Jen Roñjake ñan Katak

1. Etke jenaaj aikuj kate kõj bwe jen maroñ roñjake im bõk tokjãn aolep katak ko ilo naaj kweilo̦k el̦ap eo?

¹ M̦õttan jidik jenaaj kõm̦m̦ane kweilo̦k el̦ap eo ad (district convention) ñan iiõ eo 2013. Kar jol̦o̦k el̦ap iien ñan lale im kããlõt katak ko me renaaj ekkar ñan aikuj ko an ro jeid im jatid ipel̦aakin lal̦. Kwõnañin ke kõm̦m̦an oktak ko ñan iien ko am̦ bwe kwõn maroñ pãd im roñjake aolep katak ko me renaaj wal̦o̦k ilo iien in? Elõñ kain men ko remaroñ kõm̦ad kõj ilo kweilo̦k ko rel̦l̦ap. Kõn men in, jenaaj aikuj kate kõj bwe jen maroñ roñjake aolep katak ko ilo naaj kweilo̦k el̦ap in. Etke? Eokwe, kõnke enaaj jaad aetokl̦o̦k iien kweilo̦k in jãn iien ko jekõn kweilo̦k ilo im̦õn kweilo̦k ko ad. Bareinwõt, ekkã ad naaj m̦õk kõn wõt ad jibadekl̦o̦k jikin kweilo̦k eo ak kõm̦m̦ani men ko jet. Innem ta eo enaaj jipañ kõj bwe jen kanooj roñjaki im bõk tokjãn aolep katak ko renaaj wal̦o̦k?​—Dut. 31:⁠12.

2. Ta eo jemaroñ kõm̦m̦ane ñan kõpooj bũruod ñan kweilo̦k eo el̦ap?

² M̦okta jãn Kweilo̦k eo El̦ap: Kwõmaroñ lale bũrookraam̦ eo ñan kweilo̦k eo el̦ap ilo Web site eo ad, www.jw.org. Ilo bũrookraam̦ in, epãd aolep taitõl̦ in katak ko im juon ak ruo eoon ko me renaaj wal̦o̦k ilo kajjojo katak kein. El̦aññe ewõr ad Internet, jemaroñ lale lo̦k im̦aan katak ko rej pojak in wal̦o̦k ñan kõpooj bũruod ñan kweilo̦k eo el̦ap. (Ezra 7:​10) Ilo iien Kabuñ eo an Baam̦le eo am̦, kwõn bwebwenato ippãn baam̦le eo am̦ kõn katak ko ilo bũrookraam̦ eo. Ilo wãween in, renaaj reim̦aanl̦o̦k im kijoororetok iien in.

3. Ta eo enaaj jipañ kõj ñan kanooj roñjake ilo iien kweilo̦k eo el̦ap?

³ Ilo Iien Kweilo̦k El̦ap: M̦okta jãn an jino kweilo̦k eo, em̦m̦an bwe jen etal ñan em̦ jidikdik eo ñe ej menin aikuj. Ilo wãween in, kwõban aikuj etal ilo iien an wal̦o̦k katak ko. Jouj im kune cell phone eo nejũm̦ bwe en jab kõm̦ad eok ak ñe eitok wõt bwe kwõn kõn̦aan jejel̦o̦k ñan ro jet lukwõl̦pãn kweilo̦k. Ak ta el̦aññe ej menin aikuj ñan jab kune cell phone eo nejũm̦? Eokwe, jouj im kõm̦m̦an bwe en ejjel̦o̦k ainikien. El̦aññe kokõn̦aan kõjerbal iPad eo nejũm̦ ak men ko ãierl̦o̦kwõt ilo iien kweilo̦k eo, jouj im kõjparok bwe kwõn jab kõm̦ad an ro jet roñjake. Em̦m̦an bwe jen jab m̦õñã ak idaak lukwõl̦pãn kweilo̦k. (Ekl. 3:⁠1) Jen reim̦aanl̦o̦k im kalimjek wõt ri kõnono eo im jab reito reitak. Ñe rej riiti eoon ko, kwõmaroñ lale Baibõl̦ eo am̦ im je ilo tukadu kõmel̦el̦e ko ilo katak ko.

4. Ta ko ro jemãn im jinen remaroñ kõm̦m̦ani ñan jipañ ro nejier bwe ren kanooj roñjaki katak ko im bõk tokjãer?

⁴ Jekõn̦aan bwe ajri ro nejid ren roñjaki katak ko im bõk tokjãer. Bok in Jabõn Kõnnaan 29:15 ej ba: “Ñe likũt ajri make iaan, ej kajook jinen.” Kõn men in, eaorõk bwe ajri ro im jodrikdrik ro ren jijet wõt iturin jineer im jemãer. Wãween in emaroñ kõm̦m̦an bwe rũtto ro ren lale bwe ro nejier ren jab keroro, lale cell phone ko nejier im ren jab itoitak. Men in enaaj kõm̦m̦an bwe ren kanooj roñjake katak ko. Jekdo̦o̦n ñe ajri eo edik im ejjab maroñ mel̦el̦e aolep katak ko, bõtab jemaroñ katakin er meñe rej dik wõt ñan tõt wõt ilo jea ko aer im jab kiki ilo iien kweilo̦k.

5. Etke em̦m̦an bwe jen kakeememej kõj kõn katak ko rar wal̦o̦k ilo kweilo̦k eo el̦ap? Ewi wãween jemaroñ kõm̦m̦ane men in?

⁵ Ãlikin Wõt Kweilo̦k: Lale bwe en jab rum̦wij am̦ ro̦o̦l ñan m̦weo im̦õm̦. En m̦õkaj am̦ kiki bwe kwõn jab m̦õk ñan raan eo juon. Ilo jo̦teen in raan ko kajjojo, em̦m̦an ñe baam̦le ko ren bwebwenato kõn katak ko me rar wal̦o̦k ilo kar raan eo. Etke? Kõnke ñe jej kakeememej kõj kõn men ko jaar roñ ilo katak ko, men in enaaj jipañ kõj ñan keememej wõt point ko. El̦aññe kwõnaaj kõjota ippãn ro m̦õttam̦ ilo restaurant ko, kwõmaroñ bõk bok eo kwaar jeje point ko rem̦m̦an ippam̦ ie ñan bwebwenato kaki ippãn ro m̦õttam̦. Ilo iien Kabuñ eo an Baam̦le eo am̦, kom̦ maroñ bwebwenato ippãn doon kõn katak ko im lale ta ko kom̦ aikuj kõm̦m̦ani ñan jerbali katak kein. Bareinwõt, kwõmaroñ karõk juon iien kajjojo wiik ñan etale bok ak dvd ko rekããl me kar kwal̦o̦ki ilo kweilo̦k eo el̦ap.

6. Ebwe ke ñan baj pãdwõt im jijet ilo iien kweilo̦k ko rel̦l̦ap? Etke ãindein am̦ l̦õmn̦ak?

⁶ Unin iien kõjota ko ej ñan m̦õñã. El̦aññe jejjab kortokjãn m̦õñã ko, eokwe enaaj ejjel̦o̦k tokjãn kar kõm̦m̦ane kõjota eo. Ej ãindeinl̦o̦k wõt iien kweilo̦k ko rel̦l̦ap. Katak ko rej ãinwõt m̦õñã ko me kar kõpooji bwe jen kortokjãer. El̦aññe jenaaj pãd ilo aolepen raan ko im kanooj in roñjaki katak ko im jerbali men ko jaar katak, jenaaj bõk tokjãn kweilo̦k eo el̦ap.