Jehovah Ej Jibañ Ro im Rej Liki E
1 Elõñ armij rej watõk jããn, kajur, im kabel ko an armij einwõt key ko ñan lo tõbrak. (Sam 12:4; 33:16, 17; 49:6) Bõtab, ñan ro rej mijak Jehovah im rej liki e Bible eo ej kamol bwe “E air jibõñ im air likepijñõk.” (Sam 115:11) Jen etale ruo men ko me jej aikwij kwalok ad liki Jehovah kaki.
2 Einwõt Christian Ri Karejar Ro: Jabdewõt ien ñe jej kõmman katak ko ilo congregation eo ak katakin armij ilo jerbal in kwalok nan, jej aikwij atartar ion Anij eo ad. Lemnak kin joñok eo an Jesus. Meñe e kar Nejin Anij, ear jab liki meletlet ak maroñ eo an make ak ear atartar wõt ion Jemen ilañ. (Jon 12:49; 14:10) Elaplok ad aikwij in kõmman eindein! (Ken. 3:5-7) Kajerammõn eo wõt an Jehovah enaj kõmman bwe jibadbad ko ad rettã ren kaibujuij e im bõktok tokjen ñan ro jet.—Sam 127:1, 2.
3 Jej kwalok ad liki Jehovah ilo ad jar kin tel eo an im kin jibañ jen jitõb kwojarjar eo an. (Sam 105:4; Luk 11:13) Bareinwõt, jej kwalok ad liki Anij ilo ad kõmman bwe men ko jej katakin kaki ren bedbed ion Nan eo an, Bible eo. Ennan eo ie ewõr an kajur ñan jelet buruen armij im ukõt wãwen air mour. (Hib. 4:12) Ñe jej “korijer kin kajur eo Anij ej lelok,” ej kaibujuij Jehovah.—1 Pit. 4:11.
4 Jerbale Abañ ko: Jej aikwij bareinwõt reilok ñan Jehovah kin jibañ ñe jej jelmae ijjibed im abañ ko. (Sam 46:1) Ñan wanjoñok, juõn boss emaroñ makoko in kõtlok ad kakije jen jikin jerbal eo ñan bed ilo juõn assembly, ak jemaroñ jelmae juõn wãwen ebin ilo mour in family eo ad. Jej kwalok ad liki Jehovah ilo ad jar ñan e im jerbale nan in tel ko ej litoki ikijen Nan im dolul eo an. (Sam 62:8; 119:143, 173) Ilo air kõmmane men in, ri karejar ro an Jehovah rej lo jibañ eo an ilo mour ko air.—Sam 37:5; 118:13, 16.
5 Jehovah make ej kamol ñan kij: “Ej jerammõn armij eo ej liki Jehovah, im tõmak e.” (Jer. 17:7, New World Translation) Jen kwalok ad liki e ilo men otemjej jej kõmmani!—Sam 146:5.