Jej Aikuj Ke Riit Baibõl̦?

Kwõnañin ke kar l̦õmn̦ak in riiti Baibõl̦ ak kwaar jab kõnke kwaar bõk ejja l̦õmn̦ak ko wõt an rein kar kwal̦o̦k kaki itulõñ? Elõñ remijak in riit Baibõl̦. Ak kwaar ke jel̦ã bwe Baibõl̦ emaroñ jipañ eok bwe kwõn lo m̦õn̦õn̦õ ilo mour n̦e am̦? Im kwaar ke jel̦ã bwe elõñ wãween ko kwõmaroñ kõm̦m̦ani bwe kwõn m̦õn̦õn̦õ im itoklimo ilo am̦ riit Baibõl̦? Kokõn̦aan ke jel̦ã ewi wãween an Baibõl̦ maroñ jipañ eok?

L̦õmn̦ak m̦õk kõn naan kein an jet iaan ro rar bõk tokjãn ke rar jino riiti Baibõl̦.

Ezekiel, eo im ej kab 20 jim̦a an iiõ, ej ba: “Ilo kar m̦okta, iar ãinwõt juon armej eo ej ettõr kõn juon wa im ejaje ia eo ej jibadekl̦o̦k. Bõtab il̦ak riit Baibõl̦, men in ear jipañ eõ bwe in jel̦ã ta ko imaroñ kõm̦m̦ani ilo mour e aõ. Ewõr naanin kakapilõklõk ko ie me rej jipañ eõ kajjojo raan.”

Frieda, eo im bar 20 jim̦a an iiõ, ej ba: “Iar juon eo ebõkjab. Bõtab aõ riit Baibõl̦ ear jipañ eõ bwe in kadikl̦o̦k aõ bõkjab. Men in ear kõm̦m̦an bwe en pidodol̦o̦k an ro jet epaake eõ, im kiiõ elõñl̦o̦k m̦õtta.”

Juon kõrã etan Eunice me 50 jim̦a an iiõ ej ba men in kõn Baibõl̦, “Ej jipañ eõ bwe in juon armej em̦m̦an im bwe in oktak jãn m̦anit ko rejjab lukkuun em̦m̦an ij kõm̦m̦ani.”

Rein im bar elõñ milien armej rar loe bwe aer riit Baibõl̦ ear jipañ er bwe en em̦m̦an wãween mour ko aer. Emaroñ bar ãindein kwe. (Aiseia 48:17, 18) Am̦ riit Baibõl̦ emaroñ jipañ eok ñan (1) kõm̦m̦ani pepe ko rejim̦we, (2) kõm̦m̦an bwe en wõr m̦õttam̦ me em̦ool aer yokwe eok, (3) kadikl̦o̦k am̦ inepata, im (4) enaaj jipañ eok ñan jel̦ã m̦ool eo kõn Anij. Erkein jet iaan men ko Baibõl̦ emaroñ jipañ eok kaki. Kõnke naanin kakapilõklõk ko ie rej itok jãn Anij, reban ko̦kkure eok el̦aññe kwõnaaj l̦oori. Anij eban letok ñan kõj naanin kakapilõklõk ko renana.

Men eo eaorõk in ej bwe kwõn jino riiti. Ta ko remaroñ jipañ eok bwe en pidodol̦o̦k am̦ jino riiti Baibõl̦ im bwe en l̦apl̦o̦k am̦ itoklimo ilo am̦ riiti?