Kõjparok L̦õmn̦ak ko Am̦
1. Etan unin tõl in kweilo̦k eo el̦ap m̦õttan jidik jenaaj kõm̦m̦ane, im ta unleplep in aer kar kõpooje bũrookraam̦ eo an kweilo̦k in?
1 Jijej ear katakin rũkal̦oor ro an ñan yokwe Jeova kõn aolepen bũrueer, aolepen aer, im aolepen aer l̦õmn̦ak. (Mt. 22:37, 38) Ilowaan iiõ in kwal̦o̦k naan in ad ekããl jãn Jeptõmba 2012 ñan Okõj 2013, em̦õj kõpooji kweilo̦k ko rel̦l̦ap me renaaj kakajoor kõj im kakõm̦anm̦anl̦o̦k kain armej rot kõj. Ãinwõt am̦ jel̦ã, etan juon iaan kweilo̦k ko rel̦l̦ap ilo iiõ in ej “Kõjparok Bũruom̦!” (district convention) Im etan kweilo̦k el̦ap eo juon im enaaj wal̦o̦k ej “Kõjparok Maroñ eo Am̦ ñan Jel̦ã Em̦m̦an im Nana” (special assembly). Im m̦õttan jidik enaaj bar wõr juon kweilo̦k el̦ap im jenaaj kõm̦m̦ane. Etan kweilo̦k in ej “Kõjparok L̦õmn̦ak ko Am̦” (circuit assembly) im ej pedped ioon Matu 22:37. Ewõr jet katak ko im renaaj tipdiki taitõl̦ in kweilo̦k in el̦ap. Kar kõpooje bũrookraam̦ eo an kweilo̦k in ñan jipañ kõj wõj kajjojo ñan etale l̦õmn̦ak ko ad make im lale bwe men ko jej l̦õmn̦ak kaki ren kabuñbũruon Jeova.
2. Kajjitõk ta ko jej aikuj in pukot uwaak ko aer ilo naaj kweilo̦k eo el̦ap etan “Kõjparok L̦õmn̦ak ko Am̦”?
2 Men ko Jenaaj Katak Kaki: Ilo ad naaj roñjake kweilo̦k in el̦ap etan “Kõjparok L̦õmn̦ak ko Am̦,” jej aikuj pukot uwaak ko ñan kajjitõk kein itulal̦ kõnke uwaak ko ñan kajjitõk kein renaaj l̦ap aer jipañ kõj:
• Ewi wãween jemaroñ kõjparok kõj bwe jen jab bõk ‘l̦õmn̦ak ko an armej’?
• Ewi wãween jemaroñ jol̦o̦k kein kalibubu eo ej pinej l̦õmn̦ak ko an ro rejjab tõmak?
• Kain l̦õmn̦ak rot eo jekõn̦aan bwe en wõr ippãd?
• Ta tokjãn ko rej wal̦o̦k ñe ej jim̦we wãween ad kõl̦mãnl̦o̦kjen̦?
• Ewi wãween jemaroñ kõtl̦o̦k bwe Jeova en eiki im kajim̦we wãween ad l̦õmn̦ak?
• Ewi wãween ri pãlele ro, ro jemen im jinen, im ajri ro remaroñ kõm̦m̦an bwe baam̦le eo aer en lem̦õn̦õn̦õ?
• Ewi wãween bwe jen pojak ñan raan eo an Jeova?
• Ta mel̦el̦ein ñe jej kõm̦m̦an bwe l̦õmn̦ak ko ad ren pojak in jerbal?
• Ta tokjãn ko rem̦m̦an rej wal̦o̦k ñan ro rej jerbali men ko rej katak?
3. Etke eaorõk bwe jen pãd ilo aolepen raan in kweilo̦k eo el̦ap, kanooj roñjake, im jerbale men ko jaar katak kaki jãn kweilo̦k eo?
3 Setan ej tarin̦aek l̦õmn̦ak otemjej im pukot kilen an kattoon l̦õmn̦ak ko ad. (2 Ko. 11:3, UBS) Kõn men in, jej aikuj kõjparok l̦õmn̦ak ko ad im bõbrae l̦õmn̦ak ko rejjab kabuñbũruon Jeova. En jab bõjrak ad anõke wãween l̦õmn̦ak otemjej an Kũraij im tarin̦aek l̦õmn̦ak ko rebõd an lal̦ in enana. (1 Ko. 2:16) Kõn men in, jen kõm̦m̦an karõk ñan pãd ilo aolepen raan in kweilo̦k in el̦ap. Im jen kanooj roñjake. Bareinwõt, ad jerbale mel̦el̦e ko raorõk me naaj kwal̦o̦ki enaaj jipañ kõj im kõpooj l̦õmn̦ak ko ad ñan jerbal ilo kijejeto kõn Aelõñ eo.—1 Pi. 1:13, UBS.