Kwoj Kamolol ke Kin Men ko Rekwojarjar?
1 Ñe rej kajitõk ibbed elañe jej kamolol kin men ko rekwojarjar, ekkã ad naj uak ilo mõkaj aet! Ibwiljin men in letok ko rekwojarjar an Anij me jej kamolol kaki ej buñ-pãlok in ekan ko lor jitõb jej bõki jen ri karejar eo etiljek im meletlet. Men in enaj mol ilo “Komin Ri Kõmanmõn Nan eo an Anij” District Convention eo. Ijo jenaj lañliñ kin nan in jiroñ ko raorõk im kamao eo emãnãn me elap ad aikwiji. Ewi wãwen jemaroñ kwalok kamolol jen buruõd kin men in letok in ekwojarjar?
2 Nehemiah ear rejañ ro rar kate ir ñan kõkãl worwor in Jerusalem bwe ren ‘jab jerwane mweo imõn Anij eo air.’ (Neh. 10:39, New World Translation) Rainin, “mweo imõn” Jehovah ej karõk eo an kin kabuñ. Bwe jen jab jerwane karõk in, jej aikwij bed ilo kwelok ko im lukkun liñõre katak ko, ilo wãwen in jej kwalok ñan Jehovah bwe jej kaorõk men in letok ko an. (Hib. 10:24, 25) Ta karõk ko jej aikwij kõmmani kiõ ñan kwalok bwe jej lukkun kamolol kin men in walok in ekwojarjar?
3 Bed ilo Aolep Ien Kwelok ko: Kij aolep jej aikwij karõk ñan bed ilo kajjojo ien kwelok ilo convention eo. Kwoj karõk ke ñan itok ilo mõkaj im bed ñan jar eo eliktata ilo Sunday? Elañe eindein, enaj lap am bõk jerammõn ko. Emaroñ jab aolep ien enaj bidodo ñan bed ilo juõn convention. Kõmman oktak ilo jikin job eo am emaroñ aikwij am jutak bin. Ial in ito-itak emaroñ jab jejjet ñan kõnan eo am ien otemjej. Ak jab kõtlok bwe men kein ren kabwer yuk jen am bed ilo convention eo. Elañe kwoj aikwij kõmman oktak ko, reilok ñan Jehovah ñan tel yuk, ilo am jelã bwe enaj kajerammõn jibadbad ko am ñan bed ilo aolepen program eo.
4 En Ekkar Mwilõm im Baotokõm ilo Convention eo: Ilo jabdewõt jikin jej bed ie, mwilid, nuknuk ko ad, im baotokid rej kwalok kake kij im Anij eo jej kabuñ ñan e. Men in elap an alikar ilo kuktok ko relap an armij ro an Anij, ijo elõñ armij rej kalimjek kij. Ñe ej emõn joñok eo ad, ej bõktok nebar ñan ãt eo etan Jehovah. (1 Pit. 2:12) Bõtab, mwil ak kõmman ko renana an jet remaroñ katton etan Anij im armij ro an. (Ekkl. 9:18b) Ilo ad kememej bwe armij rej ekajete dolul eo ad im Anij eo jej kabuñ ñan e ikijen mwilid en kar kamakit kij bwe jen ‘kõmõn men otemjej ñõn aibujuij an Anij.’—1 Kor. 10:31.
5 Nuknuk im baotok ko rekkar ren alikar jimor ilo ien im elikin ien convention eo. Brother im sister ro rej aikwij kejbãrok bwe ren jab kõnak nuknuk ko rejakkar im buñbuñ ilo lal, ko rej kwalok jitõbõn lal in im rej kõmman an bin an armij kile kij bwe jej oktak. Sister ro rej aikwij kejbãrok bwe style im aetokin likko im nuknuk ko air ren ekkar. (1 Tim. 2:9, 10) Meñe jej bed ilo convention eo, mõñã ilo juõn restaurant, ak kaikujkuj ilo juõn mõn wia, ien otemjej jej aikwij kwalok bwe jej ri karejar ro an Anij, im ilo wãwen in jab lõkatipi jabdewõt armij.—2 Kor. 6:3.
6 Enaj wõr juõn ien baptais ilo convention eo, im ilo April 1, 1995, Watchtower ilo kajin English, peij 30, ej kamelele kin lemnak eo jej aikwij kwaloke ilo ien eo. Ej ba bwe “jej aikwij watõk baptais einwõt juõn ien jej aikwij kwalok kautiej ekkar. Ejjab juõn ien ñan le jen joñan an kwalok eñjake ko, ñan party, ak ñan lamõjmõj. Ak ijo tu-rãjet ejjab juõn ien lianij bareinwõt.” Enaj lukkun jakkar an ro renaj baptais ñan kõnak nuknuk in tutu ko ejjab bwe an kalibubu enbwiniir, meñe maan ak kõrã. Kin men in, aolep rej aikwij kalmenlokjen jimor kin aorõkin im mõnõnõ in baptais in Christian.
7 Peter ej kakememej kij kin ‘ta men eo komin wõjake ilo kõmõn wãnik im kabuñ rokwojarjar.’ (2 Pit. 3:11) Kimij kejatdikdik bwe nan im kõmman ko ad ilo convention eo renaj jibañ ro emol burueir ñan jelã im kabuñ ñan Anij eo ad elap, eo ej tellokin bõk nebar im aibujuij.—1 Kor. 14:24, 25.
8 Madmõde Jerammõn ko: Jej jañnuwaade Nan eo an Anij, ilo ad jelã bwe ikijen e jemaroñ eddeklok ñan lomor. (1 Pit. 2:2) Ad bed ilo district convention eo im roñjake program eo naj jibañ kij kajjojo ñan kakajurlok tõmak eo ad ilo Nan eo im ilo wãwen in enaj emõnlok ad maroñ jumae nitbwil ko an Satan. Ilo ad kõmmane, jenaj kwalok ñan Jehovah im aolep ro rej kalimjek kij bwe jej lukkun kamolol kin men ko rekwojarjar im “je jab ian ro rej jenliklik . . . a ian ro rej tõmak ñõn lomorir.”—Hib. 10:39; 12:16; Ken. 27:11.
9 Jemaroñ reimanlok ñan ien eo Jehovah Anij enaj kabellok window ko ilañ im lutoktok iod wõtleplep in jerammõn ko ilo jitõb. (Mal. 3:10, NW) Kõmman bwe en mejenkajjik eo am bwe kwon bed ilo “Komin Ri Kõmanmõn Nan eo an Anij” District Convention eo jen jinointata in program eo ñan jar in kajemlok eo im ba “Amen!” Kwonaj mõnõnõ bwe kwar bed!