April​—Ien eo ñan ‘Jerbal im Kate Kij’

¹ Week ko mokta im elikin Kwojkwoj in Kejota eo rej juõn ien emõn ñan an armij ro an Jehovah kalmenlokjen. Ej juõn ien ñan kalmenlokjen kin ta eo mij eo an Christ ear kõtõbrake im ñan lemnak kin kejatdikdik eo letok in Anij me bõtõktõkin Christ emwij katorloke ear kabellok ñan armij. Ñe kwoj lemnakelok kin April 19 ilo yiõ eo lok, ta eo kwoj kememeje? Kwomaroñ ke kememej mejen armij ro kwar loi ilo joten eo ilo ien iman rak eo? mejatoto eo eobrak kin men ko lor jitõb me ear walok ilo Kwojkwoj eo? katak eaorõk eo ear bedbed ion Bible im jar ko rar walok jen buru? Bõlen kwar bebe ñan kwalok ilo juõn wãwen elaplok am kamolol kake yokwe eo me Jehovah im Jesus rar kwalok ñan yuk. Kalmenlokjen rot in ej jelet yuk ilo wãwen et eo kiõ?

² Ealikar bwe armij ro an Jehovah rej kwalok kamolol eo air me emaroñ walok ilo elõñlok wãwen ko jen baj nan ko wõt. (Kol. 3:15, 17) Elaptata, ilo April eo lok jaar kate kij ñan kwalok ad kamolol kin men in letok ko an Jehovah kin lomor ilo ad kalaplok jerbal in Christian eo ad ñan kwalok nan. Oran auxiliary pioneer ro ear 23 percent laplok jen oran eo elaptata mokta iumin Ra eo ilo Guam. Jibadbad ko air, ekoba ibben ko an ri keañ ro jet kin Ailiñ eo, rar walok ilo laplok ko rekãl kin awa ko, lelok magazine ko, im kõmman bar jeblak ko. Lañliñ eo ad ear laplok ke jaar lo an ijjino elõñlok Bible study ko im juõn oran ekãl kin ro rar bed ilo Kwojkwoj in Kejota eo!

³ Emol, mol in kejatdikdik eo ad ej kamakit kij ñan jerbal. Ej einwõt an kar ri jilek Paul je: “Kin men in kimij jerbal, im kate kim, bwe kimij kejatrikrik kim kin Anij emour, Eo ej kõnan lomoren armij otemjej, im E naj lomoren ro rej liki E.”​—1 Tim. 4:10.

⁴ Ilo ien Kwojkwoj in Kejota eo ilo yiõ in, enaj ewi wãwen am kwalok tõmak eo am kin men in letok ko an Jehovah kin mour? Ilo April eo lok jaar lo oran eo elaptata in ri keañ ro kin Ailiñ eo ekar wõr iumin Ra eo ilo Guam. Emaroñ ke le jen oran in ilo April in? Emaroñ tõbrak mejenkajjik in. Ak kajjojo ri kwalok ro, ro emwij air baptais im ro rejañin, renaj aikwij bõk kunair. Elõñ ro rekãl bareinwõt remaroñ tellokiir ñan bõk kunair. Kin men in, ñe kwoj karõk ñan jerbal im kate yuk ilo alliñ in April, lemnak kin wãwen ko kwomaroñ kamakit ro jet, ekoba ro rekãl im jidik wõt an wõr air iminene, ñan jerbal ibbam.

⁵ Jibañ Jet ñan Bar Jino Air Jerbal: Elañe kwoj jelã kin jet me rar jab kwalok nan iumin juõn ak ruo alliñ, bõlen kwomaroñ rejañ im kir ir ñan jerbal ibbam ilo jerbal in kwalok nan. Elañe jet ilo congregation eo rej inactive (ro eto air jab kwalok nan), elder ro renaj karõk ñan lolok im rejañ ir ñan bar jinoe ilo alliñ in April.

