Lõke Jeova Ke Ej Epaaktok Jem̦l̦o̦kin Raan Kein Ãliktata
“Kom̦win lõke Jeova ñan indeeo.”—AIS. 26:4.
1. Ta oktak eo ikõtaan armej ro doon Anij im armej ro ilo lal̦ in?
ELÕÑ million armej ro ipel̦aakin lal̦ in rejaje wõn ro remaroñ lõke er, kõnke ekkã an armej ro m̦on̦e er. Men in ejjab wal̦o̦k ibwiljin ri karejar ro an Jeova! Rejjab “lõke irooj” ro an lal̦ in. Rej lõke Anij im rej kõtl̦o̦k bwe en tõl er. (Sam 146:3) Rejel̦ã bwe Jeova ej yokwe er im enaaj kakũrm̦oole aolep kallim̦ur ko an. Kõn men in, rej kõtl̦o̦k bwe Jeova en peek mour ko aer kiiõ im ilo raan ko rej pedotok.—Rom 3:4; 8:38, 39.
2. Ta eo Joshua ear ba kõn Anij?
2 Joshua ear kam̦ool bwe jemaroñ lõke Jeova. Ilo iien eo ear bwijwol̦ã, ear ba ñan ri Israel ro im ba: “Kom̦ jel̦ã ilo bũruemi otemjej, im ilo ami otemjej, bwe ear jab likjab juon men iaan men ko rem̦m̦an Jeova ami Anij ear ba kõn kom̦. Men otemjej re jejjet ñan kom̦; ejjel̦o̦k juon iaer e ir.”—Josh. 23:14.
3. Ta eo jemaroñ katak kõn mel̦el̦ein etan Anij?
3 Jeova ej kakũrm̦oole kallim̦ur ko an kõn an yokwe ri karejar ro an, im elaptata ñan kwal̦o̦k kõn mel̦el̦ein ãt eo etan. (Ex. 3:14; 1 Sam. 12:22) Juon ri ukok in Baibõl̦ etan J. B. Rotherham ear kõmel̦el̦e bwe etan Anij ej mel̦el̦ein bwe Anij enaaj erom jabdewõt men ñan kakũrm̦ooli kallim̦ur ko an. Etan Anij ej kakememej kõj bwe Jeova ej kajejjet aolep men ko ear ba bwe enaaj kõm̦m̦ani. Emaroñ kõm̦m̦ane jabdewõt men ej aikuj kõm̦m̦ani, ilo jabdewõt iien im jabdewõt jikin. Ejjel̦o̦k men en̦ Anij ejjab maroñwe. Anij enaaj kam̦oole mel̦el̦ein ãt eo etan ñan indeeo.
4. (a) Ta eo bok in Aiseia 26:4 ej rõjañ kõj ñan kõm̦m̦ane? (b) Ta ko jenaaj etali ilo katak in?
4 Jouj im kajjitõkin yuk make: ‘Ij ke lukkuun lõke Jeova? Ij ke lõke bwe Jeova ejel̦ã ta ko enaaj kõm̦m̦ani ilo raan ko iman?’ Bok in Aiseia 26:4 ej ba: “Kom̦win lõke Jeova ñan indeeo, bwe ilo Ja, Jeova, juon dekã ñan indeeo.” Juon dekã ekilep elukkuun pen im ej tõt wõt. Dekã in eban m̦akũtkũt im eban oktak. Ilo ejja wãween in l̦o̦k wõt, Jeova ekajoor im eban oktak. Jejel̦ã bwe Anij ejjab kõm̦m̦ani men ko rekabwilõñlõñ ñan lo̦mo̦o̦ren armej ro ilo raan kein ãinwõt kar iien ko etto ilo Baibõl̦ eo. Jeova ej ãinwõt juon dekã eo ej pãd ñan indeeo, kõn men in jemaroñ lõke wõt e “ñan indeeo.” Ewi wãwen an Anij jipañ ro rej tiljek im jerbal ñan e ilo raan kein? Ilo katak in, jenaaj etale jilu wãween ko. Kein kajuon, ej kakajoor kõj el̦aññe jej kajjitõk bwe en jipañ kõj jumae menin kapo ko. Kein karuo, ej jipañ kõj meñe armej ro rejjab kõn̦aan roñjake ak rej jumae kõj. Im kein kajilu, Jeova ej jipañ kõj ilo iien ad lukkuun inepata im bũrom̦õj. Ilo ad naaj etale wãween kein jilu, kwõn kajjitõk ippam̦ make: ‘Ta ko ij aikuj kõm̦m̦ani bwe en lapl̦o̦k aõ lõke Jeova?’
