Kwojelã Ke Ta eo Kwonaj Kõmmane?
Ilo ebeben eo kein kajuõn, dri jilik ro im emaan ro jet me rar tel armij ro dron Anij rar aikwij kwelok ñan bebe kin kien ta ko aolep dri Kristian ro ilo congregation ko otemjej rar aikwij lori. Elikin kwelok eo air, rar jilkinlok ennan in: ‘Kajur eo Anij ej kajerbale im kim ar lemnok, emõn bwe kimin jab likit iomi men ko relap jen men kein remõn: Bwe komin kejbãrok kom jen men in katok ñõn ekjõp ko, im jen bõtõktõk, im jen men ko remij kin lukwoj burueir, im jen lũñ.’ (Jerb. 15:28, 29; 21:25) Kin men in, jej aikwij ‘kejbãrok kij jen bõtõktõk.’ Iman mejen Anij, jabrewõt eo ejjab lore men in, ej einwõt ñe ej kabuñ ñan ekjab ak mour in lũñ.
Kien in bwe jen kejbãrok kij jen bõtõktõk ej ke bar jitõñlok ñan kilen taktõ ko im rej kajerbal bõtõktõk? Aet. Ñan wanjoñok: Jen ba bwe juõn taktõ ear jiroñ yuk bwe kwon jab bar idrak arkool. Melelen ke bwe kwojjab maroñ idrak, bõtab kwomaroñ kajerbal wã ko ñan kadreloñe ilo enbwinũm? Ejjab! Ilo ejja wãwen in lok wõt, elañe jej kejbãrok kij jen bõtõktõk, jeban kõtlok bwe en dreloñtok enbwinid. Ej bareinwõt melelen bwe jeban kõtlok bwe jabrewõt armij en kadreloñtok bõtõktõk ñan enbwinid ilo jabrewõt wãwen.
Ta elañe juõn dri Kristian ear iion juõn jorrãn elap ak ej aikwij mwijmwij? Ilo an kautieje mour eo Anij ear leloke, dri Kristian in enaj kãlet kilen taktõ ko jet im rejjab nae kien eo an Anij. Eñin unin enaj kãlet kilen kamarmir ko jet kin bõtõktõk elañe ewor ilo jikin eo ej bed ie.
Emwij ke am kõmmane bebe ko kin kilen kamarmir rõt ko kwe im ajiri ro nejim kom kõnan, im kanne peba in bõtõktõk ko ami (DPA)? Ñan bõk melele ko relaplok kin men kein, joij im etale Imõniaroñroñ eo an Oktoba 1, 2004, peij 8-17. Ilo Ad Jerbal Ñan Ailiñ Eo an Nobõmba 2006, lale katak eo etan, “Ewi Lemnak eo Aõ kin Mõttan ko Redik Rej Itok Jen Bõtõktõk im Kilen Kamadmõdi Nañinmij ko Me Rej Kitibuj Air Kajerbal Bõtõktõkiõ Make?” Kajerbale peba eo ilo katak in ñan kãlet kilen kamarmir ko kwokõnan im kwojjab. Eliktata, kwon je uak ko am ilo peba in bõtõktõk eo am. Kwoj aikwij kemeleleik dri konono ro am im jabrewõt ro nukim im rejjab Dri Kennan ro an Jeova kin jokãlet kein am.