“Roñjake im Kalaplok Am Jela”
1 Book in Jabõn Kennan Ko ej kwalok kin meletlet einwõt ej lamõj: “Komin eoroñ, bwe I naj konono men ko remõn; ij walõñi tiõ inem re naj walok men ko re jime. Aõ, jela bebe, im meletlet emõn. . . . Komin eoroñ iõ; bwe re mõnõnõ wõt ro rej kejbãrok ial ko aõ. Bwe jabrewõt eo ej lo iõ, ej lo mour, im e naj lo joij in Jeova.” (Ken. 8:6, 14, 32, 35) Nan kein ej emõn air kwalok kin nan in kibel ko rej kõttar kij ilo “Ri Katakin Ro Kin Nan eo an Anij” District Convention eo.
2 Emwij air katak kin aikwij ko an dolul in jimjãn jimjatin eo ibelakin lal, im kar keboj program in convention eo ñan jerbale aikwij kein. Nan in kibel ko ilo jitõb im nan in rejañ ko rekeie me renaj litoki, elañe jej jerbali, renaj jibañ kij ñan mõnõnõ, ñan kejbãrok juõn kõtan eo emõn ibben Jehovah, im ñan bedwõt ilo ial in mour indio. Emol, ewõr un eo emõn ibbed ñan “roñjake im kalaplok [ad] jela.”—Ken. 1:5.
3 Mokta Jen Program eo: Ñan bõk tokjen eo elaptata jen men ko renaj kwaloki, jej aikwij bed kadede ilo jea ko ad im keboj lemnak eo ad ñe ej jino program eo. Men in ej aikwij ad karõk ilo emõn men ko ad. Juõn men eaorõk ej ñan jino ilo ien eo emõkaj tata. En mõkaj ami kiki ilo boñin eo juõn. En emõn awa in ami ruj bwe en bwe ien ñan aolep ilo kumi eo ñan kebojak im mõñã. En mõkaj ami itok ñan jikin kwelok eo bwe kom maroñ kabukõt jikin ami jijet im lale men ko komij aikwiji mokta jen an naj jino program eo. Kejam ko renaj bellok ilo 8:00 a.m., im program eo enaj ijjino ilo 9:30 a.m. kajjojo ran.
4 Kinke un eo elaptata ñan kwelok ibben don ej ñan nebar Jehovah “ibwiljin armij otemjej,” kajjojo mõttan in program eo en bellok ilo juõn wãwen me ej kaibujuij Anij eo ad. (Sam 26:12, New World Translation) Kin un in, rej rejañ aolep ñan air jijet mokta jen air kejelã kin al in kabellok eo. Men in ej errã ibben nan in rejañ eo ilo Jeje ko: “A ren kõmõn men otemjej ekar im ilo lajrõk.” (1 Kor. 14:40) Ta melelen men in ñan kij kajjojo? Ñe kwoj lo an chairman eo jijet ion stage eo ilo ien eo rej kajañ al ko, kwon rol ilo mõkaj ñan jea eo am. Men in enaj kamaroñ yuk ñan bõk kunam in al kin aolepen buruõm ilo al eo ej kabellok kajjojo program, im leliñlok nebar ñan Jehovah.—Sam 149:1.
5 Ilo Ien Program eo: Ezra ear “kabin buruen in kabukot kien Jeova, im bwe en kõmõne.” (Ezra 7:10) Ewi wãwen ad maroñ keboj buruõd ñan bõk nan in tel ko Jehovah ej litoki. Ñe kwoj lale unin tel in katak ko rej kõlajraki ilo program eo, kajitõkin yuk make, ‘Ta eo Jehovah ej jiroñ iõ ikijen program in? Ewi wãwen I maroñ kajerbal kamelele ko ñan tokja make im family eo aõ?’ (Ais. 30:21; Ep. 5:17) Wõnmanlok im kajitõk kin kajitõk kein ilo aolepen convention eo. Kwon je point ko me kwonaj kajerbali. Bõk ien ñan bwebwenato kaki ilo jemlokin program eo ilo kajjojo ran. Men in enaj jibañ yuk ñan kememej im jerbale kamelele ko.
6 Kalmenlokjen iumin elõñ awa ko emaroñ juõn men ebin kõmmane. Ta eo emaroñ jibañ kij ñan bõprae bwe men ko jet ren kamad lemnak eo ad? Kortokjen kajur in mejed. Ilo juõn joñan elap, men eo jej kalimjeke ej debij lemnak eo ad. (Mat. 6:22) Kin men in, kwon jumae kõnan eo ñan karol bõram ñe ej wor keroro ak makitkit ko. Kwon kalimjek wõt ri konono eo. Kwon lale Bible eo am make ñe ej readi juõn eon, im en bellok wõt ñe rej etale eon eo.
7 Yokwe in Christian enaj kamakit kij ñan bõprae ad kamad ro jet ñe ej wõnmanlok program eo. (1 Kor. 13:5) Ien in ej “juõn ien ikõñ” im ñan roñjake. (Ekkl. 3:7) Kin men in, bõprae am konono im makitkit ñe ejjab juõn men in aikwij. Kadiklok ien eo kwoj aikwij etal ñan mõn kebojak ilo am karõk lok iman. Kwon jab mõñã ak idak mae ien eo kar karõke, elañe ejjab kitibuj abañ ko relap ikijen ejmour. Ro rej bõktok cellular phone ko, peijr ko, camcorder ko, im camera ko ren jab kajerbali ilo juõn wãwen eo me enaj kamad ro jet. Ro jemen im jinen ren karõk bwe aolepen family eo—ekoba jodikdik ro—ren jijet ibben don bwe en emõn air maroñ lolorjake ro nejiir.—Ken. 29:15.
8 Yiõ eo lok juõn elder eo ear bed ilo kwelok ko relap iumin elõñ yiõ ko ear kile: “Kar eñjake eo aõ in bwe convention in ear kabwilõñlõñ kin bar juõn un. Enañin aolep ri kwelok ro rar je note ko, ekoba ajiri ro redik. Ear kamõnõnõik buruõ ñan lo men in. Rar kortokjen Bible ko ke ri konono ro rar kajitõk bwe ren kabelloki ñan jet eon ko.” Roñjake ilo wãwen rot in emol ej tellokin nebare. Ejjab bõktok tokjen ko ñan kij im ri kwelok ro mõttad wõt ak ilõñin men otemjej ej kaibujuij Ri Katakin eo ad Elap, Jehovah Anij.—Ais. 30:20.