Program eo Ekãl an Circuit Assembly eo

Juõn kamelele kin mijak ej “kautiej emũlal, elaptata ñan Anij.” Kamelele in ej kwalok kadkadin mijak eo me Jeje ko rej konono kake einwõt “jinoin meletlet.” (Sam 111:10) Ilo keidi, ewõr bar juõn kain mijak eo ej kajur ilo lal eo an Satan ibelakid. Ewi wãwen jemaroñ bõprae ad bõk eñjake in enana ke jej kaddeklok juõn mijak in kautiej ñan Jehovah? Program eo ekãl an circuit assembly eo ilo yiõ in jerbal eo 2002 ej etale kajitõk in. Unin tel eo ej “Mijak Anij im Lelok Aibujuij ñan E.” (Rev. 14:7) Jenaj katak kin wãwen ko relõñ me mijak Jehovah enaj wõr tokjen ñan kij einwõt armij ro kajjojo im einwõt juõn dolul.

Meñe mijak emaroñ kwalok kin inebata ak ejako am beran im makoko in jelmae wãwen ko rebin, Bible eo ej ba: “Emõnõnõ jabrewõt eo ej mijõk Jeova.” (Sam 128:1) Program in assembly eo enaj kwalok ñan kij kin ewi wãwen jemaroñ lo tõbrak in jelmae aitwerõk ko ñan kabuñ eo emol. Jenaj lo wãwen eo jemaroñ jibañ ro rekãl ñan kaddeklok mijak rot in emõn ñan Anij, eo emaroñ kamakit ir ñan air kõnan karejar ñan e kin aolepen burueir, air, air lolãtãt, im air kajur. (Mark 12:30) Ran eo kein kajuõn enaj jemlok kin katak an district overseer eo etan “Kwon Karuaklok Yuk ñan Ro Kwoj Yokwe.” Enaj kamelele kin ewi wãwen jemaroñ ekkõl kin jibadbad ko an Devil eo ñan ukõtlok kij jen Jehovah, family eo ad, im Christian ro jeid im jatid.

“Mijak Jehovah, Jab Armij” ej unin tel eo kin lelkan in katak ko emen mõttan in ilo ran eo kein karuo. Enaj kamelele kin etke im ewi wãwen jej aikwij anjo ion jabdewõt mijak me ej bõprae kij jen ad kajejjet jerbal in kwalok nan eo ad ak debij ad tiljek im bõklikit eo erreo ilo school im ilo jikin jerbal eo. Katak eo elap “Mijak Anij im Bokake Kien ko An” ej wawa ion lajrak eo kin men in walok ko me Reveles̃õn katak 14 ej kwalok kaki. Circuit assembly eo enaj kajemlok kin nan in tel eo ekõketak ñan “Etetal Wõt ilo Mijak Jehovah.”

Theocratic Ministry School eo, juõn joñok emõn kin Service Meeting, katak in baptais eo, im elij kin Katak in Imõniaroñroñ rej katak ko jet relap ilo program eo me kwojjab kõnan jako jen i. Kir ri katak Bible ro am ñan bed ilo kwelok eo ibbam. Jabdewõt eo ekõnan baptais en jiroñ presiding overseer eo ilo ien eo emõkajtata. Kij aolep jekõnan kwalok mijak eo ad emõn ñan Jehovah im lelok aibujuij ñan e ilo ad jab jako jen jabdewõt mõttan in program eo ekabwilõñlõñ!