⁶ Kij aolep aikwij wõnmanlok im kajitõk kin jitõbõn Jehovah ñan kakajur kij ilo jerbal eo an. (Luk 11:13) Ta eo jej aikwij kõmmane ñan bõk jitõb eo? Konono Nan in kakõrmol eo an Anij. (2 Tim. 3:16, 17) Jej aikwij bareinwõt “roñjake men ko Jitõb ej ba ñõn ekklisia ko” ilo ad bed ilo aolep kwelok ko lalem week otemjej. (Rev. 3:6) Kiõ ej ien eo emõn ñan jibañ ro rej jakkeini air kwalok im ro rej inactive ñan kakõmanmanlok manit in katak ko air im ñan keini air bed ilo kwelok ko. (Sam 50:23) Jej kõmman men in ilo ad lale wõt mour in jitõb eo ad. Ak, ebar wõr juõn men jej aikwiji.

⁷ Ri jilek Peter ear kamelele bwe Anij ej lelok jitõb kwojarjar eo an “ñõn ro rej bokake E.” (Jerbal 5:32) Bokake rot in ekoba ad bokake kien eo ñan “kwalok ñõn armij rõn, im kennan” ilo juõn wãwen elet. (Jerbal 1:8; 10:42) Kin men in, meñe emol bwe jej aikwiji jitõbõn Anij ñan kakajur kij ñan kwalok nan, ej bareinwõt mol bwe ñe jej kwalok kõnan eo ad ñan kabuñburuen Jehovah, enaj laplok an jibañ kij. Jej aikwij jab kajettokjen aorõkin ad bõk buñten nee ko mokta kin bokake ilo mõnõnõ!

⁸ Jibañ Ro Redik: Ro jemen im jinen, kom ar lo ke men in kamol ko bwe ro nejimi rekõnan konono ñan ro jet kin mol eo? Rar etal ibbam ke ilo jerbal in kwalok nan? Ej emõn ke mwiliir? Elañe aet, jab kõttar. Kebak juõn ian ro uan Congregation Service Committee eo, im lale elañe ajiri eo nejimi ej tellokin an juõn ri kwalok ilo alliñ in April. (Lale Our Ministry book eo, peij 99-100.) Komij aikwij kile bwe ro nejimi remaroñ bõk kunair ilo juõn wãwen elap ñan nebar Jehovah ilo Kwojkwoj in Kejota eo ilo yiõ in.​—Mat. 21:15, 16.

⁹ Ien otemjej juõn sister ilo Georgia, U.S.A., ear rejañ ledik eo nejin ñan konono ibben ro jet kin Jehovah. Ilo yiõ eo lok, ke ledik eo ear bõk kunan ilo jerbal in kwalok nan ibben jinen, ear lelok juõn Jen Kõmmõne brochure eo ñan juõn emaan im ilo tu-kadu kameleleik e kin kobban brochure eo. Leo ear kajitõk: “Jete am yiõ?” Ledik eo ear ba: “Jiljilimjuõn.” Leo ear bwilõñ in lo joñan an kar mũlal ennan eo an. Leo ear koba ibben Ri Kennan ro an Jehovah ke ear dik ak ear jab bõke einwõt wãwen mour eo an. Ejjabto, rar kõmman juõn Bible study ibben leo, lio belen, im ledik eo nejin.

¹⁰ Elõñ ro redik ededelok air ri kwalok ro, im jej mõnõnõ in kamao ibbeir ñe rej jerbal ibbed ilo jerbal in kwalok nan. Ajiri rein remaroñ kamakit im rejañ ro jet dettair wõt. April ej bareinwõt juõn ien emõn ñan kajjojo family ko ñan kakajurlok lukluk ko air im kalek mour in jitõb eo air ilo air jerbal ibben don ilo jerbal eo ekwojarjar. Ro bõran family ko ren tel ilo men in.​—Ken. 24:27.

¹¹ Jibañ Ro Rekãl: Ta kin ro rekãl kwoj katak Bible ibbeir? Remaroñ ke bõk kunair ilo jibadbad eo ejej uan ilo April in? Bõlen rar kwalok kõnan eo air ñan jiroñ ro jet kin ta eo rar katak kake ke kom ar etale katak 11, paragraph 14, ilo book in Knowledge, ak katak 15, paragraph 18 ilo book eo Mour Indrio. Elañe kwoj ebak ñan jemlokin book eo Mour Indrio, bojak in bwebwenato ilo alikar kin men in ñe kwoj etale katak 30, paragraph 11, ijo ej ba: “Kamol wõt am lukkun yokwe Jeova im armij ro mõttam ilo am bõk aoleben kwonam ilo jerbal in lomor in kwalok nan im katakin. (1 Korint 9:16; 1 Timothy 4:16)” Men in enaj ke jibañ ñan kamakit ro kwoj katak ibbeir?

