Kwoj Make Bõk Tokjen ko Remõn ke?

¹ Elõñ million armij ro rainin rekõnan jelã ewi wãwen remaroñ anjo ion abañ ko im lañliñ kin mour ko relemõnõnõ. Elap air read self-help book ko (book ko me rej tel armij ñan air make kakõmõnmõnlok wãwen ko ibbeir) ak bukõt kumi ko ak dolul ko ñan bõk kakabilek kin ewi wãwen remaroñ kakõmõnmõnlok mour ko air. Bõlen jet remaroñ jitõñlok ñan jet tokjen ko rar bõki. Ak, ilo lale joñan emõnin mour ko rainin, armij rar katak ke ñan lañliñ kin mour eainemõn im kajuburu ikijen program in katak ko an armij? Elukkun jab mol men in!​—1 Kor. 3:18-20.

² Ijo tu-rãjet, ri Kõmanmõn eo ad ej letok ilo ejelok wõnãn kamelele ko elap an jibañ ñan jabdewõt armij ej mõnõnõ in roñjake. Jehovah ekõnan bwe aolep armij ren bõk tokjen jen katak ko an. Ear letok Nan in kakõrmol eo an ñan tel armij ilo wãnik, im ear kõmman bwe ren keañ kin news eo emõn kin Ailiñ eo ilo aolepen lal in. (Sam 19:7, 8; Mat. 24:14; 2 Tim. 3:16) Juõn mour emol an mõnõnõ ewõr kõtan ñan bokake kien ko an Jehovah.​—Ais. 48:17, 18.

³ Tel eo an Jehovah elaplok an emõn jen eo ej itok jen self-help book ko ak karõk ko ñan kakõmõnmõnlok mour ko air me lal in ej litoki. Jemaroñ bõk jibañ eo emol im tokjen ko indio elañe jej kortokjen men in letok ko an Jehovah einwõt kar kõlajraki ilo Nan eo an im dolul eo an ej katakini.​—1 Pit. 3:10-12.

⁴ Am Make Bõk Tokjen jen Kwelok ko an Congregation eo: Rainin, Jehovah ej kwalok itoklimo eo emol ñan katakin kij kin ial ko an, im jej bõk tokjen ilo ad bokake nan in jiroñ ko an. Kwelok ko ad lalem ilo week otemjej rej letok men in kamol kin itoklimo eo eyokwe an Jehovah. Ñe jej bed ilo kwelok ko an congregation eo, jelãlokjen eo ad kin Anij ej laplok. Jej katak kin wãwen jemaroñ kejbãrok kij make jen men eo enana ilo ad ruaklok ñan Jehovah. Ilo wãwen in jenaj mõnõnõ lok.

⁵ Ebar wõr men ko jet. Ilo kwelok ko an congregation eo emaroñ “laplok” buruõd. (2 Kor. 6:13) Men in ej kitibuj ad jelã kajjen ro jet ilo congregation eo. Jej bõk tokjen jen ad kõketak don, einwõt Paul ear jeje kake ilo letter eo an ñan ro ilo Rome. (Rom 1:11, 12) Ke ear jeje lok ñan ri Hebrew ro, elap an kar kakkõl ro me rar kamineneik ir bwe ren jerwane air koba ibben ri Christian ro mõttair.​—Hib. 10:24, 25.

⁶ Juburu eo ekalañliñ kin mour ewõr kõtan ñan ad itoklimo ilo tokjen eo an ro jet. Jej bõk rejañ ñan bukõt wãwen ko ñan kamõnõnõik ro jet. Kin men in, kwelok in Christian ko ad emol rej ñan tokjen eo ad make im an ro jej ejaak juõn kõtan jimjãn jimjatin emõn ibbeir. Men eo ej aikwiji ad kõmmane ej ñan bõk kunad kin aolepen buruõd.

⁷ Ri jilek Paul ear bõkmantak ejja point eo wõt ilo kakabilek eo an ñan Timothy ke ear je: “Kwon mõke kamineneiklok yuk ilo jerbal in Anij.” (1 Tim. 4:7) Jemaroñ kajitõkin kij make: ‘Ij kamineneik iõ make ke? Ij katak ke ñan bõk tokjen jen men ko ij roñjake ilo kwelok ko an congregation eo?’ Uak ko ad naj aet elañe jej liñõre ta eo jej roñjake ilo kwelok ko im kate kij ñan jerbale ta eo jej katak kake. Kin mejen tõmak, jej aikwij maroñ lo ellã lok jen brother ro rej kwalok katak ko im lo Jehovah einwõt ri Kaki eo Elap an armij ro an.​—Ais. 30:20.

