Kar Je Imõniaroñroñ eo ñan Kaitoklimoen Jabdewõt Armej
1. Ewi wãween ri karejar eo etiljek im mãlõtlõt ej kajjioñe rijjelõk Paul?
1 Paul ear ukoktak ke ear kwal̦o̦k kõn nuuj eo em̦m̦an kõnke ear kõn̦aan karel ‘armej otemjej.’ Ãindein, ri karejar eo etiljek im mãlõtlõt ej kõjerbal Imõniaroñroñ eo ñan tõpar bũruon armej ro meñe eoktak aelõñ im tõmak ko aer. (1 Ko. 9:22, 23) Kõn men in, bwe jen maroñ tõpar bũruon armej ro kõn Imõniaroñroñ eo, jej aikuj jel̦ã im keememej kõn wõn ro kar je bok in ñan er.
2. Ñe jej kwal̦o̦k kõn Imõniaroñroñ eo, etke eaorõk bwe jen kallimjek ipel̦aakin m̦weo im lukkuun roñjake ñe armej eo ej kõnnaan?
2 Ñe jej kwal̦o̦k naan, eaorõk bwe jen kallimjek ipel̦aakin m̦weo im lukkuun roñjake ñe armej eo ej kõnnaan. Men in enaaj jipañ kõj ñan erom “men otemjej ñan armej otemjej.” (1 Ko. 9:22) El̦aññe kwõj baj reilok im lale armej eo m̦okta jãn am̦ kõnono ippãn, kwõnaaj maroñ jel̦ã jidik kõn e im men ko ej itoklimo kaki. Ñe jej kwal̦o̦k Imõniaroñroñ eo ñan armej eo jekõn̦aan jipañ e bwe en kwal̦o̦k bũruon. Ewi wãween jemaroñ kõm̦m̦ane men in? Eokwe, jen kwal̦o̦k juon kajjitõk innem kõttar bwe armej eo en uwaak. Jen lukkuun roñjake ñe armej eo ej kõnnaan. Men in emaroñ kam̦akũt e ñan kwal̦o̦k bũruon. Bõlen uwaak eo an enaaj kalikkar men ko ej itoklimo kaki. Jãn men ko kwõj loi im roñjaki kwõnaaj maroñ jel̦ã ewi katak eo ilo Imõniaroñroñ eo me enaaj lukkuun kaitoklimoik armej eo.
3. Kar je Imõniaroñroñ in lel̦o̦k eo ñan wõn ro? Ak ta kõn Imõniaroñroñ in katak eo, kar je ñan wõn?
3 Kar jei katak ko ilo Imõniaroñroñ in lel̦o̦k eo ñan armej ro jej kwal̦o̦k naan ippãer. Rein rej tõmak ilo Anij im riiti Baibõl̦ eo. Ebwe aer jel̦ã kõn kobban Baibõl̦ eo. Bõtab ejjab jim̦we aer mel̦el̦e kõn katak ko ilo Baibõl̦. Rej ãinl̦o̦k wõt armej ro me Paul ear ba rej “mijak Anij.” (Jrb. 13:14-16) Bõtab ikijjeen Imõniaroñroñ in katak eo kar je ñan Ri Kõnnaan ro wõt an Jeova. Ke rijjelõk Paul ear je lõta ko an ear je ñan ro rar jel̦ã kõn kobban Baibõl̦ eo im ejim̦we aer mel̦el̦e kõn katak ko rem̦ool. (1 Ko. 1:1, 2) Ejja ãindein, kar je katak ko jej etali ilo Imõniaroñroñ eo aolep Jabõt ñan ro im rej kweilo̦k im remel̦el̦e kõn karõk ko an Ri Kõnnaan ro an Jeova im naan ko rej kõjerbali.
4. Etke jej aikuj riiti aolep katak ko ilo Imõniaroñroñ in lel̦o̦k eo?
4 Kwõn kõm̦m̦an juon mejãnkajjik ñan riiti aolep katak ko ilo Imõniaroñroñ eo. Innem, kwõnaaj pojak in kwal̦o̦k kõn katak eo me enaaj kaitoklimoen ro im kwõj kwal̦o̦k naan ippãer.