juõn wõnãn elap, iar eñjake bwe iar jibadõk men ko ejelok tokjeir. Ke iar kebak kumi in ri utiej ro ilo jikin jerbal eo im kwalok kõnan eo aõ ñan jibadõk jerbal in kwalok nan full-​time, ilo mõkaj rar kalaplok wõnãn aõ jerbal, ilo air kejatdikdik bwe inaj bedwõt. Ak emwij aõ kar bebe kake ilo buruõ. Elõñ armij rar jab maroñ melele kin etke iar illok jen juõn jerbal elap wõnãn ñan jibadõk jerbal in kwalok nan full-​time. Uak eo aõ kar bwe ikõnan kajejjet wujleplok eo aõ ñan Anij. Kinke mour eo aõ kiõ ej ñan karejar ñan Anij moktata, ewõr aõ mõnõnõ im juburu me money im buñbuñ ilo lal in ejjab maroñ letok ñan iõ.”

19. Ta jokãlet eo emeletlet kar rejañ jodikdik ro ñan air kõmmane?

¹⁹ Ibelakin lal, elõñ thousand jodikdik ro rar kõmman ejja jokãlet ko wõt. Inem, kom jodikdik ro, ñe komij kalmenlokjen kin ilju eo ami, lemnak wõt kin ran eo an Jehovah. (2 Pit. 3:​11, 12) Komin jab ebanbane ro rekanuij jerbale lal in. Jen an eindein, komin eoroñ ro me emol air yokwe yuk. Ami “koorlok mweiuk ñõn kom i lõñ” ej men eo emõntata kom maroñ kõmmane im men in wõt ewõr tokjen ko rej indio. (Mat. 6:​19, 20; read 1 Jon 2:​15-​17.) Aet, kememej Ri Kõmanman eo ami Elap. Ñe komij kõmmane, Jehovah enaj kajerammõn kom.

[Kamelele eo itulal]

Kwomaroñ ke Kememej?

• Ewi wãwen jej kwalok ad liki Anij?

• Ta education ak jelãlokjen eo emõntata?

• Ta men ko jemaroñ katak jen Baruch?

• Wõn ro rej jerbal einwõt joñok ko remõn, im etke?

[Pija ko ilo peij 13]

Jehovah ej letok education ak jelãlokjen eo emõntata

[Pija eo ilo peij 15]

Baruch ear eoroñ Jehovah im ear ellã im mour jen jeebeplok eo an Jerusalem. Ta eo kwomaroñ katak jen joñok in?