Kwoj Aiberber Ke?

Aiberber kin ta? Am kane card in bõtõktõk eo ak DPA me rej lelok ñõn aolep Dri Kennan ro emwij air baptais. Kinke ‘kwo jaje ta eo e naj walok ilju,’ elap tokjen bwe kwon bebe karere im jeje kin kain kamarmir rõt kwonaj kõnan bõki elañe ewalok jorran kin ejmour eo am ilo idriñ. (Jem. 4:14; Jerb. 15:28, 29) Ñõn jibõñ yuk, kar kõmõne video eo kin Kõl ko Jet Ijellokin Bõk Bõtõktõk ñõn Kejbãrok Ejmour​—Ñõn Kajejit Aikwij ko im Maroñ ko an Dri Nañinmij Eo (ejelok ilo kajin Majõl). Kwon aluije video in, inem eliji men ko kwar aluiji ilo am kajerbal kajitõk ko ilõl im jar kake.​—Kajela: Kinke video in ej kwalok kilen mijmij ko, ridto ro ren kãlet ta eo ekkar ñõn an ajiri ro aluiji.

(1) Etke jet ian kumi in taktõ ro rej bar etale air lelok bõtõktõk ilo eke? (2) Kwalok jilu joñok ko kin mijmij ko relap emwij air kõmõni ilo air jab kajerbal bõtõktõk. (3) Jete taktõ ro im dri mijmij ro ibelakin lõl rar kalikar air mõnõnõ in kamarmiri dri nañinmij ro ilo air jab kajerbal bõtõktõk? Etke remõnõnõ in kõmõne men in? (4) Ilo tõre in, ta eo hospital ko rar loe ilo air etale wãwen kajerbal bõtõktõk? (5) Ta kauwatata ko rej walok ilo lelok bõtõktõk ilo eke? (6) Ta jemlok eo emwij an elõñ taktõ ro tõbari kin tokjen kamarmir ko jet ijellokin lelok bõtõktõk? (7) An jabwe red cell ko ilo bõtõktõk (anemia) ej walok jen ta? Ewi joñõn red blood cell ko juõn armij ej aikwiji ñõn mour? Ta eo emaroñ jibõñ juõn eo ejabwe red cell ko ilo bõtõktõkin? (8) Ewi wãwen kalõñlok red cell ko ilo enbwinin dri nañinmij eo? (9) Ta kamarmir ko rej kajerbali ñõn kadriklok an toor bõtõktõk ilo ien mijmij? (10) Kamarmir ko ijellokin lelok bõtõktõk en ke jibõñ ajiri ro redrik ak ro im eidiñ air jorran? (11) Ta juõn ian bebe ko raurõk im taktõ ro rej lore? (12) Etke eaurõk ñõn Dri Kristian ro bwe ren kãlet moktalok kin kilen kamarmir ko ijellokin lelok bõtõktõk? Ewi wãwen jemaroñ kõmõne menin?

Ñõn bõk jet ian kamarmir ko rej walok ilo video eo ej kwonan kajjojo armij bwe en bebe kake ekkar ñõn bõklikõt eo an im ej wawa ion Baibel eo. Emwij ke am bebe karere kin kamarmir in taktõ rõt ko kwonaj mõnõnõ in bõki ñõn kwe mõke im ajiri ro nejim im kwar kane card in bõtõktõk eo ak DPA? Ñõn etale men kein, en tiljek am eliji katak eo “Ewi Lemnok eo Aõ kin Mõtõn ko Redrik Rej Itok jen Bõtõktõk im Kilen Kamarmiri Nañinmij ko Me Rej Kitibuj Aõ Kajerbal Bõtõktõkiõ Mõke?” ilo Ar Jerbal Ñõn Ailiñ Eo, jen Nobõmba 2006. Eliktata, en jejit am kane card in bõtõktõk eo am kin jokãlet ko am. Kwon kajelaik ro kwar kãlet ir einwõt am dri jibõñ kin ejmour kab ro uan baamle eo am im rejjab ber ilo tõmak kin bebe ko am.

[Box ilo peij 3]

• Emwij ke am bebe kin ta kamarmir ko kwo mõnõnõ in bõki kin kwe mõke im ajiri ro nejim?

• Eber ke ibõm juõn card in bõtõktõk ererelok im epojõk ñõn ien eo eidriñ?