¹² Ri katak eo am ej tõmak ke Nan eo an Anij? Ej jerbale ke nan in kakabilek ko ilo Bible? Ej mour ke ekkar ñan kien ko rekwojarjar? Ej bed ke ilo kwelok ko an congregation eo? Ekõnan ke karejar ñan Jehovah Anij? Inem etke kwojjab rejañ e ñan konono ibben elder ro bwe ren maroñ lale elañe ej tellokin erom juõn ri kwalok ejañin baptais im jerbal ibbam ilo alliñ in April? (Lale Our Ministry book, peij 97-9.) Ilo wãwen in emaroñ jino lo kin mejen wãwen eo dolul eo an Jehovah ej jurake ilo jibadbad ko an ñan karejar ñan Jehovah.

¹³ Emol, jet ri katak ro emõkajlok air wõnmanlok jen ro jet. Kin men in, ilo burukuk ibben nan in tel eo ilo June 2000 Ad Jerbal Ñan Ailiñ Eo, peij 4, paragraph 5-6, elõñ rej katak book eo kein karuo ibben armij ro rej kwalok air itoklimo ak rej aikwiji jibañ ñan bõk kunair ilo makitkit ko ad. Jej kejatdikdik wõt bwe rein emol burueir renaj erom ri kalor ro remol an Christ, “elañe ilo juõn ien ekadu ak ilo juõn ien eaetok.” (Acts 26:29, New World Translation) Ak, elañe ien eo kwar katak ibben rein kajjojo jemaroñ watõke einwõt “juõn ien eaetok,” ien Kwojkwoj eo ilo yiõ in ejjab juõn ien emõn ke bwe ri katak eo am en jino an kwalok mũlalin kamolol eo an kin katok in binmour eo an Christ?

¹⁴ Wãwen eo ñan Jibañ Ir Bõk Kunair: Elap ad maroñ katak kin jibañ ro retellokiir ñan jino air kwalok nan ilo ad etale kin wãwen eo Jesus ear kamineneik ro jet. Ear jab baj bukõt juõn jar in armij im jiroñ ri jilek ro an ñan jino air konono. Mokta ear kalikar kin aikwij eo kin jerbal in kwalok nan, rejañ ir bõk juõn lemnak emol, inem ear lelok ñan ir jilu men ko rar aikwiji: juõn mõttan, juõn territory, im juõn ennan. (Mat. 9:35-38; 10:5-7; Mark 6:7; Luk 9:2, 6) Emaroñ eindein am kõmmane. Jekdon elañe kwoj jibañ nejõm make, juõn ri katak ekãl, ak juõn me etto an kar jab kwalok nan, enaj ekkar bwe kwon kõmman juõn jibadbad ejej uan ñan jibadõk mejenkajjik ko tok.

¹⁵ Kalikar Aikwij eo: Kalikar ñan armij eo kin aorõkin jerbal in kwalok nan. Kwon bõk juõn lemnak emõn kake. Kwalok jet experience ko kin tõbrak ko an congregation eo ilo jerbal in kwalok nan. Kwalok jitõb eo me Jesus ear konono kake ilo Matu 9:36-38. Rejañ armij eo ebojak in erom juõn ri kwalok ak juõn eo ej inactive (etto an jab kwalok nan) bwe en jar kin kunan make ilo jerbal in kwalok nan im bareinwõt tõbrak kin jerbal eo ibelakin lal.

¹⁶ Rejañ Armij eo ñan Lemnak Kin Ien ko Relõñ Rej Bellok ñan Kwalok Nan: Kwalok kin maroñ eo ñan kwelok ibben kumi in book study eo ñan kwalok nan jen em ñan em. Bõkmantak kin maroñ eo an ñan bwebwenato ibben ro nukin im ro mõttan ak konono ibben ri jerbal ak ri school ro mõttan ilo ien kakije ilo ien mõñã in raelep. Ñe ej ito-itak ilo bus ak taxi ko, ekkã an maroñ jino juõn bwebwenato ilo an baj kwalok an itoklimo kin passenger ro jet. Ñe jej bõk buñten nee eo mokta, men in ekkã an kabellok juõn ien emõn ñan kwalok nan. Emol elõñ ien ko remõn rej bellok ñan jaketo-jaketak kejatdikdik eo ad ibben ro jet “jen ran ñõn ran.”​—Sam 96:2, 3.

