Naan in Anij Ewõr Tokjãn ñan Katakin Kõj

1. Etan unin tõl in kweilo̦k eo el̦ap me enaaj wal̦o̦k ilo 2014, im ta kajjitõk eo naaj uwaake ilo kweilo̦k el̦ap in?

¹ Jeova ej ri kaki eo ej make wõt em̦m̦antata iaolepen lañ im lal̦. (Ais. 30:20, 21) Ewi wãween an Jeova katakin kõj? Eokwe, ear letok ñan kõj juon bok me ej make wõt im em̦m̦an jãn jabdewõt bok. Bok in ej Naan eo an, Baibõl̦ eo. Ewi wãween katak ko An ilo Baibõl̦ remaroñ jipañ kõj ikijjeen ãjmour ko ad, l̦õmn̦ak ko ad, bũruod, im jem̦jerã eo ad ippãn Jeova? Uwaakin kajjitõk in enaaj wal̦o̦k ilo kweilo̦k eo el̦ap an 2014 (circuit assembly). Etan unin tõl in kweilo̦k el̦ap in ej, “Naan in Anij Ewõr Tokjãn ñan Katakin Kõj,” im ej pedped ioon 2 Timote 3:16.

2. Ta kajjitõk ko im renaaj kaalikkar mel̦el̦e ko rel̦l̦ap ilo kweilo̦k eo el̦ap?

² Pukot Mel̦el̦e Kein Rel̦l̦ap: Mel̦el̦e ko rel̦l̦ap ilo naaj kweilo̦k in el̦ap renaaj alikkar ilo uwaakin kajjitõk kein itulal̦:

• Ewi wãween katak ko an Anij remaroñ jipañ kõj? (Ais. 48:17, 18)

• El̦aññe jej kõm̦m̦an oktak ko ilo mour ko ad bwe jen maroñ pioneer, ta eo jemaroñ lõke bwe enaaj wal̦o̦k ñan kõj? (Mal. 3:10)

• Ta eo jen kõm̦m̦ane ñe jej jelm̦ae ‘katak ko rebõd’? (Hi. 13:9, UBS)

• Ewi wãween jemaroñ l̦oor ‘wãween an kar Jijej katakin’ armej ro? (Matu 7:28, 29, UBS)

• Etke ro rej katakin ilo eklejia ko rej aikuj bar katakin er make? (Rom 2:21)

• Naan in Anij ewõr tokjãn ñan ta? (2 Ti. 3:16)

• Ilo kõkkar, Anij ej “kõm̦akũtkũt” aelõñ ko. Ewi wãween an men in jelõt armej ro? (Hag. 2:6, 7)

• Ta eo Jeova ejel̦ã bwe ewõr ad maroñ ñan kõm̦m̦ane? (Ep. 5:1)

• Etke jej aikuj lukkuun kate kõj ñan l̦oore wõt naan in katak ko jãn Jeova? (Luk 13:24)

3. Etke eaorõk bwe jen pãd ilo kweilo̦k eo el̦ap im kanooj roñjake aolep katak ko?

³ M̦okta jãn an kar Paul jei 2 Timote 3:16, ear je ilo eoon ko l̦o̦k im̦aan kõn men ko renana me renaaj wal̦o̦k im rej kakõl̦l̦en raan ko ãliktata. Ear ba: “Armej renana im ro ri jel̦ã m̦on̦ renaaj l̦apl̦o̦k ilo aer nana, renaaj m̦on̦e armej, im jet renaaj m̦on̦e er.” (2 Ti. 3:13) Innem, bwe ro jet ren jab m̦on̦e kõj, elukkuun aorõk bwe jen roñjake im mour ekkar ñan naan in katak ko jãn Anij! Kõn men in, jen kate kõj bwe jen maroñ pãd ilo kweilo̦k in el̦ap im kanooj roñjake aolep katak ko me kar kõpooji ñan kõj im jelukkuun aikuji.