Kwoj Aibedbed ke in Kanne Durable Power of Attorney (DPA) Card Eo?
Kwon kanne DPA (durable power of attorney) card eo me kar letok ñan Ri Kennan ro emwij air baptais. Ekanuij aorõk bwe kwon beek lok iman im kalikar ilo jeje kin ta kein kakõlkõl ko im kamadmõd ko kwonaj bõki ilo juõn ien doctor ejidimkij kinke “kom jaje ta eo e naj walok ilju.” (Jem. 4:14; Jerb. 15:28, 29) Emwij kõmmane pija eo Transfusion-Alternative Health Care—Meeting Patient Needs and Rights (Kõl ko Jet Ijellokin Bõk Bõtõktõk ñan Kejbãrok Ejmour—Ñan Kajejjet Aikwij ko im Maroñ ko an Ri Nañinmij Eo) ñan jibañ yuk. Aluije pija in, inem jar ilo am eliji men ko kwar katak kaki ikijen jibañ eo jen kajitõk kein rej lajrak ilal.—Lale: Kinke ilo pija in ej kitibuj jet jikin ko kin mwijmwij, ro jemen im jinen rej aikwij in bebe elañe renaj aluije ibben ajiri ro nejiir.
(1) Etke jet doctor im ro jet re tijemlok ilo jikin doctor ko rej bar etale wãwen air kajerbal im lelok bõtõktõk? (2) Kwalok jilu wanjoñok ko kin mwijmwij ko relap kar kõmmani ijellokin bõk bõtõktõk. (3) Jete oran doctor ro im doctor in mwijmwij ro ibelakin lalin emwij air kwalok kõnan eo air ñan kamadmõde ri nañinmij ro ilo air jab kajerbal bõtõktõk? Etke rej mõnõnõ in kõmmane men in? (4) Ta ekkatak ko rekãl an hospital rej kwalok kin kajerbal bõtõktõk? (5) Ta kauwatata ko kin ejmour rej walok jen bõk bõtõktõk? (6) Ta jemlok eo elõñ ro re tijemlok ilo jerbal in doctor emwij air bõk ikijen tokjen ko jen air kajerbal kõl ko jet ijellokin air lelok bõtõktõk? (7) Ta eo ej kõmman bwe en dik bõtõktõkin juõn armij? Ñan ewi joñan enbwinin armij emaroñ emõn wõt an jerbal ñe ejabwe bõtõktõkin? Ta eo remaroñ kõmmane ñan jibañ juõn ri nañinmij ej bed ilo wãwen in? (8) Ta eo remaroñ kõmmane ñan kamakit enbwinin ri nañinmij eo ñan an kalaplok an kõmman red cell ko? (9) Ta kilen kamadmõd ko rej kajerbali bwe en dik an torlok bõtõktõk ilo ien mwijmwij? (10) Kõl ko jet ijellokin bõk bõtõktõk remaroñ ke jerbal ñan ajiri ro ak ñan armij ro me mour ko air rej bed ilo wãwen ko rekauwatata? (11) Ta eo ej juõn ian men ko raorõk kin kilen doctor eo emõn? (12) Etke eaorõk bwe Ri Christian ro ren kõmman jokãlet ko air lok wõt iman kin kilen doctor ko rejjab kajerbal bõtõktõk? Ewi wãwen jemaroñ kõmmane men in?
Ilo ad bõk jet ian kamadmõd in doctor ko me rej walok ilo pija in, men in ej an juõn make bebe im ej ekkar ñan bõklikit eo an emwij an Bible eo katakini. Emwij ke am bebe kin ta kõl ko jet kwoj mõnõnõ in bõki ñan kwe im ajiri ro nejõm? Ñan lo melele ko relaplok kin wãwen kein, lale “Questions From Readers” (Kajitõk ko Jen Ro Rej Read) ilo June 15, 2004, im October 15, 2000, magazine in Watchtower (Imõniaroñroñ) im ilo insert ak peij eo iloa ilo Ad Jerbal Ñan Ailiñ Eo an November 2006 iumin unin tel eo “Ewi Lemnak eo Aõ kin Mõttan ko Redik Rej Itok Jen Bõtõktõk im Kilen Kamadmõdi Nañinmij ko Me Rej Kitibuj Air Kajerbal Bõtõktõkiõ Make?” Kwoj aikwij kejelãik ro kwar kãlet ir einwõt agent (eo ej jutak ikijõm elañe kwojjab maroñ kõmmane juõn bebe) ro am im jabdewõt ro uan family eo am me rejjab Ri Kennan ro an Jehovah kin jokãlet ko am.