Box In Kajitõk

◼ Ta kauwatata ko ñe juõn ej jolok elap ien ñan bwebwenato ibben juõn eo im ejaje kajjen ilo Internet?

Elõñ Web site ko kar eiki bwe armij ro ren maroñ jelã kajjen don im jeje ñan don ilo Internet. Elõñ ian jikin kein rej kamelim kajjojo armij ñan air kwalok kin wãweir make, eo ej kitibuj pija ko pijaiir im melele ko kin ir make. Armij ro remaroñ jeje ñan rein elikin air lo pija kein im melele ko kin ir. Web site kein rebuñbuñ ibwiljin elõñ jodikdik ro, im ewõr jet ian jodikdik ro ilo congregation rej kajerbal jikin kein ñan jeje ñan ro im rej ba bwe rej Ri Kennan ro an Jehovah.

Emaroñ bidodo ñan an armij eo jej jeje ibben ilo Internet eo riap kin wãwen, kõtan eo an ibben Jehovah, ak kin kõnan ak mejenkajjik ko an. (Sam. 26:4) Armij eo ej ba bwe ej juõn Ri Kennan an Jehovah emaroñ juõn ri jab tõmak, juõn eo emwij bukwelok e, ak emaroñ juõn eo ej illok im jumae Anij. (Gal. 2:4) Ekkar ñan report ko, elõñ emaan ro me rej itoklimo in kokkure ak katton ajiri ro rej kajerbal Web site kein ñan kabuk jerair.

Meñe jemaroñ lemnak bwe rein jej jeje ñan ir rej jet ian ro im emõn air kate ir ilo congregation eo, bwebwenato ilo kain jikin rot kein jidik kin jidik remaroñ oktak im bwebwenato kin men ko retton. Men in ej eindein kinke ekkã an armij jab jook ak rejjab kejbãrok ñe rejañin lukkun iion armij eo juõn. Bareinwõt remaroñ lemnak bwe bwebwenato ko air ilo Internet ej ilo ittino, im kin men in jabdewõt men ko rej ba ejelok juõn emaroñ jelã kaki, einwõt ro jineir im jemeir ak elder ro. Ekaburomõjmõj, bwe elõñ Ri Christian jodikdik ro ilo uan family ko emwij air lorak im bõk kunair ilo air kajerbal nan ko retton. (Ep. 5:3, 4; Kol. 3:8) Ro jet ilo jikin kakonkon melele ko ilo Internet eo rar likit pija ko kin ir make ilo air kõnak nuknuk ko rejõkkar, kajerbal ãt in kejak ko rejõkkar, ak kanne video kin pija in al im kajañjañ ko rej alikar kin mour etton.

Ilo ad lemnak kin nan in kamelele ko ilõñ, ro jemen im jinen rej aikwij lale wãwen eo ro nejiir rej kajerbal computer eo. (Ken. 29:15) Ekauwatata ñe jenaj karuwainene juõn ruwamaejet ñan mweo imõd ak kõtlok bwe en make ian ibben ro nejid. Eindein, ej menin kauwatata ñan kij, ak ñan ro nejid bwe ren mõtta ibben ro im rejaje kajeir ilo Internet eo, meñe rej ba rej Ri Kennan ro an Jehovah.​—Ken. 22:3.