Naan in Anij Ej Jerbal Wõt
1. Etan unin tõl in kweilo̦k el̦ap eo ilo 2014?
1 Elukkuun oktak Baibõl̦ jãn jabdewõt bok ko ak kõl ko me armej ro rej kõm̦m̦ani ñan jipañ ro jet. Unin ej kõnke naan ko ilo Baibõl̦ rej jerbal wõt im remaroñ jipañ kõj ñan ukot l̦õmn̦ak ko ad kab kõm̦m̦an ko ad bwe ren ekkar ñan ankilaan Jeova. Ewi wãween an Naan in Anij jerbal wõt? Ta ko jemaroñ kõm̦m̦ani bwe Naan in Anij en jerbal wõt ilo mour ko ad? Ewi wãween jemaroñ kõjerbal Baibõl̦ ñan jipañ ro jet? Eokwe, ilo naaj kweilo̦k el̦ap eo (special assembly day) ilo 2014, jenaaj loi uwaakin kajjitõk kein. Ejjel̦o̦k pere bwe katak ko ilo naaj kweilo̦k el̦ap in renaaj kakajoor kõj aolep. Etan unin tõl in kweilo̦k el̦ap in ej “Naan in Anij Ej Jerbal Wõt,” im ej itok jãn bok in Hibru 4:12.
2. Ta kajjitõk ko jenaaj uwaaki ilo naaj kweilo̦k el̦ap eo?
2 Pukot Uwaakin Kajjitõk Kein: Ñe kwõj roñjake katak ko ilo kweilo̦k eo el̦ap, jouj im je uwaakin kajjitõk kein itulal̦.
• Etke ekkar im jim̦we bwe jen lõke im tõmak aolep Naan ko an Jeova? (Sam 29:4)
• Ta ko jen kõm̦m̦ani bwe Naan in Anij en jerbal wõt ilo mour ko ad? (Sam 34:8, UBS)
• Ñe jej kwal̦o̦k naan, ta ko jej aikuj kõm̦m̦ani bwe Naan in Anij en jerbal im tõpar bũruon ro jet? (2 Ti. 3:16, 17)
• Ta ko jej aikuj kõm̦m̦ani bwe Setan en jab m̦on̦e kõj? (1 Jon 5:19, UBS)
• El̦aññe kwõj juon jodrikdrik, ta eo kwõj aikuj kõm̦m̦ane bwe Jeova en kajeraam̦m̦an eok? (Jer. 17:7, UBS)
• Ñe jem̦õjn̦o̦, ta eo enaaj jipañ kõj bwe jen oktak im kajoor? (2 Ko. 12:10)
• Ta eo jej aikuj kõm̦m̦ane bwe jen maroñ wõnm̦aanl̦o̦k wõt im ukot l̦õmn̦ak ko ad rebõd? (Ep. 4:23, UBS)
3. Ijello̦kun wõt katak ko, bar ta enaaj kakajoor im jipañ kõj ilo naaj kweilo̦k el̦ap eo?
3 Katak ko me renaaj wal̦o̦k ilo kweilo̦k el̦ap in renaaj lukkuun jipañ kõj! Ejjab katak ko wõt im rej kakajoor im jipañ kõj. Ñan waanjoñak, ilo aolep kweilo̦k ko rel̦l̦ap jemaroñ kõm̦m̦an iien ñan jel̦ã kajjien ro jeid im jatid jãn eklejia ko jet im bwebwenato ippãer. (Sam 133:1-3; 2 Ko. 6:11-13) Kõn men in, ilo naaj kweilo̦k el̦ap eo, bõk am̦ iien ñan kõm̦m̦ao ippãn ro im eto am̦ jem̦jerãik er. Im bar kõm̦m̦an am̦ iien ñan jel̦ã kajjien ro jeid im jatid me kwõjaje kajjier bwe kwõn maroñ m̦õttaik er. El̦aññe juon ri lotok jãn Ra eo ak juon iaan em̦m̦aan ro me rej itoitak im bõk eddon juon kweilo̦k el̦ap kajjojo iiõ enaaj pãd, em̦m̦an bwe jen karwaineneik e kab lio pãleen. Ealikkar bwe elõñ un ko unin ad lukkuun reim̦aanl̦o̦k ñan kweilo̦k el̦ap in!