Lõke Wõt Jeova Meñe Kwõj Iion Menin Kapo Ko
5. Ñããt eo emaroñ pen ñan ad lõke Jeova?
5 Emaroñ pidodo ñan lõke kallim̦ur ko an Jeova kõn pedetaij eo ion lal̦ ak jerkakpeje eo, kõnke jekõn̦aan bwe men kein ren wal̦o̦k. Bõtab, emaroñ penl̦o̦k ñan ad lõke bwe jenaaj lukkuun m̦õn̦õn̦õ el̦aññe jej l̦oore naan in tõl ko an Jeova. Kiiñ Solomon ear je: “Kwõn lõke Jeova kõn aolepen bũruõm̦, im kwõn jab atartar ioon jel̦ãl̦o̦kjen̦ eo am̦. Kwõn kwal̦o̦k E ilo ial̦ ko am̦ otemjel̦o̦k, innãm Enaaj ba kajjien ial̦ ko am̦.” (Ken. 3:5, 6) Etke eoon kein rej kõnnaan kõn “ial̦”? ‘Ial̦ ko ad’ emaroñ jitõñl̦o̦k ñan men ko jej kõm̦m̦ani. Aolep men kein jej kõm̦m̦ani rej aikuj kalikar bwe jej lõke Jeova. Ewi wãween jemaroñ kwal̦o̦k ad lõke Jeova meñe jej iion menin kapo ko?
6. Ewi wãween jemaroñ kõjparok l̦õmn̦ak ko ad jãn men ko renana?
6 M̦oktata, jej aikuj kõjparok l̦õmn̦ak ko ad bwe jen maroñ jum̦ae menin kapo ko. (Riit Epesõs 2:3, UBS.) Innem, ewi wãween kwomaroñ kate yuk ñan kõm̦m̦ane men in? Jouj im lale wãween kein l̦alem: (1). Jar im kajjitõk jipañ jãn Anij. (Matu 6:9, 13) (2). Kõl̦mãnl̦o̦kjen̦ kõn waanjoñak ko ilo Baibõl̦ kõn ro rar roñjake Jeova im ro rar jab. Innem, lale ta ko rar wal̦o̦k ñan armej rein. (1 Kor. 10:8-11) (3). L̦õmn̦ak kõn joñan am̦ naaj bũrom̦õj im kab ro rejitõnbõro ippõm el̦aññe kwõnaaj kõm̦m̦ane juon men elap an nana. (4). Kwõn bar kõl̦mãnl̦o̦kjen̦ enaaj ewi wãween an Anij l̦õmn̦ak el̦aññe juon iaan ro ri karejeran ej kõm̦m̦ane juon men elap an nana. (Riit Sam 78:40, 41.) (5). L̦õmn̦ak kõn joñan m̦õn̦õn̦õ eo an Jeova el̦aññe kwõj jum̦ae menin kapo ko im kõm̦m̦ane men eo ejim̦we ilobwilij im ilo iien ko kwõj make iaam̦. (Sam 15:1, 2; Ken. 27:11) Kwõmaroñ bareinwõt kwal̦o̦k ñan Jeova bwe kwõj lõke wõt e ilo am̦ kõm̦m̦ani wõt men ko rejim̦we.
