Ren Kanuij Nebar Jehovah
Kwojkwoj in Kejota eo Naj Kememe ilo April 16
1 Kõtmene eo ad ej laplok ke ej ebaktok April 16, 2003. Ilo boñin eo jenaj kememe mij eo an Jesus, im koba ibben elõñ million ri kabuñ ro mõttad ibelakin lal ilo kaibujuij etan Jehovah. Jehovah ej tellokin bõk nebar kin men in letok eo eaibujuij kin binmour eo. Ikijen binmour eo, enaj lelok jerammõn ko raibujuij ñan armij otemjej rekiblie. Kin aolepen buruõd jej koba ibben ri jeje psalm ilo ad lamõj: “Elaplap Jeova, im ren kanuij nebar E.”—Sam 145:3.
2 Ej juõn ien ñan kalmenlokjen kin lejokmen eo an Anij im kin kamolol eo jej muri kake ñan Jehovah kin an kar jilkintok “juõn wõt E ar keutak, bwe jen mour kin E.” (1 Jon 4:9, 10) Ilo ad tiljek in kememe Kwojkwoj in Kejota eo an Iroij ej kalikar ilo buruõd bwe “Jeova e joij, im E obrõk kin tiriamo . . . im elap An tiriamokake.” (Sam 145:8) Emol, binmour eo ej wãwen eo elaptata Jehovah ear kwalok an yokwe armij otemjej. (Jon 3:16) Ñe jej lemnak kin yokwe eo an Anij im kalmenlokjen kin ial in tiljek eo an Jesus, ej kamakit kij ñan nebar Jehovah. Ilo ien indio, jenaj nebar e kin yokwe eo elap ear kwaloke ilo an kamaroñ kij bwe jen bõk mour indio.—Sam 145:1, 2.
3 Jibañ Ro Jet ñan Nebar Jehovah: Kamolol kin men in letok eo eaorõktata an Anij kin binmour eo ej kamakit kij ñan kir ro jet ñan koba ibbed ilo ad nebar Jehovah. Kar kakõrmole ri jeje psalm ñan an je: “Re naj ba kin air kememej Am emõn elap, im naj al kin Am wãnik.” (Sam 145:7) Ilo yiõ eo lok, Ri Kennan ro an Jehovah ibelakin lal rar kajerbal elõñlok jen juõn billion awa ko ilo jerbal in kwalok nan. Ta tokjen ko rar walok kin jibadbad ko air? Kajjojo week, enañin 5,100 armij rar baptais ñan kalikar wujleplok eo air ñan Jehovah. Kin juõn joñan in 15,597,746 armij ro rar bed ilo Kwojkwoj in Kememej eo, ekoba elõñlok jen 9 million ro rejañin jino air nebar Jehovah einwõt ri kwalok ro kin news eo emõn, ewõr juõn kejatdikdik elap kin laplok ko jet! Einwõt ri keañ ro kin Ailiñ eo, jej kaorõk jerammõn eo ad ñan kwalok kin news eo emõn im ukõt buruen ro jet ñan Jehovah, Nejin, im Ailiñ eo.
4 Juõn wãwen emõn ñan rejañ ro jet ñan nebar Jehovah ej ilo ad kir ir ñan koba ibbed ñe jej kememe Kwojkwoj in Kejota eo an Iroij. Kwonañin ke kõmmane juõn lajrak in etan aolep armij ro kwo kõnan kirtok ir im bareinwõt ro kwoj aikwij kakememej ir kin ran eo im awa eo? Kwonañin ke lelok juõn nan in kir ñan aolep ro rej bed ilo lajrak eo am? Elañe jab, kwon tiljek in lelok juõn nan in kir ñan ir ilo bwen ien in. Jibañ ir ñan melele kin unin kwojkwoj eo. Ilo kwojkwoj eo, kwon bojak in yokyokwe ri lotok ro. Kwon kõmman bwe ren eñjake air ruwainene, kwalok ir ñan ro jet, im nebar ir kin air itok.
5 Bed ilo Kwojkwoj in Kememej eo emaroñ kamakit ro rekãl ñan kõmman wõnmanlok ilo jitõb. Juõn ri katak Bible eo ej eñtan kin post-traumatic stress disorder, eo ej kõmman bwe en lukkun bin an dioj im etal ñan jikin ko elõñ armij rej bed ie, ear itok ñan Kwojkwoj in Kememej eo. Ke rar kajitõk ibben kin lemnak eo an kin kwelok eo, ear ba: “Ear juõn boñ elap an kwojarjar, im iar bed ie.” Jen ien eo, ear jino an bed ilo kwelok ko.
6 Elikin Kwojkwoj in Kememej eo: Ta eo jemaroñ kõmmane ñan jibañ rein rej itoklimo bwe ren erom ri nebar ro an Jehovah? Elder ro renaj lale wõn ro rekãl me rej bed ilo Kwojkwoj in Kememej eo im kõmman karõk ko bwe ri kwalok ro ewõr air maroñ ren lolok ir ejjabto elikin Kwojkwoj eo ñan elij ibbeir kin men ko remõn rar katak kaki im loi. Jet renaj maroñ kõnan bwe en wõr juõn katak kin Bible ilo moko imwiir. Ren bareinwõt kirtok ir ñan bed ilo aolep kwelok ko an congregation ilo week otemjej, einwõt ke air keini bed ilo kwelok ko emaroñ kalaplok jelãlokjen eo air kin Bible eo.
7 Rej kõmmane karõk ko kiõ ñan rejañ aolep ro re jakkeini im ro rej inactive (eto air jab kwalok nan) ñan keini air bed ilo kwelok ko. Elañe elder ro rej kajitõk ibbam ñan jibañ juõn eo ej inactive ñan bar jino an bõk kunan ilo jerbal in kwalok nan, kwon bojak in uak. Kwalok itoklimo rot in eyokwe ñan ro jeid im jatid ej errã ibben ta eo ri jilek Paul ear rejañ kake: “Inem, einwõt eor ien iber, jen jerbale emõn ñõn armij otemjej, im elaplok ñõn ro rej ber ilo nukin tõmak.”—Gal. 6:10.
8 Jen aolep kõmman juõn jibadbad ejej uan ñan bed ilo Kwojkwoj in Kememej eo ilo April 16. Jejjab kõnan jako jen ien in elap an kwojarjar ñan nebar Jehovah. Aet, jen kiõ im ñan indio, jen nebar Jehovah kin jerbal ko an relap!—Sam 145:21.