Kwojela Ke Jokãlet ko Rebellok Ñõn Yuk?

Jab kajerbal bõtõktõk ilo ien mijmij ej laplok wõt ilo elõñ hospital ko ibelakin lõl. Elet ke am melele kin aolep jokãlet ko rebellok ñõn yuk ikijen kamarmir ko me rejjab kajerbal bõtõktõk? Kwoj aikwij jela im melele kin kamarmir ko im mijmij rot ko rebellok im abañ ko remaroñ walok bwe en emõn am kãlet. Aluije video eo Jab Bõk Bõtõktõk​—Kilen Doctor Eo Ej Uake Aituerõk In (No Blood​—Medicine Meets the Challenge). Mwijin am aluij, kwon jar im eliji men ko kwar katak kin kajitõk kein rej ber ilõl.​—Lale: Kinke video in enaj kwalok kin kilen mijmij ko, ridto ro ren kãlet ta ko rekkar ñõn ajiri ro nejiir bwe ren aluije.

(1) Ta un eo elaptata dri Kennan ro an Jeova rej abwin bõk bõtõktõk ilo ien mijmij? (2) Ta kõnan eo an dri Kennan ro an Jeova ilo ien air taktõ? (3) Ta maroñ eo ebellok ñõn kajuju dri nañinmij? (4) Etke ej juõn menin meletlet im jime bwe juõn en kãlet kilen mijmij ko me rejjab kajerbal bõtõktõk? (5) Ñe elap an joko bõtõktõk, ta men ko ruo taktõ ro renaj jerbale mokta? (6) Ta kil ko emen relap ñõn kamarmire ro rejjab bõk bõtõktõk? (7) Ewi wãwen an taktõ ro maroñ (a) kadriklok an toor bõtõktõk, (b) kejbãrok red cell ko, (c) kõmõn bwe en laplok bõtõktõk, im (d) kajeblaktok bõtõktõk eo ear torlok jen enbwin? (8) Kemeleleik lajrõkin kamarmir kein (a) hemodilution im (b) cell salvage. (9) Ta men ko kwokõnan melele kake kin kamarmir ko me rejjab kajerbal bõtõktõk? (10) Remaroñ ke kõmõn mijmij ko relap im rekauwatata ilo air jab kajerbal bõtõktõk? (11) Ta men ko remõn rolul in taktõ ro rej jino kile?

An juõn bõk jet ian kamarmir ko ilo video in enaj an wõt bebe ekkar ñõn bõklikõt eo an im ej wawa ion Baibel. Emwij ke am kabin bebe eo am kin kamarmir rot ko kwe im ajiri ro nejõm naj bõki, inem kane peba in DPA (peba eo ej kalikar bebe ko am ñõn taktõ ro)? Ñõn bõk melele ko relaplok kin katak in, joij im eliji “Kajitõk ko Jen Ro Rej Riit” (Questions From Readers) ilo Imõniaroñroñ an kajin belle Juun 15, 2004, im Oktoba 15, 2000. Bwe kwon mõke kãlet men ko kwomaroñ bõki ak jab, kajerbal peij ko emen iloan Ar Jerbal Ñõn Ailiñ Eo, Nobõmba 2006. Katak eo ej ba “Ewi Lemnak eo Aõ kin Mõttan ko Redik Rej Itok Jen Bõtõktõk im Kilen Kamadmõdi Nañinmij ko Me Rej Kitibuj Air Kajerbal Bõtõktõkiõ Make?” Eliktata, kamol ibõm mõke elañe ejime wãwen am kar kane peba in DPA eo am. Kwonaj aikwij kajelaik ro kwar kãlet ir bwe ren am agent kin ejmour eo am kab ro nukõm im rejjab dri Kennan ro an Jeova, kin aolep bebe ko am.

[Box ilo peij 3]

• Ererelok ke bebe ko am kin kwe im ro nejõm redrik kin ta kilen taktõ im lajrõk ko kwonaj mõnõnõ in bõki?

• Eber ke ibõm juõn peba in DPA eo ererelok am kane ñõn ien ko reidiñ?