Lõke Anij Meñe Armej ro Rejjab Kõn̦aan Roñjake Ak Rej Jum̦ae
7. Ta mãlejjoñ ko Jeremaia ear jelm̦aiki? Im ta l̦õmn̦ak ko rar wal̦o̦k ñan e jet iien?
7 Elõñ iaan ro jeid im jatid rej kate er ilo jikin ko rej kwal̦o̦k naan ie meñe elukkuun pen. Ri kanaan Jeremaia ear mour ilo aelõñ in Juda m̦okta jãn an kar jeepepl̦o̦k, im ear lukkuun pen kwal̦o̦k naan ijin. Aolep raan ear iion elõñ mãlejjoñ ko ilo an kar pokake im kwal̦o̦k naan in ekajet ko an Jeova n̦ae armej in Juda. Juon iien, Baruk, ri jerbal eo etiljek m̦õttan, ear kõn̦aan kam̦õj e jãn jerbal eo aerro kõn an m̦õk. (Jerm. 45:2, 3) Jeremaia ear ke ebwer kõn men in? Eokwe, jet iien ear lukkuun m̦õk im bũrom̦õj. Ear ba: “En lia raan eo iar l̦õtak . . . Etke iar diwõj jãn lo̦je ñan lo eñtaan im bũrom̦õj, im bwe raan ko aõ ren jem̦l̦o̦k ilo jook?”—Jerm. 20:14, 15, 18.
8, 9. Ekkar ñan Jeremaia 17:7, 8 im Sam 1:1-3, ta eo jej aikuj kõm̦m̦ane bwe jen maroñ kajoor wõt ãinwõt kar Jeremaia?
8 Mekarta, Jeremaia ear jab ebwer. Ear wõnm̦aanl̦o̦k wõt im lõke Jeova. Kõn an kar lõke Jeova, ri kanaan in etiljek ear kile bwe em̦ool naan kein an Jeova ilo Jeremaia 17:7, 8: “E jeraam̦m̦an eo ej lõke Jeova, im Jeova enaaj an men in lõke. Ak enaaj ãinwõt juon wõjke em̦õj ekkat iturin dãn ko, ej jilkinl̦o̦k okran iturin juon river, im e ban mijak ñe ej wal̦o̦k bwil, ak bõlõken enaaj maroro; im e ban inepata ilo iiõ in ñũta, im e ban jako an kwal̦o̦k leen.”
9 Ãinwõt juõn wõjke ewãmourur im ‘em̦õj katõke iturin dãn ko,’ Jeremaia ear wõnm̦aanl̦o̦k wõt im jebar elõñ leen. Ewi wãween? Ear jab kõtl̦o̦k bwe ri jumae ro ren kabwer e. Ãinwõt an wõjke eo wãmourur kõn an pãd iturin dãn ko, Jeremaia ear kajoor wõt kõn an kar roñjake im pokake aolep men ko Jeova ear jiroñ e. (Riit Sam 1:1-3; Jerm. 20:9) Joñak in an Jeremaia elap an em̦m̦an ñan kõj kajjojo, elaptata ñan ro im rej jerbal in kwal̦o̦k naan ilo jikin ko reppen! El̦aññe kwõj jerbal ilo jikin rot kein, kwõn wõnm̦aanl̦o̦k wõt im lõke Jeova. Enaaj jipañ yuk bwe kwõn maroñ kijenmej ilo am̦ jerbal im ‘kwal̦o̦k kõn Etan.’—Hib. 13:15.
10. Ta jeraam̦m̦an ko ewõr ippãd, im ta kajjitõk ko jej aikuj kajjitõk ippãd make?
10 Jeova ej letok elõñ men ko ñan jipañ kõj kijenmej ium̦win apañ ko jej iioni ilo raan kein ãliktata. Juon iaan men ko ej letok ñan kõj ej Baibõl̦ eo. Doulul in ej ukote Baibõl̦ eo ilo jejjet im alikkar, im ej wal̦o̦k ilo elõñl̦o̦k kajin ko jãn kar m̦okta. Jeova ej kajerbale ri karejar eo etiljek im mãlõtlõt ñan letok katak ko An. Ear bareinwõt letok elõñ ri tõmak ro m̦õttad ilo iien kwelo̦k ko kajjojo wiik im iien kwelo̦k ko rel̦ap ñan kakajoor kõj. Kwõj kortokjen ke menin letok kein? Aolep ro me rej kortokjen men kein renaaj “al kõn lañlõñ an bõro.” Bõtab ro me rejjab pokake Anij renaaj ‘jañ kõn bũrom̦õj an bõro, im lim̦õ kõn an eddo bũruõer.’—Ais. 65:13, 14.