⁸ Theocratic Ministry School im Service Meeting eo: Kwelok kein ruo kar eiki ñan jibañ kij ñan ad keie ilo jerbal in kwalok nan eo an ri Christian ro. Theocratic Ministry School eo ej jejjet ñan karõk in​—juõn school me ri school ro rej keini air bõk nan in jiroñ ko im nan in kakabilek ko. Ewõr ibbam ien eo emõn ñan kwalok am wõnmanlok einwõt juõn ri konono ilobwilij im einwõt juõn ri katakin kin Nan eo an Anij. Ak ñan bõk tokjen eo elaptata jen school eo, kwoj aikwij kadeloñ etõm, bed, keini am bõk kunam, im kwalok katak eo am kin aolepen buruõm. Am bõk im jerbale nan in kakabilek ko rej lewõj naj jibañ yuk ñan kõmman wõnmanlok.

⁹ Service Meeting eo ej katakin kij kin aorõkin jerbal in kwalok nan an ri Christian ro im ej kwalok kin wãwen jemaroñ bõk kunad ilo jerbal eo ñan kõmman ri kalor ro. Kwe im family eo am komij bõk tokjen ke jen ta eo rej kwalok kake ilo kwelok kein ruo? Ruo Christian ri belele ro rar lo: “Ilo juõn Service Meeting, kim ar roñ bwe jej aikwij etale unin tel eo einwõt juõn family. Ilo ien eo kimij jañin kõmmane men in, ak kiõ jej.” Ewi wãwen rar bõk tokjen? Rej kamol: “Kim lo bwe bwebwenato ko am ñe kimij mõñã ej laplok an kalañliñ. Ejako am akwel ilo ien mõñã in jota.” Ajiri jidik rej bõk tokjen ke jen kwelok ko? Aet. Jinen ej ba: “Ej alikar bwe kwelok ko elap an jelet ajiri ro nejimro. Juõn ien kim ar jibwe an ladik eo nejim jiljino an yiõ konono riap. Ak kwelok eo ilo ejja week eo wõt, katak eo kein kajuõn kar ikijen riap. Ilo an mejen kwalok an wõr ruõn kin bwid eo, ladik eo ear reilok ñan jemen im ilo jook ear jijet ilo jea eo an. Ear bõk point eo, im kar ejelok abañ ko kin men in jen ien eo.”

¹⁰ Juõn sister eo ej pioneer ej ba emõnõnõ bwe ilo Service Meeting eo rej letok nan in rejañ ko ñan kakõmõnmõnlok jerbal in kwalok nan eo ad. Etke? Lio ej kamelele: “Ewõr juõn men ij iminene in kõmmane. Jet ien ij lemnak bwe men eo rej rejañ kake ilo Ad Jerbal Ñan Ailiñ Eo ejamin jerbal. Ak ilo Service Meeting eo, ke ij roñ bwe jej aikwij kate kij kõmmane, ij obrak kin kijejeto ñan jerbale nan in rejañ ko. Ej kõmman bwe jerbal in kwalok nan en kaitoktoklimo!” Elikin jet week ko in an jerbale nan in rejañ eo ñan ijjino juõn Bible study ilo ien lolok eo mokta, ear jinoe juõn katak ilo ien lolok eo mokta ibben juõn jiroñ eo ear jar kin jibañ.

¹¹ Ñe kwoj roñjake juõn katak me ej kobaik nan in kakabilek eo ilo Bible kin jokãlet ko kwoj kõmmani kin men ko am make, kwoj eñjake ke bwe Jehovah ej konono kajju ñan yuk? Eindein kar eñjake an juõn brother. Ear ba: “Ejjabto ilo juõn kwelok, ekar wõr juõn katak me juõn brother ear bwebwenato kin kain men in kamõnõnõ rot ko rar ekkar ñan ri Christian ro im kain rot kar jakkar. Ekkã aõ kõnan aluij boxing ilo television. Ak elikin kwelok eo, iar bebe bwe ikkure in ear jejjet ñan men in kamõnõnõ ko rar jakkar ñan ri Christian ro. Inem iar jolok aõ aluij kain program in.” Aet, meñe brother in ear kaddek juõn kõnan kin juõn men elej, ilo ettã buru ear emmakit ñan tel eo an Jehovah.​—Sam 11:5.

