Ekan ko “ilo Ien Emõn”
1. Ewi wãwen an kar katak ko ilo kwelok eo elap me ej kab jemlok jibõñ yuk im ro jet?
1 Elikin ar ber ilo ien kwelok eo elap, ekkã ar ba, “Elukkun ekkar kwelok eo ñõn kij!” Juõn circuit overseer ear kwalok bwe elikin kwelok eo elap, jet ian ro ilo circuit eo an rar kwalok air mõnõnõ in kalaplok ijo kwonair ilo jerbal in kwalok nan. Juõn overseer eo ej itoitak ear ba, “Ear jibõñ kim ñõn lukkun lemnok kin ia eo jej ber ie kiõ ke jej etali jokãlet ko ar ilo mour eo ar.” Bar juõn ear ba, “Elõñ ian dri kwalok ro rar ba bwe kwelok eo ear kakememej ir ñõn lemnok wõt kin men eo eaurõktata, jerbal in kwalok nan.” Ewi wãwen an kar kwelok eo elap jibõñ yuk?
2. Ta ko jenaj etali ilo ien kwelok eo elap im enaj walok ilo yiõ in tok?
2 Kwelok eo elap im enaj walok ilo yiõ in tok enaj bar lukkun ekkar ñõn kij. Unin tel eo ej “Liki Jeova,” ekkar ñõn Sam 118:8, 9. Eñin jet ian katak ko jenaj etali: “Ewi Wãwen Jeova Ej Einwõt Ar Jikin Kone ilo Ien Iñtan,” “Jibõñ Ro Jet bwe Ren Bõk Kejbãrok Iomin Pein Jeova,” “Kajeoñwe Jeova ilo Am Lelok Jibõñ,” “Jodrikdrik Ro, Komin Liki Jeova!” im “Kõtan eo Ar Eainemõn Iben Jeova im Ro Jeer im Jãter Ej Jikin Kejbãrok jen Jeova.”
3. Ewi wãwen jemaroñ bõk tokjen jen ar ber ilo kwelok eo elap?
3 Bwe Jen Bõk Tokjen jen Kwelok Eo: Elañe emwij kajela kin ien eo kwelok eo elap enaj walok, kwon kõmõn karõk ko ñõn am ber im kir dri katak Baibel ro am bwe ren kobawõj ibem. Bwe jen maroñ ‘kijenmij ilo ar jebar leen,’ jej aikwij drebij katak ko jar roñjaki. (Luk 8:15) Inem kwon kanuij roñjake katak ko im je point ko relap im bareinwõt nan in rejañ ko kwoj lemnok in jerbali ilo mour eo am im ilo jerbal in kwalok nan. Jolok jidrik ien elikin kwelok eo ñõn bwebwenato kin katak ko einwõt juõn baamle, im etali wãwen ko me kwe im baamle eo am emaroñ jerbali katak ko.
4. Etke jen reimanlok ñõn kwelok eo ar elap ilo yiõ in tok?
4 Einwõt mõña ko renno im reuõne, ilo yokwe im kin karõk ko remõn kar kapoje kwelok eo elap ñõn yiõ in tok. Jeova en kejerammõn yuk ke kwoj kate yuk ñõn ber im bõk tokjen jen ekan ko “ilo ien emõn” ñõn kakajur tõmak eo am einwõt juõn dri kwalok nan.—Matu 24:45.