“Ko̦kweilo̦ktok Armej Ro”

1. Etke kweilo̦k ko rel̦l̦ap rainin rej ãinl̦o̦k wõt kweilo̦k eo el̦ap an kar Ri Israel ro ãlikin wõt aer kar diwõjl̦o̦k jãn Ijipt?

¹ Ãlikin an kar Ri Israel ro diwõjl̦o̦k jãn Ijipt, Jeova ear jiroñ Moses bwe en “ko̦kweilo̦ktok armej ro” ilo Tol̦ Sainai ñan aer roñjake naan ko An bwe ren maroñ mijak E im katakin ajri ro nejier kõn katak ko An. (Dt. 4:10-13) Ejjel̦o̦k pere bwe el̦ap an kar em̦m̦an iien kweilo̦k eo im el̦ap an kar jipañ armej ro bwe en kajoorl̦o̦k wõt tõmak ko aer! Ilo naaj allõñ kein m̦aanl̦o̦k, armej ro an Jeova renaaj koba ippãn doon ilo iien kweilo̦k ko rel̦l̦ap (district convention im international convention) bwe Jeova en lel̦o̦k katak ko ñan er. Ta ko jej aikuj kõm̦m̦ani bwe jen lukkuun bõk tokjãn aolep katak ko renaaj wal̦o̦k ilo iien kweilo̦k eo ad el̦ap?

2. Ta ko jej aikuj kõm̦m̦ani bwe jen “pojak” ñan iien kweilo̦k el̦ap eo ad?

² “Pojak”: Jeova ear kakien Ri Israel ro bwe “ren pojak” ñan iien kweilo̦k eo el̦ap ilo Tol̦ Sainai. (Ex. 19:10, 11) Ejja bar ãindein ñan kõj ilo raan kein. Ejjab ro wõt me rej kõppojak ñan iien kweilo̦k el̦ap eo ej ro me enaaj wõr kun̦aaer. Kõj aolep jenaaj aikuj kõppojak. Ñan waanjoñak, elõñ renaaj aikuj kõm̦m̦an karõk ilo jikin jerbal ko aer bwe ren maroñ kakkije ak off jãn jerbal. Ñe kwõj juon iaan armej rein, joñak eo an Nihimaia emaroñ jipañ eok. Ear wõr an Nihimaia jerbal. E eo ear ri lale dãn ko limen Kiiñ Artaxerxes, im ear kõn̦aan kakkije jãn jerbal eo an bwe en maroñ etal im jipañ kalõke wõrwõr eo ilo Jerusalem. Bõtab, Nihimaia ear jel̦ã bwe kiiñ eo emaroñ jab kõtl̦o̦k an etal. Meñe ãindein, ak Nihimaia ear jar innem ear lel̦o̦k kajjitõk in an ñan kiiñ eo. Kiiñ eo ear kõtl̦o̦k bwe en etal im ear bar ba ñane bwe enaaj lel̦o̦k pein im jipañe ilo an naaj kalõke wõrwõr in Jerusalem! (Nih. 2:1-9, UBS) Ñe ettol̦o̦k ijo jikũm̦ jãn jikin kweilo̦k el̦ap eo, em̦õj ke kadede am̦ kõm̦m̦an karõk kõn wãween am̦ naaj etal ñan jikin kweilo̦k el̦ap eo im kõn ia eo kwõnaaj jokwe ie? Em̦m̦aan ro me rej lale eklejia renaaj m̦õn̦õn̦õ in jipañ jabdewõt ro me renaaj aikuj jipañ ilo wãween in. Pepe l̦o̦k im̦aan bwe kwõn m̦õkajl̦o̦k ñan iien kweilo̦k el̦ap eo m̦okta jãn an jinoe bũrookraam̦ ko. Kwõn kate eok kwõn lukkuun roñjake aolep katak ko ilo naaj iien en̦.​—Hi. 2:1.

3. Ta eo enaaj jipañ kõj bwe jen kõpooje bũruod ñan iien kweilo̦k eo el̦ap?

³ Bar juon men eaorõk im jej aikuj kõpooje ej bũruod. Jej aikuj kõpooje bũruod bwe en em̦m̦an ad roñjake katak ko im bõk tokjãn. (Ezr 7:10) Jejjo wiik m̦okta jãn iien kweilo̦k eo, enaaj wal̦o̦k laajrak in katak ko ñan iien kweilo̦k eo el̦ap im eoon ko me katak kein rej itok jãni ilo Web jait eo ad etan www.jw.org. Jemaroñ etale laajrakin katak kein ilo iien katak ko an baam̦le eo ad ilo wiik ko m̦okta jãn ad naaj pãd ilo iien kweilo̦k eo el̦ap. Jet rukwal̦o̦k naan rej print i bũrookraam̦ in im bõke ippãer ñan iien kweilo̦k eo el̦ap bwe ren maroñ jeje kake.

4. Etke iien kweilo̦k eo el̦ap ej juon iien em̦m̦an ñan an rũtto ro jipañ im katakin ajri ro nejier?

⁴ ‘Katakin Ro Nejũm̦’: Juon iaan un ko unin an kar Ri Israel ro kweilo̦kl̦o̦k ilo Tol̦ Sainai ej bwe ro me ewõr nejier ren “katakin ro nejier.” (Dt. 4:10) Iien kweilo̦k eo ad el̦ap enaaj juon iien em̦m̦an ñan an ro ewõr nejier katakin ajri ro nejier. Rũtto ro rej aikuj kajijet ajri ro nejier iturier im jipañ er bwe ren lukkuun roñjaki katak ko. Ñe rũtto ro im ajri ro nejier rej ro̦o̦l ñan m̦õko, remaroñ bwebwenato ippãn doon kõn katak ko rar roñjaki. Remaroñ bar kõm̦m̦ane men in ilo iien katak ko an baam̦le eo.

5. Ta tokjãn ko jenaaj bũki ilo ad naaj pãd ilo kweilo̦k eo el̦ap?

⁵ Kweilo̦k eo el̦ap an kar Ri Israel ro ilo Tol̦ Sainai ear jipañ er ñan kile bwe el̦ap aer jeraam̦m̦an kõnke rej armej ro an Anij. (Dt. 4:7, 8, UBS) Kweilo̦k l̦ap eo ad enaaj bar jipañ kõj bwe jen kile joñan ad jeraam̦m̦an. Ilo raan kein me jenaaj pãd ilo iien kweilo̦k eo el̦ap, jenaaj lukkuun m̦õn̦õn̦õ kõnke jenaaj roñjaki katak ko jãn Jeova im pãd ibwiljin rũttõmak ro m̦õttad ñan kõm̦m̦ao im kakajoor doon. Ej ãinwõt ñe jej kakkije jidik jãn inepata im apañ ko ilo jukjukun pãd in enana an Setan. (Ais. 35:7-9) Jen jab jako jãn iien kweilo̦k in ad. Ej juon iien em̦m̦an ñan ad jipañ doon im kakajoor doon kiiõ ke elukkuun epaaktok wõt raan eo el̦ap an Jeova!​—Hi. 10:24, 25, UBS.