Kõm̦m̦an bwe Iien Kwõjkwõj eo En Juon Iien Ekam̦õn̦õn̦õ
1. Ta eo emaroñ jipañ kõj bwe en l̦apl̦o̦k ad m̦õn̦õn̦õ ilo allõñ in M̦aaj, Eprõl̦, im Mãe?
1 Kokõn̦aan ke bwe en l̦apl̦o̦k am̦ m̦õn̦õn̦õ ilo allõñ in M̦aaj, Eprõl̦, im Mãe? Juon wãween kwõmaroñ kõm̦m̦an bwe en l̦apl̦o̦k am̦ m̦õn̦õn̦õ ej ilo am̦ kal̦apl̦o̦k ijo kun̦aam ilo kwal̦o̦k naan ilo allõñ kein. El̦aññe kwõmaroñ, em̦m̦an ñe kwõj kanne am̦ peba in auxiliary pioneer. Ewi wãween an men in maroñ jipañ eok bwe en l̦apl̦o̦k am̦ m̦õn̦õn̦õ?
2. Etke enaaj l̦apl̦o̦k ad m̦õn̦õn̦õ ñe jej kal̦apl̦o̦k ijo kun̦aad ilo jerbal in kwal̦o̦k naan?
2 Kal̦apl̦o̦k Am̦ M̦õn̦õn̦õ: Ke Jeova ear kõm̦anm̦an armej, ear kõn̦aan bwe ren m̦õn̦õn̦õ ilo aer kabuñ im jerbal ñane. Ear kõn̦aan bwe ren m̦õn̦õn̦õ ilo aer kate er bwe en epaak kõtaan eo aer ippãn. (Luk 11:28) Ear bar kõm̦anm̦an kõj bwe jen lo m̦õn̦õn̦õ ilo ad jipañ im lel̦o̦k ñan ro jet. (Jrb. 20:35) Kwal̦o̦k naan ej m̦õttan ad kabuñ ñan Jeova im ej bar juon wãween jej jipañ armej ro jet. Ñe el̦apl̦o̦k ijo kun̦aad ilo jerbal in kwal̦o̦k naan, enaaj l̦apl̦o̦k wõt ad m̦õn̦õn̦õ. Bareinwõt, enaaj l̦apl̦o̦k ad jel̦ã kilen kwal̦o̦k naan. Im el̦ak l̦apl̦o̦k ad jel̦ã kilen kwal̦o̦k naan, el̦apl̦o̦k ad peran im edikl̦o̦k ad mijak. Kõn men in, enaaj pidodol̦o̦k ad kwal̦o̦k naan ippãn armej ro im jino katak Baibõl̦ ippãer. Jel̦ak kõm̦m̦ani men kein, el̦apl̦o̦k wõt ad m̦õn̦õn̦õ in kwal̦o̦k naan.
3. Etke el̦aptata an em̦m̦an ñan auxiliary pioneer ilo M̦aaj im Eprõl̦?
3 El̦aptata an em̦m̦an ñan auxiliary pioneer ilo M̦aaj im Eprõl̦ kõnke jemaroñ kããlõt in kõm̦m̦ane 30 awa ñe eaab 50 awa. Bareinwõt, jino jãn Jãdede, M̦aaj 22, l̦o̦k ñan raan in Kwõjkwõj eo ilo Eprõl̦ 14, jenaaj leto letak peba in kũr ko ñan iien Kwõjkwõj eo. El̦ap an naaj ro ilo eklejia ko m̦õn̦õn̦õ ilo aer jerbal ilo “juon wõt bõro” ñan kajjioñ kũrtok aolep armej ro ilo jikin ko rej kwal̦o̦k naan ie.—Zp. 3:9.
4. El̦aññe jekõn̦aan auxiliary pioneer, ta ko jej aikuj kõm̦m̦ani?
4 Kõppojak Kiiõ: El̦aññe kwõjjañin jino kõppojak, em̦m̦an ñe kwõj jinoe kiiõ. Kwõn karõk iien ko am̦ im lale ta oktak ko kwõj aikuj kõm̦m̦ani bwe en l̦apl̦o̦k ijo kun̦aam̦ ilo jerbal in kwal̦o̦k naan ilo allõñ kein. Jar ñan Anij bwe en jipañ eok. (Jem. 1:5) Bwebwenato kõn pepe in am̦ ippãn ro ilo baam̦le n̦e am̦ im ro jet ilo eklejia eo. (JK. 15:22) Meñe emaroñ jab em̦m̦an ãjmour n̦e am̦ im meñe kwõj full-time ilo jerbal eo am̦, ak kwõmaroñ bareinwõt lo m̦õn̦õn̦õ ñe kwõnaaj auxiliary pioneer.
5. Ta eo enaaj wal̦o̦k el̦aññe jenaaj kal̦apl̦o̦k ijo kun̦aad ilo jerbal in kwal̦o̦k naan ilo M̦aaj, Eprõl̦, im Mãe?
5 Jeova ekõn̦aan bwe ri karejar ro an ren m̦õn̦õn̦õ. (Sam 32:11) Enaaj l̦apl̦o̦k ad m̦õn̦õn̦õ ñe jenaaj kal̦apl̦o̦k ijo kun̦aad ilo jerbal in kwal̦o̦k naan ilo M̦aaj, Eprõl̦, im Mãe. Bareinwõt, enaaj l̦apl̦o̦k an Jemãdwõj ilañ m̦õn̦õn̦õ ippãd.—JK. 23:24; 27:11.