Juõn Kõketak Don Ejej Uan
1 Ran otemjej armij ro an Jehovah rej jelmae melejoñ ko kin tõmak eo air. Ilo an jelã bwe jidik wõt ien ibben, Devil eo ej kate e ñan kokkure tiljek eo ad ñan Jehovah. (Rev. 12:12) Eaorõk bwe jen “bin ilo Iroij, im ilo kajur in maroñ eo An” bwe jen “maroñ in jumae ilo ran eo enana, im mõjen kõmõn otemjej, jutõk.”—Ep. 6:10, 13.
2 Kweloklok ibben ri tõmak ro mõttad ej juõn karõk jen Jehovah ñan jibañ kij bõk kajur. Ri jilek Paul ear melele kin aorõkin men in. Ear jañnuwaade an koba ibben Christian ro jein im jatin bwe ren maroñ kõketak don im ren “bin.” (Rom. 1:11, 12) Ñan kakajur kij ñan kõmanman ankil an Anij, Governing Body eo ilo yokwe ear karõk ñan letok juõn ien emõn ñan bõk tokjen jen juõn kõketak don ilo “Ri Keañ Ro kin Ailiñ Eo Rekijejeto” District Convention eo.
3 Kwon Bed ñan Bõk Tokjen: Kwon kõmman bwe en mejenkajjik eo am ñan bed ilo aolepen program eo. Jej make ‘bõk tokjen’ ilo ad itok mokta jen al eo jinoin im bed mae jej ba “Amen” jen buruõd ilo jar in kajemlok. (Ais. 48:17, 18) Elõñ renaj aikwij karõk schedule in jerbal eo air lok iman bwe en wõr ien air bed ilo kwelok. Emol, emaroñ jab bidodo ñan kebak boss eo am ñan kajitõk ien am kakije, ak Jehovah ej kamol ñan kij bwe enaj jibañ kij ñan kõmanman ankil an. (1 Jon 5:14, 15) Jemaroñ liki bwe Jehovah enaj kajerammõn jibadbad ko ad ñan bed ilo kwelok eo.—Ken. 10:22.
4 Reimanlok ñan Kõketak eo: Kwonañin ilok ke jen juõn district convention, im ba: “Eñin kar district convention eo emõntata!” Etke kar eindein eñjake eo am? Kinke einwõt armij jab wãppen jidik kin jidik jemaroñ mõjnolok, im kile bwe jej aikwij bõk kõketak eo ilo jitõb. (Ais. 40:30) Juõn sister ear ba: “Jukjuk im bed in ej kamõjnoik iõ, im convention ko rej jibañ iõ ñan bar lale lemnak eo aõ ilo jitõb, im ej letok ñan iõ kõketak eo ilo jitõb me ij aikwiji. Kõketak eo ej itok einwõt ilo ien eo elaptata aõ aikwiji.” Bõlen kwar iion ejja eñjake in wõt.
5 Jej bõk kõketak ejjab ikijen katak ko im interview ko wõt ak bareinwõt ilo wãwen ko jet ilo convention ko ad. Juõn brother ear ba: “Elaptata aõ lañliñ kin kamelele ko ralikar im keie kin wãwen ad jerbale nan in kakabilek ko ilo Bible. Emol, ien otemjej ij reimanlok ñan book ko rekãl jenaj bõki, im eto aõ lañliñ kaki elikin aõ jeblak ñan mweo.”
6 Convention ko rej juõn men in letok eaorõk jen Jehovah ilo ien kein “renana.” (2 Tim. 3:1) Rej jibañ kij ñan bokake nan in kakabilek eo ekakõrmol in Anij: “Komin ekil, jutõk bin ilo tõmak, komin kõmõn einwõt eman, komin kajur.” (1 Kor. 16:13) Kin men in, jen beek ilo buruõd ñan lañliñ kin juõn kõketak elap ilo “Ri Keañ Ro kin Ailiñ Eo Rekijejeto” District Convention eo ad!