Kwon Roñjake Nan ko Rekwojarjar
1 Ejjab aolep men ko armij rej konono kaki rej tellokin ad lukkun roñjaki. Ak ñe Anij ej konono, ewõr un eo eaorõk ñan roñjake. (Dut. 28:1, 2) Ilo kamolol, ri jeje ro rekakõrmol rar je “nan ko an Anij” ñan tokjen eo ad. (Rom 3:2) District convention in tok naj letok ien ko remõn ñan roñjake nan kein ke rej konono im bwebwenato kaki. Ewi wãwen emaroñ lap am roñjake?
2 Itok Ilo Mõkaj Kajjojo Jibboñ: Lemnak kin joñan an kar ri Israel ro iruj lojiir ke kar jiroñ ir ñan iion Jehovah ilo Tol Sinai ñan roñjake Kien eo an! (Ex. 19:10, 11, 16-19) Elañe ej eindein lemnak eo am ikijen bõk nan in jiroñ ko an Jehovah ilo district convention eo, kwonaj kõmman karõk ko ñan itok ilo mõkaj kajjojo ran. Jejjab maroñ roñjake aolepen program eo elañe jej rumij tok im kabõnõnõik ro jet kin jibadbad ko ad ñan kabuk jea ko. Kejam ko ilo jikin convention eo naj bellok ilo 8:00 a.m., im program eo enaj jinoe ilo 9:30 a.m. kajjojo ran.
3 Meñe armij ro rar mõkaj tok jet iair rejjab bed ilo jea ko air ilo jinoin program eo. Etke ej walok men in? Rej kõttar mae ien chairman eo ej kwalok al in kabellok eo inem kabõjrak air bwebwenato ibben ro mõttair im rej jino emmakit lok ñan jea ko air. Jej aikwij lale bwe jet minute ko mokta jen al in kabellok eo ilo kajjojo mõttan in program eo, chairman eo enaj jijet ilo stage eo ñe rej kajañ kajañjañ in Ailiñ eo. Eñin kakõlle eo ad bwe ej ien ad jijet! Inem, ñe rej kejelã bwe jenaj al al in kabellok eo, jenaj bojak in koba ibben don in al al in nebar ko ñan Jehovah.
4 Roñjake einwõt juõn Family Eburukuk: Ke rar konono nan ko rekwojarjar an Anij ñan ri Israel ro rar koba ibben don, family ko, ekoba “ajiri” ro rar aikwij in roñjake im katak. (Dut. 31:12) Ilo convention ko ad, ajiri ro ren jab “mõke ian.” (Ken. 29:15) Ro jemen im jinen, karõk bwe aolepen family eo am ren jijet ibben don—ekoba jodikdik ro. Jet jemen im jinen rej kõttar mae ien eo rej jino al al in kabellok eo mokta jen air bõklok ajiri ro redik ñan mõn kebojak eo. Bõtab, men in ejamin katakin ajiri ro kin tu-aorõkin al im jar ko ilo kabuñ eo ad. Elaplok an emõn ñan etal ñan mõn kebojak eo mokta jen an jino program eo elañe emaroñ!
5 Enaj bidodo lok ñan ad roñjake elañe ej bwe ien ad kiki in boñ im jej kejbãrok bwe en jab lap ad mõñã ilo ran. Kalmenlokjen kin ta eo ri konono ej ba. Jab kõtlok bwe en jebwãbwe lemnak eo am. Lale ilo Bible eo am ñe rej konono eon ko. Je note ko rekadu. Ñe rej kwalok kajjojo katak, elij ilo lemnak eo am ta eo ri konono eo ear ba, im lemnak kin ewi wãwen kwonaj jerbale katak eo. Ilo jemlokin ran eo, bwebwenato kin program eo einwõt juõn family. Point ta ko kajjojo ear lañliñ kaki? Ewi wãwen family eo am emaroñ kortokjen kamelele kein?
6 Kwalok Kautiej kin Nan in Anij: Convention ko rej letok ien ko remõn ñan bwebwenato ibben ro mõttad im ñan lañliñ kin kamao ko rekõketak. Ilo am itok ilo mõkaj, enaj wõr ien ñan kamao ibben ro jet mokta jen an jino program eo. Ak, jet rej kamao ibben ro jet ilo ien program eo, ilo air lemnak ilo bwid bwe men in ejjab kamad ro jet ilo juõn jikin kwelok elap. Meñe kwelok ko rej walok ilo juõn jikin elap, ej juõn ien ñan lukkun roñjake, ejja einwõt ñe kwoj bed ilo juõn kwelok ilo Kingdom Hall eo. Ren jab kõtlok bwe cellular phone ko, peijr ko, camcorder ko, im camera ko ren kamad ro jet ilo ien program eo.
7 Ke Moses ear bõk Kien eo jen Jehovah, “e ar jab mõña bred, ak irak dren.” (Ex. 34:28) Eindein, enaj jakkar ñan mõñã ak idak ñe program ko ilo convention eo rej walok. Elañe ejelok juõn abañ ikijen ejmour, kõttar mae “ien” eo kar karõke ñan kõmman men in.—Ekkl. 3:1.
8 Ilo jet convention ko, ej wõr wõt abañ eo kin an lõñ brother im sister ro im meñe ajiri jidik ro rej etetal bajjek ilikin Kingdom Hall eo ilo ien program eo. Renaj jiroñ ri lale kejam ko ñan kajitõk ibben rein bwe ren jeblak ñan kwelok eo. Volunteer (ro rej mõnõnõ in jibañ jerbal) ro me rej jerbal ilo kajjo department ko ren jijet ilo kwelok eo ñe ededelok jerbal eo air. Elañe kar jab jitõñ ri jerbal rein ñan kõmman juõn jerbal elap an aorõk ilo ien program eo, ren kar jijet ilo jea ko air, im roñjake program eo. Ren jab bed bajjek ilo department ko, im lolok ro jet ilo ien program eo.
9 Jejjab kõnan bwe jen ‘roñjamõn’ ñe jej roñjake Nan in Anij. (Hib. 5:11) Kin men in jen bebe ñan kwalok kautiej ilo ad lukkun roñjake ñe rej bwebwenato kin nan ko rekwojarjar jen Jehovah ilo district convention eo ad ej tok.