I Kõnan Ijjino juõn Bible Study!
1 Elõñ iad jaar kwalok juõn kõnan kin juõn Bible study, im kin un ko remõn. Jerbal in kõmman Bible study ej ijo jej kõtõbrak mejenkajjik eo ad ñan kõmman ri kalor ro rekãl. (Mat. 28:19, 20) Ak elõñ iad jaar etal iumin elõñ alliñ ko, bõlen yiõ ko, ilo ad jab lo lañliñ eo ejej uan me ej itok jen ad katakin mol eo ñan juõn armij. Ta eo jemaroñ kõmman kin men in ilo December? Kinke jenaj kwalok book eo Mour Indrio ilo alliñ in, jemaroñ kõmman juõn jibadbad ejej uan ñan kajerbale ñan ijjino Bible study ko rekãl.
2 Kajenolok Juõn ak Elõñlok jen Juõn Weekend ko: Jej rejañ aolep ñan kajenolok jet ien ilo alliñ in ñan lemnakelok air ijjino juõn Bible study ekãl. Ro rej tel Congregation Book Study ren kãlet weekend eo (ko) elaptata kin karõk in inem kõkkar kumi ko air ñan kõmman juõn jibadbad elap ñan kõmman bar jeblak ko.
3 Bõktok record in bar jeblak ko ibbam ñan kwelok kein ñan kwalok nan. Inem jeblak ibben aolep ro rar kwalok air itoklimo, bõk book ak magazine ko, ak bed ilo kwelok ko. Kõmman kajjojo bar jeblak ibben mejenkajjik eo ñan ijjino juõn Bible study.
4 Kõmman juõn Demonstration kin juõn Katak kin Bible: Ilo kwelok ko ñan kwalok nan emwij kãlete, ren kwalok juõn demonstration emõn keboje, im kwalok kin ewi wãwen remaroñ ijjino juõn katak kin Bible ñe rej kõmman juõn bar jeblak. Kwomaroñ ba: “Elõñ armij ewõr juõn Bible, ak rejjab kile bwe ewõr iloan uak ko ñan kajitõk ko raorõk kij aolep jej jelmae ilo mour. [Kwalok kobban book eo Mour Indrio, im konono unin tel ko jen katak 1, 4, 7, 8, im 11.] Ilo am kajerbal book in jibañ katak Bible in tarrin juõn awa ilo juõn week, ilo jejjo wõt alliñ ko kwomaroñ bõk juõn melele kin irinekatak ko ilo Bible. Elañe kwo kõnan kãlet juõn katak, I naj mõnõnõ in kwalok kilen an jerbal program in.” Elañe armij eo ej makoko kin an boub schedule eo an, kamelele bwe ewõr juõn program ekadu lok. Kwalok Jen Kõmmõne brochure eo, im ba bwe kwoj mõnõnõ in katak juõn katak ekadu ibben iumin 15-30 minute ko ilo juõn week.
5 Elañe kij aolep jej kõmman juõn jibadbad eburukuk ñan ijjino Bible study ko im elañe jej jar ñan Jehovah ñan kajerammõn jibadbad ko ad, emol jenaj lo Bible study ko rekãl! (1 John 5:14, 15) Elañe kwo kõnan juõn Bible study, ien in emaroñ ien eo emõn ñan am ijjino juõn Bible study.