Ministerial Training School—Juõn Aor Elap Me Ej Tellok ñan Jerbal
1 Ikijen ri kanan eo Jeremiah, Jehovah ear kanan: “I naj kajutak ioir [armij ro aõ] shepherd ro me renaj kejbãrok ir; im rejamin mijak, im rejamin lelñoñ bareinwõt, im ejelok juõn enaj jako.” (Jer. 23:4, New World Translation) Juõn jerbal in shepherd einwõt in rej kõtõbrake rainin ibwiljin armij ro ilo ailiñ ko otemjelok. Elõñ thousand elder ro ilo congregation ko rej kõmmane jerbal in. Bareinwõt, juõn jar in emaan ro emõn ded im orair elõñ einwõt mõlawi rej mõnõnõ in lelok ir make ilo jerbal eo an Jehovah. (Sam 110:3) Brother rein ettã burueir emol air juõn jerammõn ñan congregation ko an armij ro an Anij! Ke jerbal in aini tok men ko lor jitõb ej wõnmanlok wõt, ewõr wõt juõn aikwij kin emaan ro ewõr air maroñ me rej mõnõnõ in karejar ñan ro jeiir im jatiir.
2 Ministerial Training School eo ej juõn karõk emõn ñan kamineneik elder ro im ministerial servant ro rej make iair kin eddo ko relaplok. Elõñlok jen 22,000 ri school ro jen 140 ailiñ ko rar bõk kaminene in ilo 999 class ko kar kõmmani jen ien eo school in ear jino ilo 1987. Ñan brother rein, school eo ear “juõn aor elap me ej tellok ñan jerbal.”—1 Kor. 16:9.
3 Unin School eo: Mejenkajjik eo kin Ministerial Training School eo ej ñan kaminene im kamaroñ emaan ro ewõr air maroñ bwe ren bojak in bõk eddo ko ilo jabdewõt jikin emaroñ wõr juõn aikwij ilo dolul eo. School eo ej kalaplok maroñ ko air ñan tel ilo jerbal in evanjel eo, bõk kunair ñan shepherde bwij eo, im katakin congregation eo. Elikin air kadiojlok, jet ri school ro kar jitõñ ir ñan jerbal einwõt special pioneer ro ak overseer ro rej ito-itak ilo kabijukneir ak ilo ailiñ ko jet. Ro jet kar jitõñ ir ñan jerbal ilo congregation ko air make ak ilo jikin ko elaplok air aikwij jibañ ie ilo territory ko iumin ra eo.
4 Ilo program in katak eo ralitõk week aetokin, ri school ro rej jino juõn katak emũlal kin Bible eo. Rej etale elõñ katak ko ilo Bible im bareinwõt eddo ko an ro rej tel im nan in tel ko ñan jerbale abañ ko kin mour an Christian. Rej bareinwõt katak kin ta eo Jeje Ko rej katakin kin men ko ikijen jerbal in tel (administrative), jerbal in ekajet (judicial), im ikijen dolul eo. Rej bõk kaminene eo ejej uan kin konono ilobwilij im rej bõk jibañ ñan kamõkajlok air eddeklok ilo jitõb.
5 Men in Aikwij ko: Ilo melele, men in aikwij ko ñan bed ilo school eo ebwe an bin. Ro rej kanne air application rej aikwij kar jerbal einwõt elder ro ak ministerial servant ro iumin ruo yiõ ko. Aolep rej aikwij make iair im bed ikõtan 23 im 50 yiõ dettair. Ej aikwij emõn air jelã read, jeje, im konono kajin eo rej kajerbale ilo school eo, im ej aikwij emõn ejmour eo air, im jab aikwiji mõñã ko reinjuõn. Elaplok air kãlet ro rej bed ilo jerbal in regular pioneer.
6 Ro rej lelok ir make rej aikwij mõnõnõ im wõr air maroñ ñan jerbal ilo jabdewõt jikin rej aikwij jibañ ie. Men in ej aikwij air kwalok juõn lemnak einwõt eo an ri kanan eo Isaiah, eo ear mõnõnõ in lelok e make ñan kõmman juõn jerbal ejej uan, ilo an ba: “Ña e; Kwon jilkinlok iõ.” (Ais. 6:8) Ear bareinwõt kwalok an ettã buru ilo aolepen an mour. Yokwe kin ro jeiir im jatiir im juõn kõnan ñan karejar ñan ir en kar kamakit ro rej kanne air application ñan bed ilo Ministerial Training School eo im jab juõn kõnan bwe ren utiej ak wõr bwinbwiniir. Elikin air bõk kaminene rot in emõn, rej kõtmene bwe ro rej kadiojlok jen school eo ren jerbale men ko rar katak kaki ñan tokjen eo an ro jet.—Luk 12:48.
7 Tokjen ko: Iumin ralitõk week ko in air bõk kaminene ko relap, ri school ro rej bõk “nan in tõmak ko im katak ejime” me “re naj najirik im kadreklok [ir].” (1 Tim. 4:6) Men in ej kamaroñ ir ñan jibañ im kõketak ro jet ilo congregation ko im circuit ko air. Ilo elõñ jikin ko me kar jitõñ ro rar kadiojlok jen Ministerial Training School eo bwe ren jerbal ie, jerbal in kwalok nan eo ear laplok; rar rejañ bwe armij ren bõk jerbal in pioneer, elaptata jodikdik ro; im elaplok air lale ro rekãl me rej koba ibben armij ro an Anij.
8 Kwoj juõn elder ke ak juõn ministerial servant ejañin wõr belen im bed ikõtan 23 im 50 yiõ dettan? Etke kwojjab kanne am application ñan Ministerial Training School eo? Kwoj ke juõn brother emõn dettan eo ej lemnak kin mejenkajjik ko an ilo jerbal eo an Jehovah? Etke kwojjab kõmman bwe mour eo am en lamwan im anemkwoj jen men in kamad ko bwe kwon maroñ deloñ ilo “aor eo me ej tellok ñan jerbal”? Emaroñ bõktok elap lañliñ ñan yuk im kajuburuõm. Emol, Ministerial Training School eo ear juõn jerammõn ejjab ñan ro rar kadiojlok jen school eo wõt ak bareinwõt ñan congregation ko an armij ro an Anij ibelakin lal.
[Box eo ilo peij 3]
Ewi Wãwen Rar Bõk Tokjen Jen Kaminene eo
“School eo ear kõmman bwe en laplok an wõr aõ liki bwe in maroñ jerbale eddo ko aõ ilo congregation eo.”
“Ear ukõt enañin aolepen wãwen mour eo aõ, ekoba wãwen eo ij lemnak kin iroij eo an Anij im dolul eo an.”
“Kaminene eo iar bõke ear jibañ iõ ñan kile aikwij eo ñan aõ kõmman bwe in maroñ jerbal ilo jabdewõt jikin ewõr juõn aikwij ie.”