Kwõnaaj Ke Auxiliary Pioneer?
1. Etke iien Kwõjkwõj eo enaaj juon iien em̦m̦an ñan kal̦apl̦o̦k kun̦aad ilo jerbal in kwal̦o̦k naan?
1 Ilo an epaaktok iien Kwõjkwõj eo, enaaj juon iien em̦m̦an ñan kal̦apl̦o̦k ijo kun̦aad ilo jerbal in kwal̦o̦k naan. Ej juon iien ñan kõl̦mãnl̦o̦kjen̦ kõn joñan yokwe eo an Jeova ilo an kar letok Nejin bwe en mej im kõl̦l̦ãik jerawiwi ko ad. (Jon 3:16) Kõnke jej kam̦m̦oolol kõn men in Jeova ear kõm̦m̦ane ñan kõj, jekõn̦aan kal̦apl̦o̦k ad kwal̦o̦k naan ñan ro jet kõn Jeova im kõn men ko rem̦m̦an ej kõm̦m̦ani ñan armej. (Ais. 12:4, 5; Luk 6:45, UBS) Ej bar juon iien em̦m̦an ñan leto letak peba in kũr ko ñan ro nukũd im m̦õttad, kab ro jet ñan kobatok ilo iien Kwõjkwõj in. Innem ãlikin Kwõjkwõj eo, jenaaj kate kõj ñan katak Baibõl̦ ippãn ro rar kobatok. Kwõnaaj ke kal̦apl̦o̦k kun̦aam̦ ilo am̦ pioneer ilo allõñ in M̦aaj, Eprõl̦, ak Mãe?
2. Etke em̦m̦an ñan auxilary pioneer ilo allõñ in M̦aaj?
2 Allõñ in M̦aaj Ejej Uwaan: Em̦m̦an ñan auxilary pioneer ilo allõñ in M̦aaj. Ro rej pepe in pioneer remaroñ kããlõt ñan tõpar 30 ak 50 awa. Im el̦aññe ejejjet bwe M̦aaj ej iien lotok eo, ro rej auxilary pioneer ilo allõñ in remaroñ pãd ilo aolepen iien kweilo̦k eo ñan regular pioneer ro im special pioneer ro. Enaaj aitokl̦o̦k jidik iien ad leto letak peba in kũr eo ñan Kwõjkwõj eo jãn kar iiõ ko l̦o̦k. Jenaaj jino kũr armej jãn M̦aaj 1 raan ñan iien Kwõjkwõj eo ilo Juje, M̦aaj 26, 2013. Bareinwõt, ewõr 5 Jãdede im Jabõt ilo allõñ in M̦aaj. Kõn men in, enaaj juon allõñ em̦m̦an ñan ad kõl̦mãnl̦o̦kjen̦ kake ñan pioneer ilo allõñ in el̦ap an aorõk.
3. Ewi wãween jemaroñ kõm̦m̦an karõk ñan kal̦apl̦o̦k kun̦aad ilo kwal̦o̦k naan?
3 Pepe Kiiõ: Ej juon iien em̦m̦an kiiõ ñan etale m̦akũtkũt ko kwõj kõm̦m̦ani aolep raan im lale el̦aññe kwõmaroñ kõm̦m̦an jet oktak ko bwe kwõn maroñ pioneer. Eaorõk bwe baam̦le ko ren jipañ im rejetak doon ilo men in. Kõn men in, kajjojo baam̦le ej aikuj bwebwenato ilo Iien Kabuñ an Baam̦le eo kõn mejãnkajjik ko aer im ñan karõk iien ko aer. (JK. 15:22) Ejjab aikuj nana am̦ mour el̦aññe kwõjjab maroñ pioneer kõn jet un ko. Meñe ãindein, kwõmaroñ kõm̦m̦an karõk bwe en tol̦o̦k jidik awa in am̦ kwal̦o̦k ilo raan ko me kwõj kwal̦o̦k naan ie. Kwõmaroñ bar karõk ñan kwal̦o̦k naan ilo juon iaan raan ko me ekkã am̦ jab kwal̦o̦k naan ie.
4. Ñe jenaaj kal̦apl̦o̦k ijo kun̦aad ñan kwal̦o̦k naan ilo allõñ in M̦aaj, Eprõl̦, im Mãe, ta tokjãn ko jenaaj loi?
4 Ñe jenaaj kal̦apl̦o̦k ijo kun̦aad ñan kwal̦o̦k naan ilo allõñ in M̦aaj, Eprõl̦, im Mãe, men in enaaj kal̦apl̦o̦k ad m̦õn̦õn̦õ im jubũruod kõn ad karejar ñan Jeova im jipañ ro jet. (Jon 4:34; Jrb. 20:35) Men eo el̦aptata an aorõk ej bwe Jeova enaaj lukkuun buñbũruon kõn ad m̦õn̦õn̦õ in kate kõj ñan kal̦apl̦o̦k ijo kun̦aad ilo jerbal in kwal̦o̦k naan.—JK. 27:11.