Juon Iien Ejejuan ñan Kwal̦o̦k Naan Ikijjeen Jerbal ko Ad Rem̦m̦an
1. Kobal̦o̦k ippãn katak eo, bar ta ko jet remaroñ kaitoklimoen armej ro ilo iien Kwõjkwõj eo? Jouj im kõmel̦el̦e.
1 Ñããt in? Ilo jotenin Kwõjkwõj in mej eo an Jijej. Eñin unin, ro doon Anij rej kate er ñan kũrtok armej ro bwe ren kobatok ilo iien in. Men ko ri lotok ro rej roñjake ejjab men ko kein wõt im rej kaitoklimoik er kõn m̦ool eo. Juon kõrã ear bwilõñ ke ear lo wãween an kar aolep armej ro lukkuun karwaineneik e. Ear bar bwilõñ kõn an kar erreo im aiboojoj m̦õn kweilo̦k eo me ro jeer im jatid rar m̦õn̦õn̦õ in kalõke im kõjparoke ilo ejjel̦o̦k on̦ean. Elukkuun alikkar bwe ejjab ri kõnono eo wõt emaroñ kwal̦o̦k naan ñan armej ro ilo iien Kwõjkwõj eo. Kõj wõj jim̦or bareinwõt jemaroñ kõm̦m̦ane men in.—Ep. 4:16.
2. Ewi wãween kõj kajjojo jemaroñ kaitoklimoik ri lotok ro ilo iien Kwõjkwõj eo?
2 Karwaineneik Ri Lotok Ro: Ñe jej ettõñdikdik im yokyokwe ri lotok ro, men in emaroñ kaitoklimoik er. (Jon 13:35) Meñe kwõjjab maroñ in kõnono ippãn aolep armej ro, ak kwõmaroñ yokyokwe im kwal̦o̦k kajjiem̦ ñan ro rej pãd epaake eok. (Hi. 13:1, 2, UBS) Kwõn pukot ro rekããl im rejjab jel̦a kajjien aolep. Bõlen rar itok kõn peba in kũr eo kar leto letak. Kwõmaroñ kajjitõk, “Ej kap iten juon alen am̦ itok ke?” Karwaineneik er bwe ren jijõt ippam̦, im kwal̦o̦k bwe kwõj m̦õn̦õn̦õ in uwaake jabdewõt kajjitõk ko aer. El̦aññe congregation eo am̦ ej aikuj m̦õkaj aer ro̦o̦l bwe congregation eo juon en kajerbale m̦õn kweilo̦k eo, kwõmaroñ ba: “Ikõn̦aan jel̦ã l̦õmn̦ak eo am̦ kõn kar kweilo̦k in. Ewi wãween aõ maroñ tõpare eok?”
3. Ewi wãween jemaroñ karwaineneik ro im rar bõjrak jãn aer kwal̦o̦k naan im edikl̦o̦k aer kobatok ippãd?
3 Karwaineneik Ro im Rar Bõjrak jãn Aer Kwal̦o̦k Naan: Ejjel̦o̦k pere bwe ro im rar bõjrak jãn aer kwal̦o̦k naan im edikl̦o̦k aer kobatok ippãd renaaj pãd, ekoba ro im rej kobatok wõt ilo iien Kwõjkwõj eo kajjojo iiõ. Yokyokwe er im kalikkar ñan er bwe kwõlukkuun m̦õn̦õn̦õ in lo er. (Rom 16:16) Ãlikin wõt iien Kwõjkwõj eo, elder ro remaroñ lol̦o̦k rein ilo m̦weo im̦wier im rõjañ er bwe ren wõnm̦aanl̦o̦k wõt im kobatok ilo kweilo̦k ko an congregation eo. Ej ad kõjatdikdik bwe ilo iien Kwõjkwõj eo, elõñ renaaj em̦m̦akũt ñan aer nõbar Anij kõn aer lo ‘jerbal ko ad rem̦m̦an’ im jab kõn men ko wõt rej roñ.’—1 Pi. 2:12.