‘En Tõprak Ankilaan Anij’
1. Etan unin tõl in kweilo̦k eo el̦ap im etke ekkar bwe jen etale men in?
1 Anij ear kõm̦anm̦an kõj kõnke eñin ej ankilaan. (Rev. 4:11) Kõn men in, jej aikuj katak kõn Anij im kõm̦anm̦an ankilaan. El̦aññe jejjab kõm̦m̦ane men in jeban maroñ kajejjet ankilaan Anij kõn kõj armej. Emaroñ pen ñan ad kõm̦anm̦an ankilaan Anij. Etke? Kõnke jej aikuj tarin̦aek kõj make bwe jen jab “kõmmõn jabdrewõt men ko ekkar ñan kõnan ko an enbwinnid kab lemnak ko ad.” Bareinwõt jej aikuj kate kõj bwe jen jab “mour ãinwõt ro ri aelõñ ko” me rejjab jel̦ã Jeova. (Ep. 2:3, UBS; 1 Pi. 4:3; 2 Pi. 2:10) El̦aññe ejjab kõn jipañ eo jãn Anij, jemaroñ po ilo aujiid ko an Setan. (2 Ti. 2:26) Kweilo̦k eo el̦ap (Special Assembly) im enaaj wal̦o̦k ãlikin Jeptõmba 2011 enaaj jipañ kõj kajjojo ñan jerbale men eo Jijej ear jar kake. Unin tõl in kweilo̦k eo el̦ap ej ‘En Tõprak Ankilaan Anij.’—Matu 6:9, 10.
2. Ta kajjitõk ko naaj uwaaki ilo naaj kweilo̦k eo el̦ap?
2 Kajjitõk ko Naaj Uwaaki: Ñe kwõj roñjake katak ko ilo naaj kweilo̦k eo el̦ap, kwõnaaj roñ uwaak ko ñan kajjitõk kein: Ta eo jej aikuj kõm̦m̦ane ijello̦kun wõt ad roñjake Naan in Anij? Ewi wãween jemaroñ kal̦apl̦o̦k ad jel̦ã kõn ta ankilaan Anij kõn armej ro? Etke jej aikuj m̦õn̦õn̦õ in jipañ armej ro otemjej? Ta eo jej aikuj kõm̦m̦ane bwe jen m̦õn̦õn̦õ im aenõm̦m̦an kiiõ im ñan indeeo? Jodrikdrik ro im ajri ro, ta eo kom̦ij aikuj in kalikkar ñan Jeova? Ta jeraam̦m̦an ko renaaj an ro im rej kõm̦anm̦an ankilaan Anij? Etke eaorõk bwe jen kakajoor ro jet kiiõ wõt?
3. Ewi wãween jemaroñ bõk tokjãn jãn kweilo̦k in el̦ap?
3 Kate eok joñan wõt am̦ maroñ bwe kwõn jab jako jãn jabdewõt katak ilo naaj kweilo̦k in el̦ap. Im kwõn kanooj roñjake katak ko. Juon ri kõnono jãn Betel ak l̦eo me ej itoitak im kakajoor congregation ko remaroñ pãd ilo iien in. Jouj im kõm̦m̦ao ippãn kab lio pãleen m̦okta im ãlikin kweilo̦k eo. Ñe kwõj ro̦o̦l ñan m̦weo im̦õm̦, jab mel̦o̦kl̦o̦k men ko kwaar roñjaki. Ta eo emaroñ jipañ eok bwe kwõn keememeji? Eokwe, l̦eo, lio im ro nejier remaroñ ãliji katak ko im bwebwenato kaki ippãn doon. Im etale ewi wãween remaroñ kal̦apl̦o̦k ijo kun̦aaer ñan kõm̦anm̦an ankilaan Anij. Bareinwõt ro ejjel̦o̦k pãleer remaroñ kõm̦m̦an ãindein.—Jem. 1:25.
4. Etke eaorõk bwe kõm̦anm̦an ankilaan Anij en men eo eaorõktata ilo mour ko ad?
4 M̦õttan wõt jidik ro im rej mour ekkar ñan kõn̦aan ko aer make kab ro me remakoko in kõm̦anm̦an ankilaan Anij renaaj jako ñan indeeo. (1 Jon 2:17) Kõn men in, jelukkuun kam̦m̦oolol Jeova. Etke? Kõnke ej litok katak ko me renaaj jipañ kõj kõm̦anm̦an ankilaan Anij. Im bwe men in en men eo aorõktata ilo mour ko ad.