Lõke Anij Meñe Kwõj Inepata
11, 12. Ta eo jej aikuj kõm̦m̦ane meñe elapl̦o̦k nana ilo lal̦ in?
11 Ãinwõt kar kanaan kake, ej lõñl̦o̦k wõt jorrããn ko im rej wal̦o̦k ñan armej. (Matu 24:6-8; Rev. 12:12) Ilo an l̦apl̦o̦k jorrããn, elõñ armej rej kõtmãne bwe jikin jerbal ko rel̦ap, kien ko an armej, im kabuñ ko renaaj kamadmõdi apañ ko. Kobal̦o̦k ippãn men in, elap aer lõke ri mãlõtlõt ro im kein jerbal ko rekabeel ilo raan kein. Aolep men kein armej rein rej lõke reban namejelan aolep apañ im jorrããn ko. (Jer. 17:5, 6) Bõtab ro doon Jeova rejjab ãindein, kõnke ewõr juon eo im rej lõke. Rej lõke ‘Jeova Anij, aer Dekã ñan indeeo.’ (Ais 26:4) Ri jeje sam ear ba: “[Jeova] wõt aõ dekã im aõ lo̦mo̦o̦r; E aõ m̦õn ebbaar e utiej.” (Riit Sam Ko 62:6-9.) Ewi wãween jemaroñ kõm̦m̦an bwe Dekã in en ad jikin kone?
12 Jej kõm̦m̦an bwe Jeova en ad jikin kone ñe jej roñjake Naan ko An ilo Baibõl̦ eo, meñe ejjab aolep armej ro rej kõm̦m̦ane men in. (Sam 73:23, 24) Ñan waanjoñak, ekkã an armej ro ba: ‘Kwõn kate yuk jikuul bwe en lõñ am̦ jããn im utiej jerbal eo am̦.’ Bõtab, Anij ej letok naan in kakapilõk in: “Ro rej jerbal kin mweiuk ko an lõl in, ren einwõt ñe rejjab boub kaki. Bwe lõl in, ilo wãwen an bed kiõ, ejamin to an bed.” (1 Kor. 7:31, UBS) Jijej ear bar rõjañ kõj bwe jen likũti men ko an Anij m̦oktata ilo mour ko ad. Ilo wãween in, jenaaj ‘koorl̦o̦k m̦weiuk ñan kõj i lañ,’ ijo renaaj pãd wõt ñan indeeo.—Matu 6:19, 20.
13. Ekkar ñan 1 Jon 2:15-17, ta kajjitõk ko jej aikuj kajjitõk ippãd make?
13 Wãween aõ mour im pepe ko ij kõm̦m̦ani rej ke kalikkar bwe ij lukkuun lõke Anij im jab ‘men ko an lal̦ in’? (1 Jon 2:15-17) Elõñ jerbal ko raurõk iloan doulul in an Jeova im kwomaroñ kal̦apl̦o̦k ijo kun̦aam̦ ñan kõm̦m̦ani. Kwõn kajjitõk ippam̦ make, ‘Jem̦jerã eo aõ ippãn Jeova im jerbal kein rej ke aurõkl̦o̦k ippa jãn men ko an lal̦ in? (Pil. 3:8) Ij ke kate eõ bwe in kõm̦anm̦an ankilaan Anij, im jab jol̦o̦k elap iien ñan koorl̦o̦k m̦weiuk?’ (Matu 6:22) Anij ekõn̦aan bwe kwõn jel̦ã kun̦aam̦ im kabwe aikuj ko am̦ make, elaptata el̦aññe ewõr am̦ baam̦le. (1 Tim. 5:8) Bõtab, ekõn̦aan bwe kwõn lõke e, im jab likũt am̦ kejatdikdik ilo lal̦ in an Setan me m̦õttan jidik enaaj jako.—Hib. 13:5.