¹⁷ Ak, enaj emõn elañe kwe im ri kwalok eo ekãl komin jerbal ibben don jen em ñan em ilo ien emõkajtata. Elañe kwar likit juõn mejenkajjik imam ñan kalaplok am jerbal ilo April, kajitõk ibben eo ej lale territory ko elañe ewõr juõn territory ebak me kwomaroñ jerbal ie. Elañe ewõr, men in enaj kabellok ien ko remõn ñan am let in jerbale. Ñan wanjoñok, ke emwij am kwalok nan ak kwoj etal ñan kwelok ko ak jikin ko jet, kwomaroñ lo juõn armij ej bed ilo juõn em ear jako armij ro ie ak ear kwalok an itoklimo mokta. Elañe ekkar, kwon lolok e ilo ien eo enaj emõntata. Men in, tokelik, enaj kõmman an wõr juõn eñjake in wõr tõbrak im lañliñ ilo jerbal in kwalok nan.

¹⁸ Keboje juõn Ennan Emejaja: Ej juõn men ñe juõn armij ekõnan jaketo-jaketak ennan in Ailiñ eo, ak ej bar juõn men ñan an eñjake an liki wãwen eo ej kwaloke, elaptata elañe ej juõn ri kwalok ekãl ak etto an kar jab kwalok nan. Jibañ ro rekãl im ro rej inactive ñan kebojak ej juõn men elukkun wõr tokjen. Service Meeting ko im kwelok ko ñan kwalok nan remaroñ lelok lemnak ko remõn, ak ejelok juõn men emõnlok jen an make kebojak.

¹⁹ Ewi wãwen kwomaroñ jibañ ro rekãl kebojak ñan jerbal in kwalok nan? Jino kin juõn ennan in lelok magazine, im kõmman bwe en lamwan im kadu! Kajitõk ibbeir ñan lemnak kin men in walok ko ilo news me renaj kaitoklimoen armij ro ilo territory eo, inem kabukõt juõn point ilo juõn ian magazine ko rekãl. Kamelmel ennan eo ibben don, im kajerbale ilo jerbal in kwalok nan ilo ien eo emõkajtata.

²⁰ Kaddeklok Maroñ eo ñan Kõmman Laplok ko ilo Ran ko Renaj Itok: Oran ro rar bed ilo Kwojkwoj in Kejota eo ilo yiõ eo lok ibelakin lal ear laplok jen 14.8 million armij. Oran ro rej report einwõt ri kwalok ro ear laplok jidik jen jiljino million armij. Ej melelen men in bwe tarrin 8.8 million armij ear bwe air itoklimo in itok ñan program in ejej uan an aorõk im ijo rar roñ kamelele eo kin juõn ian katak ko relap ilo Bible. Rar jino jelã kajjen jet iad, eo emaroñ kar kabwilõñ ir ilo emõn. Elõñ iair elap air nebar kij, jabawõt ñan jerbal eo ad ibelakin lal, im jojomare kij iman ro jet. Jar in elap ej kwalok kin maroñ eo ñan kõmman laplok ko ilo ran ko renaj itok. Ta eo jemaroñ kõmmane ñan jibañ ir ñan kõmman wõnmanlok?

²¹ Jarlepju in ian ro rekãl me rej bed ilo Kwojkwoj eo rar itok kinke rar bõk juõn nan in kir jen juõn iad. Ekkã an melelen men in bwe rej jelã kajjen juõn ian armij ro rej kwelok. Elañe juõn armij ej bed ilo kwelok eo kin an emmakit ñan nan in kir eo ad, ewõr eddo eo ibbed ñan karuwaineneik im jibañ e ñan bõk tokjen jen program eo. Kinke enaj obrak mõn kwelok eo, jibañ e ñan lo juõn jikin an jijet. Kõtlok bwe en kajerbal juõn Bible, im komro jimor maroñ lale book in al eo am. Uake jabdewõt kajitõk ko an. Itoklimo eo am emãnãn emaroñ lap an kaddeklok itoklimo eo an. Emol, kij aolep jej bõk eddo in​—elañe jej lo juõn armij jejaje kajjen, ilo mãnãn karuwaineneik e im bwebwenato ibben jidik.

