Kwelok ko Relap—Ien eo Ñan Lañliñ!
1 Kwelok ko relap an Ri Kennan ro an Jehovah rej ien ko kin lañliñ elap. Iumin elõñlok jen jibuki yiõ ko, kwelok kein kar wõr kunair ñan laplok eo ej walok ilo dolul eo ad. Jen ijjino ko redik, jaar lo kajerammõn ko an Jehovah ion jerbal eo ad ibelakin lal. Ilo kwelok elap eo ad moktata ilo ran kein, ilo Chicago, Illinois, ilo 1893, juõn oran in 70 ian 360 ro rar bed ilo kwelok eo rar baptais ñan kalikar bwe emwij wujleplok air mour ñan Jehovah. Ilo “Komin Ri Kõmanman Nan eo an Anij” District Convention ko ilo yiõ eo lok kar wõr juõn oran in 9,454,055 ro rar kwelok ibelakin lal im 129,367 rar baptais. Ear juõn unin lañliñ elap!
2 Jen ien ko etto ilo Bible, kwelok ko an armij ro an Anij kar juõn ial elap ñan lelok nan in kibel ko jen Jehovah. Ilo ien eo an Ezra im Nehemiah, armij ro rar roñjake air konono kin Kien eo “jen jiboñ ñõn raelip.” (Nih. 8:2, 3) Ilo ien eo kin air bõk melele ko remõnlok kin Kien eo, armij ro rar lo “lõñliñ elap.” (Nih. 8:8, 12) Kij bareinwõt jej lañliñ bwe kwelok ko relap rej letok juõn ien emõn ñan ad bõk nan in kibel ko remõn im ekan ko lor jitõb “ilo ien emõn” jen Jehovah ikijen “dri korijer e tiljek im meletlet.” (Mat. 24:45) Kin an kar Jesus ba bwe armij ej mour kin “nan otemjej rej waloktok jen loñin Anij,” kwelok ko relap raorõk ñan ejmour eo ad ilo jitõb.—Mat. 4:4.
3 Ewõr Tokjen ñan Am Kate Yuk ñan Bed ilo Kwelok eo: En mejenkajjik eo an kij aolep ñan bed jen jinoin ñan jemlokin “Ri Katakin Ro kin Nan eo an Anij” District Convention eo ilo yiõ in. Jen karõk ñan ad itok ilo mõkaj im bed mae ien jej koba ibben don im ba “Amen!” ilo jar in kajemlok eo. Ñan kõtõbrak men in jemaroñ aikwij ukõt schedule eo ad. Bõk ien kakije jen jikin jerbal eo ad emaroñ kõmman jet abañ ko. Jej aikwij jutak bin, im jab kõtlok bwe men ko ren jide im walok. Elañe jenaj aikwij jikin ad bed im ial in ad ito-itak, jej aikwij mõkaj im kõmman karõk ko. Enaj wõr tokjen jabdewõt jibadbad ko jej kõmmani!
4 Armij ro an Jehovah rejjab joñwe jerammõn ko in ad bed ilo juõn kwelok elap ikijen joñan money. Lale wanjoñok ko an jet ro rar kate ir ñan bed ilo 1958 Ankil eo Ekwojarjar International Assembly an Ri Kennan ro an Jehovah ilo New York City. Juõn brother ear kiili business in ekkal eo an iumin ruo week bwe en maroñ jibañ im bed ilo kwelok eo. Juõn brother ilo Virgin Islands ear wiakake lalem acre in weto eo an bwe aolep jiljino ro uan family eo an ren maroñ in kwelok. Ruo ri belele ro rar wiakake waan lojet eo air bwe ren maroñ bõk aolep ajiri ro jilu nejiir, jen ruo alliñ dettan ñan jiljilimjuõn yiõ dettan, ñan kwelok eo. Kar jiroñ jilu lõmaro jein im jatin jen California bwe elañe rar jako jen jikin jerbal ko air, jerbal ko airjil remaroñ jako ñe renaj kar jeblak. Bõtab, men in ear jab bõprae ir jen air etal ñan kwelok in reban melokloke.
5 Jehovah Ej Kajerammõn Jibadbad ko Ad Remol: Jehovah ej lo im kajerammõn jibadbad ko an armij ro an. (Hib. 6:10) Einwõt juõn wanjoñok, ilo 1950 Laplok eo an Kien eo an Anij Assembly eo, ro rar bed rar roñjake katak eo elap “Jukjuk im Bed ko Rekãl.” Brother Frederick Franz ear kaitoklimo aolep ri kwelok ro ilo an kajitõk: “Ro ilo international assembly in renaj mõnõnõ in jelã ke bwe ijin, jotenin, ibwiljid, ewõr ro renaj mõttan bwirõk ro ilo lal eo ekãl?” Elõñlok jen 50 yiõ ko tokelik, jej lañliñ wõt kin melele in ealikar lok kin Sam 45:16.
6 Elikin an kar bed ilo district convention eo ilo yiõ eo lok, bõran juõn family eo ewõr an kamolol ear je nan kein tok: “Ro jeim im jatim, kom ban jelã ewi joñan an kar jejjet convention in. Family eo aõ kar emmakit ñan jikin kwelok in ñan kabuk jikin jerbal ko, bõtab tokjen men in mour in jitõb eo am ear mõjnolok. . . . Kim ar jerwane eddo ko ad an Christian. Ear bõjrak am bed ilo kwelok ko im bõk kunam ilo jerbal in kwalok nan. . . . Kwelok in elap ear bar kakajur kim, im bar juõn alen kimij likit imam mejenkajjik ko ilo jitõb im kõmman karõk ko ñan kõtõbraki.”
7 Jehovah ej letok ñan kij ekan ko ilo jitõb jej aikwiji. Ej keboj juõn table elap ilo kwelok ko ad relap. Kamolol eo ad kin men in letok in en kamaroñ kij ñan ba men eo me Cornelius ear ba ke ri jilek Peter ear lolok e: “Kiõ kim otemjej ber ijin iman mejen Anij, bwe kimin roñ men otemjej Anij e ar jiroñ yuk kaki.” (Jerbal 10:33) Jen kõmman bwe en mejenkajjik eo ad bwe jen “ber ijin iman mejen Anij” ilo kajjojo mõttan in program eo ilo “Ri Katakin Ro kin Nan eo an Anij” District Convention eo ilo yiõ in im lañliñ!