14-16. Ta jeraam̦m̦an ko jet ri pãlele rar iioni ke rar kõm̦m̦an oktak ko ilo mour ko aer?
14 Jen lale waanjoñak eo an Richard im Ruth, ruo ri pãlele im ewõr jilu nejierro ajri. Richard ear ba: “Iar make jel̦ã bwe ewõr aõ maroñ ñan kal̦apl̦o̦k ijo kun̦aaõ ñan Jeova. Iar jab aikuj inepata kõn wõnean mour bwe ear em̦m̦an jerbal eo aõ, bõtab ear ãinwõt ñe ij lel̦o̦k bween iien ko aõ ñan Jeova. Ãlikin am̦ro kar Ruth kõnono ippãn doon kake men in im jar, kõmro kar pepe bwe in kepaake bo̦o̦j eo aõ. Iaar kajjitõk ippãn el̦aññe imaroñ kãiietl̦o̦k raan in jerbal ko aõ. Ãlikin am̦ro jar kake men in im bwine joñan jããn eo kom̦ro ej aikuji ñan mour, kom̦ro Ruth kar pepe bwe in kadikl̦o̦k iien aõ jerbal ñan emen raan ilo juon wiik. Men in ear lukkuun pen kõnke epenl̦o̦k mour. Pepe in aõ ear em̦m̦an ippãn bo̦o̦j eo aõ, im iar jinoe men in ilo allõñ eo tok juon.” Ewi l̦õmn̦ak eo an Richard kõn pepe in an kiiõ?
15 Richard ej ba bwe meñe elukkuun dikl̦o̦k wõn̦ean, ak elukkuun lapl̦o̦k an iien ippãn kõrã eo pãlen im ajri ro nejin. Ear l̦apl̦o̦k an iien ñan kwal̦o̦k naan, ear lukkuun lõñl̦o̦k an ri katak Baibõl̦, im ear maroñ kal̦apl̦o̦k ijo kun̦aan ilo an jipañ tel congregation eo. Im kõnke el̦apl̦o̦k an iien ippãn ajri ro im emaroñ lale er, Ruth ej maroñ pioneer ilo jet allõñ. Richard ej ba: “Ij kate iõ joñan wõt aõ maroñ bwe in kõm̦m̦ane wõt men kein.”
16 Ruo ri pãlele etaer Roy im Petina rar maroñ kadikl̦o̦k iien jerbal ko aer bwe ren maroñ kal̦apl̦o̦k ijo kun̦aaerro ilo kwal̦o̦k naan. Leddik eo nejierro ej jokwe wõt ippãerro. Roy ej ba: “Ij jerbal jilu raan kajjojo wiik, im Petina ej jerbal ruo raan kajjojo wiik. Kimar em̦m̦akũtl̦o̦k im jokwe ilo juon em̦ edikl̦o̦k jãn m̦weo m̦okta. Kõmro ar pioneer m̦okta jãn an kar l̦otak l̦addik eo im leddik eo nejimro, bõtab ear jab jako am̦ro kõn̦aan pioneer. Ke ajri ro rar rũttol̦o̦k, kõmro ar maroñ jebl̦aak im bar pioneer. Jããn ejjab maroñ bõktok joñan m̦õn̦õn̦õ eo kõmro ej iione kiiõ.”
Kõtl̦o̦k bwe “Aenõm̦m̦an jãn Anij” En Kõjparok Bũruom̦
17. Meñe jejaje ta ko remaroñ wal̦o̦k ilo raan ko im̦aan, ewi wãween an eoon ko ilo Baibõl̦ kaenõm̦m̦an kõj?
17 Ejjel̦o̦k armej ejel̦ã ta eo emaroñ wal̦o̦k ilju im jekl̦aj, kõnke “jerata ej walok ñan jabdrewõt armij.” (Ekk. 9:11, UBS) Armej ro me rejjab epaake Anij rej lukkuun inepata kõn aer jab jel̦ã kõn ta ko remaroñ wal̦o̦k ilo raan ko im̦aan, bõtab jejjab aikuj ãindein. (Matu 6:34) Rijjelõk Paul ear je: “Kom̦win jab inepata kõn jabdewõt, a ilo men otemjej kõn jar im akwel̦ap kab kam̦m̦oolol, kajjitõk ko ami ren wal̦o̦k ñan Anij. Im aenõm̦m̦an jãn Anij, eo ej el̦l̦ã jãn jel̦ã otemjej, enaaj kõjparok bũruemi im lõmn̦ak ko ami.”—Pil. 4:6, 7.
