Kãlet Katak ko Rej Kõjeroro Itoklimo ko an Armij
1 Einwõt ri kõjeroro ro rej kejbarok wãwen air alej mõri ko air, elõñ ri kwalok ro im pioneer ro ilo congregation eo rej lõñliñ kin elap tõbrak ko ilo air kajerbal katak ko rar kãleti jen Imõniaroñroñ im Awake! ñõn kaitoklimoen armij ro ilo territory eo air. Rej bebe kin wõn ro elaptata renaj kõnan konono jet katak ko ilo magazine ko. Ewi wãwen rej kõmmõn men in?
2 Mokta rej readi kajjojo magazine jen kil eo tu-man ñõn kil eo tulik. Inem rej kajitõkin ir make, “Kain armij rot renaj itoklimo in read kajjojo katak ko? Inem rej kate ir ñõn lolok armij rein renaj mõnõnõ in readi katak eo. Ñe rej lemnak bwe juõn ian copy ko ilo magazine eo enaj lap an kaitoklimoen armij ro ilo territory eo air, rej kalaplok order eo air.
3 Elap an Armij Kautiej Magazine ko Ad: Juõn ian armij ro rej subscribe kin magazine ko ad eo ej jerbal kin magazine eo ebuñbuñ tata ilo Nigeria ear ba kin Awake!: “Jerammõn kin magazine eo elaptata an kaitoktoklimo ilo lõl in.” Juõn armij eo elap an kõnan readi magazine ko ad ear lo: “Rej dekã aorõk ko rekabwilõñlõñ in meletlet ejej uan an aorõk! I maroñ lo jabdewõt katak ko ij itoklimo kake rej etale ilo peij ko ilo juõn ian magazine kein.”
4 Magazine kein rej etale elõñ kain katak ko, ekoba Bible eo, makitkit ko an lõl in, inebata ko kin mour in family, abañ ko kin mour ibben don, bwebwenato in lõl in, science, wãwen an men in mour im men in eddek ko mour, ñõn kwalok kin jet iair. Emol juõn armij enaj laplok an kõnan read juõn men me ewor kõtan ñõn aikwij ko an, wãwen mour eo an, ak jerbal eo an. Kin ad konono ibben elõñ armij, kajjojo iair ewor kõnan im abañ ko air make, kãlet katak ko rejejjet ñõn kaitoklimoen armij jej iion ir elap an bolemen.
5 Lale ta eo ear walok ke ruo Ri Kennan ro rar lelok juõn September 8, 1996, magazine in Awake! ñõn juõn ri jeje news. Ear je: “Mokta jen iar maroñ ba bwe ijjab itoklimo, juõn iair ear kobaik: ‘Ewor juõn katak ikijen American Indian ro. Kim jela bwe elap am kar jeje kake katak eo.’ ” Ear bõk magazine eo im, ilo ien mõñã in jibboñ, ear readi katak eo ikijen Indian ro, im tokelik ear kamol bwe “e kar juõn katak emõntata” im “ear lukkun mol.”
6 Ta eo Ej Kaitoklimoen Armij ilo Territory eo Am? Ta eo kwar lo ilo magazine ko ilo alliñ ko rej kab motlok me emaroñ kaitokimoen ri lale mõn wia ko im ri business ro ilo territory eo am ak ñõn ri turõm, ri jerbal ro mõttam, im ri school ro mõttam? Ta eo enaj lap an kaitoklimoen ri jojomar ro, ri kaki ro, counselor in family ak school ro, ri lelok kakabilek ñõn ri school ro, ro rej lelok social service, im ri kejbarok ejmour ro? Lemnak kin armij ro kwoj kwalok nan ñõn ir ñe kwoj etale kajjojo magazine naj lewõj ial ko remõntata ñõn kajededlok nan in mol eo.
7 Ñe kwoj lo juõn armij eo ej kwalok an itoklimo ilo juõn kain katak ilo Imõniaroñroñ ak Awake! im ej bõk magazine eo, kwomaroñ ba: “Ñe ewor juõn katak ilo magazine ko renaj itok me ij lemnak kwonaj itoklimo kake, inaj mõnõnõ in bõktok juõn am copy.” Kwomaroñ kobaik armij eo ñõn lãjrak in armij ro kwoj jeblak ñõn ibbeir ñõn lelok magazine ko rekãl. Men in ej einlok wõt ta eo rar kõmmõne ñõn bõk juõn nan in kir eo ej bellok ñõn kõmmõn bar jeblak ko ibben armij ro elap air itoklimo kin jet kain katak ko me rej walok ilo magazine ko ad.
8 En Wor Juõn Am Mejenkajjik ilo Jitõb: Jet yiõ ko remotlok, juõn emaan eo ear lap an lemnak kin jerbal eo an ear bõk juõn magazine in Awake! kin juõn katak ear itoklimo kake. Bõtab, armij in elap an itoklimo ilo kabuñ ear bareinwõt readi Imõniaroñroñ, eo ear wor juõn katak me ear kamakit e ñõn etale tõmak eo an ilo Trinity. Jiljino alliñ ko tokelik ear baptais! Kin men in, kwon jab ãliklik in bwebwenato ibben ro rej mõnõnõ in readi magazine ko ad kin katak ko ilo Bible. Kwomaroñ kwalok brochure eo Ta Eo Anij Ekõnan Bwe Jen Kõmmõne? im bõk jejjo wõt minute ko ñõn bwebwenato kin juõn katak kajjojo ien kwoj bar jeblak ñõn lelok magazine ko rekãl.
9 Lemnak kin wõn ian ro kwoj jeblak ñõn ibbeir im ro kwoj kõmmõn business ibbeir me enaj kamolol in bõk magazine in Imõniaroñroñ im Awake! ko rekãl. Inem kate yuk ñõn jibadõk ir. Kebak armij ñõn joñan eo kwomaroñ ibben magazine kein raorõk. Im jab meloklok bwe ñe kwoj kate yuk ñõn jibañ elõñlok armij ñõn readi magazine ko ad, kwoj ‘jolok kijõm na ion dren ko.’ Tokelik, kwomaroñ lo tõbrak in lo bwe renaj ri kalor ro mõttam ilo ran ko rej itok.—Ekl. 11:1, 6.