Kwelok eo Elap Iomin Ruo Ran Ej ñõn Jibõñ Kij Kejbãrok Ejmour eo Ar ilo Jitõb
1. Ta juõn ian menin letok ko jen Jeova im enaj jibõñ kij ñõn kajejit jerbal eo ar kin kwalok nuuj eo emõn?
1 Elap an Jeova kabwe aikwij ko ar ilo jerbal in an ekwojarjar kin nuuj eo emõn ilo an letok melele, katak, im nan in rejañ ko. (Matu 24:14; 2 Tim. 4:17) Kwelok eo elap ilo kajjojo yiõ iomin ruo ran ej juõn ian menin letok ko. Unin tel in kwelok in ekãl kin yiõ eo 2010 ej “Kejbãrok Ejmour eo Am ilo Jitõb,” im ej wawa ion Dri Rom 8:5 im Jud 17-19. Enaj jino jen wik eo ilo Okõj 31, 2009.
2. (a) Ewi wãwen kwelok in elap iomin ruo ran enaj jibõñ kij? (b) Ewi wãwen kwelok ko relap iomin ruo ran ilo ien ko lok rar jibõñ yuk ilo am kwalok nan?
2 Ewi Aurõkin: Kwelok in enaj kalikar men ko rekauwatata, einwõt kein kamad ko me rej kõñ ien ko ar im karel kij jen men ko remol air aurõk. Jenaj katak kin wãwen anjo ion jitõb in anemkwoj, im etale karkarin eo ej mour ekkar ñõn jitõb. Katak ko ilo Sabat enaj kwalok kin ta ko kajjojo armij im baamle ko renaj maroñ kõmõne ñõn kalaplok ejmour eo air ilo jitõb meñe erro ko im melejoñ ko nae tõmak eo air ej laplok wõt. Kwelok in enaj jibõñ kij ñõn kejbãrok buruer, ekkeini ejmour eo ar ilo jitõb, im drebij juõn melele alikar kin jerammõn ko relap im rej kõtar ro im rej kejbãrok ejmour eo air ilo jitõb.
3. Kwelok in elap iomin ruo ran enaj walok ñãt, im enaj ta bebe eo am?
3 Ñe ealikar ien im ia eo kwelok eo elap iomin ruo ran enaj walok ie, karõke bwe kwon ber im pojõk in bõk kajjojo katak ko. Jen liki, bwe Jeova ej kejerammõn ro im rej owõn.—Ken. 21:5.
4. Alikar bwe jenaj bõk ta ilo kwelok in elap iomin ran ko ruo rej ber imar?
4 Emol, Jeova ej Dri Letok eo kin menin letok in emõn. Kumi in dri kõmñe eo etiljek renaj kilajrõk katak ko im rejejit ekar ñõn ar aikwij bwe jen wõnmanlok ilo jerbal in kwalok nan an Dri Kristian ro. Elap ar kamolol Jeova kin aolep menin letok kein, ko rej jibõñ kij bwe “jen drebij wõt kwalok ar kejatrikrik bwe en jab makõtkit.”—Hib. 10:23-25; Jem. 1:17.