¹² Public Meeting, Katak in Imõniaroñroñ, im Congregation Book Study eo: Public talk ko jej roñjake kajjojo week rej kitibuj elõñ kain katak ko ilo Bible. Ta tokjen ko kwoj bõki jen katak kein? Juõn Christian leo belen ear kwalok kin tokjen ko ear bõki: “Juõn public talk ear kwalok kin aolepen leen jitõb ko. Ri konono eo ear kwalok bwe, ikijen e make, ñan an kaddeklok leen jitõb kein, ear kãlet juõn ian kadkad kein im jerbale iumin juõn week. Ilo jemlokin week eo, ear lemnak kin tõbrak in an kar kwalok kadkad eo ilo makitkit ko an ran otemjej. Inem ear jerbale bar juõn kadkadin ilo week eo juõn. Lemnak in ear emõn ibba im iar jino make kõmmane.” Ear emõn an jerbale men eo kar katak kake!

¹³ Katak in Imõniaroñroñ eo ej katakin kij ñan jerbale nan in kakabilek ko ilo Bible ilo kajjo wãwen ko ilo mour. Men in ej jibañ kij ñan kejbãrok ad ainemõn ilo lemnak im buru meñe jej jelmae inebata ko an mour. Katak in Imõniaroñroñ eo ej bareinwõt letok kamelele ko rekãl kin mol ko rej alikar lok. Ñan wanjoñok, jaar jab bõk tokjen ke jen lelkan in katak ko ilo August 1, 1999, katak in Imõniaroñroñ (May 1, 1999, Watchtower) etan: “Men Kein Otemjej Re Naj Jejit,” “Eo Ej Konono ilo Buk En Melele,” im “Kwon Ekkõl im Niknik!” Ewi wãwen katak kein rar jelet yuk? Ikijen makitkit ko am kwoj kwalok ke bwe kwoj bõk ñan buruõm nan in kakkõl eo an Jesus kin ilju im jeklaj? Kwoj manjabpopo ke ñan jelmaik melejoñ ko rej bed iman ñe jej lo “men eo e kanuij nana im elap an kokkure jutõk iloan jikin kwojarjar”? (Mat. 24:15-22) Mejenkajjik ko am im ial in mour eo am rej kwalok ke bwe, ejjab korlok in mweiuk ko, ak kokwojarjar ãt eo etan Jehovah ej men eo eaorõktata ñan yuk? Ilo Katak in Imõniaroñroñ, jejjab katak ke ñan ad make bõk tokjen ko kiõ?

¹⁴ Lemnak kin joñan eo jej katak ilo Congregation Book Study kajjojo week. Kiõ jej katak kin brochure eo Ta Eo Anij Ekõnan Bwe Jen Kõmmõne? Ilo ien eo jej katak brochure in, jaar jab lo ke an eddeklok tõmak eo ad kajjojo week? Ej kakajurlok jimjera eo ad ibben Jehovah im ej keboj kij ñan mour indio.

¹⁵ Jehovah Ej Katakin Kij ñan Lañliñ im Mour: Jej kejbãrok kij jen ad metak buru ñe jej bokake kien ko an Anij. Bareinwõt, jej lo kitien in lañliñ in mour. Ilo ad lor tel eo an Jehovah, jej erom ro rej bõk kunair ilo jerbal eo an, jab ri lale wõt. Im ro rej kõmman jerbal eo an Anij rej armij ro remõnõnõ.​—1 Kor. 3:9; Jes. 1:25.

¹⁶ Lemnak kin ewi wãwen kwonaj jerbale men ko kwoj roñjaki ilo kwelok ko an congregation eo. (Jon 13:17) Karejar ñan Anij ilo kijejeto, kin aolepen buruõm. Lañliñ eo am naj jiõplok. Mour eo am naj emõnlok, naj laplok an wõr aorõkin. Aet, kwonaj make bõk tokjen.