²² Bed ilo Kwojkwoj eo emaroñ lap an jelet lemnak eo an juõn armij. Kin an kar itok ñan kwelok eo emaroñ melelen bwe ejañin lo men eo ej bukõte ilo jikin ko jet im bwe jej lelok ñan e juõn men ej lemnak ej aikwij lukkun etale. Kamelele eo kin men in letok eo ekabwilõñlõñ kin binmour eo emaroñ juõn men elap ñan juõn armij eo ejjab melele kin yokwe eo ejelok joñan an Jehovah. Emaroñ mõkaj an kile bwe jej einjuõn​—jej kwalok mol, joij, yokwe, im kautiej. Mõn kwelok eo eoktak jen ta eo ej iminene in loe ilo mõn jar ko ijo rej kajerbal ekjap ko im mantin kabuñ ko me ejelok tokjeir. Ro rekãl renaj lo bwe ro rej kwelok rej itok jen aolep wãwen mour in armij im jejjab leto-letak plate in jabawõt. Air lo men kein emaroñ lap an kamakit ir ñan jeblak.

²³ Elikin Kwojkwoj eo, juõn armij ej aikwij bojak ñan lelok jibañ ñan kajjojo ri kãl ej itok ñan kwelok eo. Elañe kwar kirtok ro rekãl, ewõr ibbam juõn eddo ejej uan an aorõk. Mokta jen air etal, kõmman bwe ren jelã kin kwelok ko jet ilo Kingdom Hall eo. Kwalok unin tel in katak eo ilo Public Talk in tok. Kwalok kin jikin eo im awa eo an Congregation Book Study eo ebaktata ñan mweo imwiir. Tokelik, lelok ñan ir juõn copy in book eo Mour Indrio, im kejelãik ir bwe bwebwenato eo ilo week in April 30 ej “Wõn Ro Rej Etal ñõn Lõñ, im Etke?” Kamelele kin etke aolepen congregation eo enaj bed ilo district convention eo me rar karõke ñan an walok ilo ran kane tok.

²⁴ Karõk ñan lolok ir ilo mweo imwiir. Kõmman bwe en wõr ibbeir copy ko kin Jen Kõmmõne brochure eo im Knowledge book eo elañe jab book eo Mour Indrio, me renaj katakin ir kin irinekatak ko ilo Bible. Elañe rejañin jino katak, tilmaake juõn Bible study. Rejañ ir ñan konono Jehovah’s Witnesses brochure eo, eo ej kwalok ilo alikar kin wãwen eo jej jerbal einwõt juõn dolul. Rejañ ir ñan aluij cassette in aluij ko ad, einwõt Our Whole Association of Brothers. Kwalok kajjiir ñan ro jet ilo congregation eo, elaptata family ko rej jokwe ebak ñan ir. Ilo alliñ kane tok, lolok rein rekãl; kirtok ir ñan bed ilo kwelok ko ñe circuit overseer eo enaj lolok congregation eo ak ñe enaj walok juõn circuit assembly ak special assembly day. Lelok ñan ir ien ko remõn ñan kwalok ir make einwõt ro “ar likit ir bwe ren mour in drio”!​—Jerbal 13:48.

²⁵ Ta ko Elder Ro Remaroñ Kõmmani: Tõbrak in jibadbad ko relap ilo jerbal in kwalok nan ilo alliñ in April, ilo juõn joñan elap, enaj wawa ion elder ro. Elañe kwoj juõn ri tel in juõn book study, kõmman juõn lajrak kin men ko kwomaroñ kõmmani ñan jibañ aolep ilo kumi in book study eo am ñan bõk kunair ilo makitkit ko rejej uair. Ewõr ke jabdewõt ro kar karõke ñan kumi eo am me redik, rekãl, rejakeini, ak rej inactive? Lale elañe ro jemen im jinen, pioneer ro, ak ri kwalok ro jet rar bõk buñten nee ko ñan jibañ ir. Lelok jabdewõt jibañ ko kwomaroñ make lelok. Juõn sister eo ear jakkeini an bõk kunan ilo jerbal in kwalok nan iumin ruo yiõ ko ear kajerbal elõñlok jen 50 awa ko ñan kwalok nan ilo April ilo yiõ eo lok. Ta ear kõmman oktak eo ñan e? Lio ear ba bwe kar lolok ko rekõketak an elder ro.

