Joñoul Ruo Un ko Unin Ad Kwal̦o̦k Naan

Etke jej kwal̦o̦k naan im katakin armej ro kõn nuuj eo em̦m̦an? Ej ke ñan baj jipañ armej ro em̦ool bũrueer bwe ren etal ilo ial̦ eo ej tõll̦o̦k ñan mour indeeo? (Matu 7:​14) Eokwe eñin ej un eo kein kajuon ilo men ko kar kõllaajraki itulal̦. Bõtab, ejjab eñin un eo el̦aptata unin ad kwal̦o̦k naan. Ilo am̦ baj l̦õmn̦ak, ewi wõt un eo el̦aptata iaan un kein 12 unin ad bõk kun̦aad ilo jerbal in kwal̦o̦k naan?

1. Ej ñan jipañ armej ro ñan bõk mour indeeo.​—Jon 17:⁠3.

2. Ej ñan kakkõl ri nana ro.​—Ezk. 3:​18, 19.

3. Ej ñan kajejjet kanaan eo ilo Baibõl̦.​—Matu 24:⁠14.

4. Ej ñan kwal̦o̦k bwe Anij ewãnõk. Ejjel̦o̦k en̦ emaroñ n̦aruon Jeova im ba bwe ear ko̦kkure ri nana ro im jab kõtl̦o̦k iien aer ukel̦o̦k m̦okta.​—Jrb. 17:​30, 31; 1 Ti. 2:​3, 4.

5. Ej ñan kajejjet ijo kun̦aad ñan katakin armej otemjej kõn Anij, ro im kar wiaik er kõn bõtõktõkin Jijej.​—Rom 1:​14, 15, UBS.

6. Ej ñan kõjparok kõj bwe en ejjel̦o̦k ruõd kõn bõtõktõkin armej otemjej.​—Jrb. 20:​26, 27.

7. Ej juon men jej aikuj kõm̦m̦ane bwe jen bõk lo̦mo̦o̦r.​—Ezk. 3:19; Rom 10:​9, 10.

8. Ej ñan kwal̦o̦k ad yokwe armej ro.​—Matu 22:⁠39.

9. Ej ñan kwal̦o̦k bwe jej pokake Jeova im Nejin.​—Matu 28:​19, 20.

10. Ej juon wãween jej kabuñ ñan Jeova.​—Hi. 13:⁠15.

11. Ej ñan kwal̦o̦k ad yokwe Anij.​—1 Jon 5:⁠3.

12. Ej ñan jipañ karreoiki im kokwõjarjar etan Jeova.​—Ais. 43:​10-12; Matu 6:⁠9.

Em̦ool, ejjab un ko de kein unin ad bõk kun̦aad ilo jerbal in kwal̦o̦k naan. Ñan waanjoñak, ñe jej kwal̦o̦k naan, men in ej kakajoor tõmak eo ad. Ej bareinwõt letok ñan kõj juon jeraam̦m̦an ñan erom ro rej jerbal ippãn Anij. (1 Ko. 3:⁠9) Bõtab, un eo el̦aptata unin ad kwal̦o̦k naan ej un eo kein ka 12. Meñe armej ro rej roñjake ak jab, ad bõk kun̦aad ilo jerbal in kwal̦o̦k naan ej kokwõjarjar etan Anij im ej lel̦o̦k juon uwaak ñan Jeova bwe en uwaake eo ej kinaake. (JK. 27:​11) Aet, ewõr un ko rem̦m̦an ñan ad ‘wõnm̦aanl̦o̦k wõt im katakin im kwal̦o̦k kõn ennaan eo em̦m̦an.’​—Jrb. 5:​42, UBS.