Pepe Kiiõ ñan Am̦ Kal̦apl̦o̦k Kun̦aam̦ ilo Jerbal in Kwal̦o̦k Naan
1. Etke em̦m̦an allõñ kein M̦aaj, Eprõl̦ im Mãe kajjojo iiõ? Im ta eo jemaroñ kõm̦m̦ane kiiõ bwe jen maroñ bõk kun̦aad?
1 Kajjojo iiõ ilo allõñ kein M̦aaj, Eprõl̦ im Mãe epel̦l̦o̦k iien ko rem̦m̦an ñan ad kanooj nõbar im ‘kam̦m̦oolol Jeova kõn lo̦ñiid.’ (Sam 109:30) Juon iaan wãween eo ñan kwal̦o̦k am̦ kam̦m̦oolole Anij kõn an kar letok Nejin bwe en aje mour eo an kõn kõj, ej ñan kal̦apl̦o̦k ijo kun̦aam̦ ilo jerbal in kwal̦o̦k naan ilo allõñ in M̦aaj. Kwõnaaj ke kal̦apl̦o̦k ijo kun̦aam̦? Kiiõ ej iien eo ñan ad jino kõm̦m̦an karõk ko ñan allõñ kein.—JK. 21:5.
2. Ta eo kwe kab ro jet kar kõm̦m̦ane ke kar kwal̦o̦k kõjjel̦ã eo bwe rar kaeietl̦o̦k awa in auxiliary pioneer ilo allõñ in Eprõl̦ kar iiõ eo l̦o̦k?
2 Auxiliary Pioneer: Iiõ eo l̦o̦k eklejia ko rar lukkuun m̦õn̦õn̦õ ke rar roñ bwe kar kaeietl̦o̦k awa ko ñan auxiliary pioneer ilo kar allõñ in Eprõl̦ eo. Juon jeid im jatid likao ear je im ba: “Ña ij high school wõt im ijañin kar maroñ regular pioneer. Inaaj kanne aõ peba ñan auxiliary pioneer kõn 30 awa ko ilo allõñ in Eprõl̦, bõtab inaaj kajjioñ bwe in tõpar 50 awa.” Juon jeid im jatid kõrã me ej juon ri jerbal, ear jeje im ba: “30 awa ej joñan eo epidodo tõpare!” Ke rar kwal̦o̦k kõjjel̦ã in kõn an kar kaeietl̦o̦k awa ko ñan auxiliary pioneer, juon jeid im jatid kõrã me ear pioneer m̦okta im kiiõ ej 80 jim̦a an iiõ ear ba: “Eñin men eo etto aõ kar kõttare! Jeova ear jel̦ã bwe tõre eo kar em̦m̦antata ilo mour eo aõ ej ke iar pioneer!” Ro jet me rar jab maroñ auxiliary pioneer rar kõm̦m̦an mejãnkajjik ko ñan kal̦apl̦o̦k ijo kun̦aaer ilo kwal̦o̦k naan.
3. Ta un ko rem̦m̦an ñan l̦õmn̦ak in auxiliary pioneer ilo allõñ kein M̦aaj, Eprõl̦ im Mãe?
3 Ilo naaj allõñ in M̦aaj in tok enaaj bar juon iien em̦m̦an ñan auxiliary pioneer. Etke? Kõnke jenaaj bar maroñ kããlõt ñan tõpar 30 ak 50 awa ko. Bareinwõt jino jãn Jãdede, M̦aaj 17 raan, jenaaj bõk kun̦aad ilo juon jerbal em̦m̦an ñan jaketo jaketak peba in kũr eo ñan iien Keememej Mej eo an Jijej ilo naaj Eprõl̦ 5 raan. Enaaj lõñ ro me renaaj lañlõñ ke rej kal̦apl̦o̦k kun̦aaer ilo jerbal in kwal̦o̦k naan. Kõn men in renaaj kõn̦aan bareinwõt auxiliary pioneer ilo allõñ in Eprõl̦ im Mãe kõn 50 awa.
4. Ewi wãween jemaroñ kal̦apl̦o̦k ijo kun̦aad ilo jerbal in kwal̦o̦k naan im ta eo enaaj wal̦o̦k el̦aññe jenaaj kõm̦m̦ane men in?
4 Ilo iien Kabuñ eo tok juon an Baam̦le eo am̦, jouj im bwebwenato ippãn baam̦le eo am̦ kõn men in. Im lale ewi wãween kajjojo uwaan baam̦le eo emaroñ kal̦apl̦o̦k ijo kun̦aan ilo kwal̦o̦k naan ilo naaj allõñ kein M̦aaj, Eprõl̦ im Mãe. (JK. 15:22) Jar im kajjitõk ippãn Jeova ñan kajeraam̦m̦an kõttõpar kein. (1 Jon 3:22) Ilo am̦ kal̦apl̦o̦k kun̦aam̦ ilo jerbal in kwal̦o̦k naan, kwõnaaj kal̦apl̦o̦k am̦ nõbar Jeova im enaaj bareinwõt l̦apl̦o̦k am̦ lañlõñ.—2 Ko. 9:6.