²⁶ Elder ro im ministerial servant ro rej aikwij jerbal ibben don ñan kõmman bwe en bwe territory, magazine ko, im book ko ñan alliñ ne tok. Remaroñ ke karõk ñan kõmman kwelok ko jet ñan kwalok nan? Elañe aet, kejelãik ir kin karõk ko ejej uair. Ilañin men ko jet, ilo jar ko am ilobwilij im ko am make, kajitõk kin kajerammõn eo an Jehovah ñan alliñ in jerbal eo ad elaplok kin Ailiñ eo.​—Rom 15:30, 31; 2 Tess. 3:1.

²⁷ April ilo yiõ eo lok ilo juõn congregation ilo North Carolina, elder ro rar lukkun rejañ ri kwalok ro ñan kalaplok jerbal in kwalok nan ko air. Ilo kwelok ko kajjojo week, rar rejañ ri kwalok ro ñan lale elañe rar maroñ deloñ ilo jerbal in auxiliary pioneer. Ilo jabdewõt ien emõn, elder ro im ministerial servant ro rar konono ilo kijejeto kin air kõmman bwe April en alliñ eo emõntata. Tokjen men in, 58 percent in ri kwalok ro, ekoba aolep elder ro im ministerial servant ro, rar pioneer ilo alliñ eo!

²⁸ Lañliñ in Bõk Kunam kin Joñan Am Maroñ: Ta naj jerammõn ko ad ilo ad “jerbal im kate [kij]” ilo jerbal in kwalok nan? (1 Tim. 4:10) Ikijen jerbal eo ekijejeto an congregation eo air ilo April eo lok, elder ro kar konono kaki ilañ rar je: “Brother im sister ro ekkã air konono kin joñan an kajurlok eñjake in yokwe im air ebake don jen ien eo rar jino kalaplok jerbal in kwalok nan eo air.”

²⁹ Juõn brother jodikdik me ewõr joñan an maroñ kamakit enbwinin ear kõnan bõk kunan ilo jerbal eo ejej uan ilo alliñ in April ilo yiõ eo lok. Ikijen an kõmman karõk ko im kin jibañ eo an jinen im ro jein im jatin maan im kõrã ilo jitõb, ear lañliñ kin an kar maroñ auxiliary pioneer ilo alliñ eo. Kar ewi eñjake eo an kin experience eo? Ear ba: “Ilo ien eo moktata ilo aõ mour, Iar eñjake aõ einwõt juõn emaan emaroñroñ.”

³⁰ Ejelok bere bwe Jehovah elap an kajerammõn ro rej kaorõk jerammõn eo air ñan konono kin iroij eo an. (Sam 145:11, 12) Ke jej kememe mij eo an Iroij eo ad, jej melele bwe jerammõn ko kin tiljek eo ekwojarjar naj laplok ilo ran ko renaj itok. Ri jilek Paul ear jañnuwaade ãjinkij eo kin mour indio. Ak, ear jelã bwe men in ear jab juõn men ear maroñ bed bajjek im kejatdikdik kake. Ear je: “Ñõn eo ij bareinwõt jerbal im kate iõ ekar ñõn jerbal eo An, ej jerbal ilo ña kin elap kajur.” (Kol. 1:29) Jehovah, ikijen Jesus, ear kakajur Paul bwe en maroñ kõtõbrak jerbal in lomor eo, im E maroñ kõmman eindein ñan kij rainin. Kwonaj iion ke men in ilo alliñ in April ilo yiõ in?

[Box eo ilo peij 3]

Wõn eo Kwo Maroñ Rejañ ñan Kwalok Nan ilo April?

Nejõm?

Juõn ri katak Bible?

Juõn eo ear oktak im inactive?