Waanjoñak ko kõn Kilen Lel̦o̦ke Bok In

Ñan Jino Katak Baibõl̦ ilo Jãdede eo M̦oktata ilo Oktoba

“Kwõnañin ke kar kajjitõk kõn kajjitõk in: ‘Ta eo ej wal̦o̦k ñan juon armej ñe ej mej?’ [Roñjake an uwaak.] Kwõj l̦õmn̦ak bwe jemaroñ jel̦ã ta eo ej wal̦o̦k ñan er? Baibõl̦ eo ear uwaake kajjitõk ko an elõñ armej ro kõn ro remej. Ñan waanjoñak, eoon ko ilo Baibõl̦ eo rej lukkuun kalikkar etke ro remej rejjab maroñ jipañ ak ko̦kkure kõj ilo jabdewõt wãween.” Riit Ekklisiastis 9:​5, 10. Ãlikin, kwõn lel̦o̦k ñan armej eo Imõniaroñroñ an Jul̦ae-Jeptõmba, innem riit im kõmel̦el̦eik katak eo ej pãd ilal̦ in kajjitõk eo ilo peij 16. Kajjitõk el̦aññe ekõn̦aan bõk an bok, im karõk ippãn bwe kwõn bar jepl̦aak im etale uwaak eo an kajjitõk eo jinointata ilo peij 17.

Imõniaroñroñ Jul̦ae-Jeptõmba 2011

“Elõñ rũtto ro epen aer kõnnaan ippãn ajri ro nejier kõn an juon em̦m̦aan im juon kõrã pãd ippãn doon. Ilo am̦ l̦õmn̦ak, epidodo ke an rũtto ro kõm̦m̦ane men in? [Roñjake an uwaak.] Ekkar ñan Baibõl̦ eo, ej an rũtto ro eddo ñan katakin ajri ro nejier kõn men ko Anij ej ba kõn an juon em̦m̦aan im kõrã pãd ippãn doon. [Riit Epesõs 6:⁠4.] Bok in emaroñ jipañ ro jinen im jemen bwe ren maroñ bwebwenato ippãn ro nejier kõn men kein me ejeja an armej ro kõnnaan kaki.” Kwal̦o̦k katak eo me ej pãd ilo peij 11.

Imõniaroñroñ Jul̦ae-Jeptõmba 2011

Riit Sam 37:​10, 11. Ãlikin am̦ riit, kwõn ba: “Ewi am̦ l̦õmn̦ak, enaaj ke jejjet kitien kallim̦ur in? [Roñjake an uwaak.] Bok in ej kwal̦o̦k kõn jiljino kanaan ko ilo Baibõl̦ eo me rej jejjet kitieer ilo raan kein ad. Men in ej kam̦ool bwe m̦õttan jidik kallim̦ur in ilo Sam 37:​10, 11 enaaj jejjet kitien.”