18, 19. Ewi wãween an Anij kaenõm̦m̦an kõj? Jouj im kõmel̦el̦e.
18 Elõñ ro jeid im jatid me rar iion elap mãlejjoñ im apañ rar kile an Jeova kaenõm̦m̦an er. Juon kõrã ear ba: “Juon taktõ ear kajjioñ ko̦kor eõ bwe in bõk bõtõktõk. Ke ear deloñ ilo ruum̦ eo ear kajju ba, ‘Kwo bwebwe kõn am̦ jab bõk bõtõktõk.’ Iar lukkuun jar ippa make ñan Jeova, im ear lukkuun kaenõm̦m̦an eõ. Iar eñjake aõ lukkuun kajoor. Meñe iar lukkuun m̦õjn̦o̦ kõn an jabwe bõtõktõkiõ, ak iar maroñ kõmel̦el̦e jãn Baibõl̦ eo ñan taktõ eo kõn unin aõ jab kõn̦aan bõk bõtõktõk.”
19 Jet iien Anij emaroñ jipañ kõj ilo an kajerbal ri tõmak ro m̦õttad bwe ren kaenõm̦m̦an kõj. Ej bareinwõt letok katak ko ilo iien ko rejejjet. Bõlen em̦õj am̦ roñ an juon jeid ak jatid ba, “Elukkuun jejjet katak in ñan ña! Iar lukkuun aikuji, im ãinwõt ñe rar je ñan ña!” Jekdo̦o̦n ñe emaroñ oktakl̦o̦k mour ko ad ak aikuj ko ad, aolep iien Jeova enaaj kalikar an yokwe kõj el̦aññe jej lõke wõt e. Enaaj kõm̦m̦ane men in kõnke jej ãinwõt jiip ro an im jej bõk ãt eo etan.—Sam 100:3; Jon 10:16; Jerb. 15:14, 17.
20. Etke ri karejar ro an Jeova renaaj jokwane im aenõm̦m̦an ñe jukjuk im pãd in an Setan enaaj jako?
20 Aolep men ko ilo lal̦ in an Setan im armej ro rej lõki renaaj jako ilo naaj raan in kwi eo an Jeova. Jããn, m̦weiuk im men ko jet armej ro rej kaurõki reban kõjparok er. (Zep. 1:18; Ken. 11:4) Jeova wõt ej ad jikin kone im jemaroñ ‘lõke ñan indeeo.’ (Ais. 26:4) Innem jen kwal̦o̦k ad lukkuun lõke Jeova ikijen ad l̦oor ial̦ ko an rejim̦we. Jen wõnm̦aanl̦o̦k wõt ilo ad kwal̦o̦k kõn ennaan eo an Aelõñ eo an meñe armej ro rejjab kõn̦aan roñjake ak rej jum̦ae. Jen bareinwõt lõke Jeova ikijen ad likũt aolep inepata ko ad ippãn. El̦aññe jej kõm̦m̦an ãindein, jenaaj ‘lo jokwane im mour ilo aenõm̦m̦an im jeban lõl̦ño̦ñ.’—Ken. 1:33.
Kwõmaroñ Ke Kõmmel̦el̦e?
Ewi wãween jemaroñ kwal̦o̦k bwe jej lõke Anij
• meñe jej iion menin kapo ko?
• meñe armej ro rejjab kõn̦aan roñjake ak rej jum̦ae?
• meñe jej iion inepata?
[Pija ilo peij 13]
Jenaaj m̦õn̦õn̦õ el̦aññe jej l̦oor naan in tõl ko an Anij
[Pija ilo peij 15]
Jeova ej ãinwõt “juon dekã” eo ej pãd ñan indeeo