Wõn Ro me Enaaj Ekkar Katak Kein ñan Er?
1. Ta eo jej aikuj l̦õmn̦ak kake ñe jej riiti Naan in Keeañ ko im Awake! ko, im etke?
1 Kar kõm̦m̦ane bok eo Naan in Keeañ im bar bok eo Awake! ñan aolep armej ro ipel̦aakin lal̦ in. Kõn men in, ewõr katak ko rekajjo wãweer ilo bok kein. Ñe jej riiti katak kein kajjojo, jej aikuj l̦õmn̦ak im lale wõn ro enaaj ekkar katak kein ñan er. Innem, jen kate kõj ñan lel̦o̦k bok kein ñan armej rein.
2. Ta katak ko ilo bok ko ad me remaroñ em̦m̦an ñan ro jet?
2 Ewõr ke jabdewõt katak ilo Naan in Keeañ eo an allõñ in me ej kwal̦o̦k kõn juon men eo me ej kab m̦õj am̦ bwebwenato kake ippãn juon iaan rijerbal ro m̦õttam̦? Ewõr ke jabdewõt katak kõn baam̦le me emaroñ jipañ juon iaan ro nukum̦? Ewõr ke juon m̦õttam̦ me ej pojak in etal ñan bar juon aelõñ me em̦õj an kar wal̦o̦k ilo kar juon katak ilo bok in Awake! ko? Ewõr ke jabdewõt iaan katak kein me ri jerbal ro ilo kien ak peejnej ko renaaj m̦õn̦õn̦õ in riiti? Ñan waanjoñak, el̦aññe ewõr juon katak kõn apañ ko kõrã ro rej iiooni, bõlen jemaroñ lel̦o̦ke ñan doulul ko an kõrã ro. Ak el̦aññe ewõr juon katak kõn an armej kõm̦m̦an poktak im jorrããn, bõlen em̦m̦an ñe jej lel̦o̦k bok kein ñan ri jerbal ro an kien.
3. Kwal̦o̦k juon waanjoñak me ej kwal̦o̦k kõn aorõkin ad leto letak bok ko ñan ro me jej l̦õmn̦ak bwe rekkar im remaroñ m̦õn̦õn̦õ in riiti katak ko ie.
3 Tõprak ko: Ãlikin aer kar riiti katak eo etan “Katakin Ajri ro bwe Ren Jel̦ã Kun̦aaer” ilo Awake! eo an Oktoba 2011, ruo ri pãlele ilo South Africa rar call e 25 jikuul̦ ko ilo territory ko aer. Roñoul ruo iaan jikin kein rar m̦õn̦õn̦õ in bõki bok kein im rar ajeji ñan ri jikuul̦ ro aer. Bar ruo ri pãlele ilo aelõñ in rar bar bõke bok kein im ajeji ilo jikuul̦ ko ilo bukwõn ko aer. Ri kaki ro ilo juon iaan jikuul̦ kein rar kõjerbale bok in ilo kilaaj ko aer. Ri pãlele rein rar kwal̦o̦k kõn bwebwenato in aer ñan em̦m̦aan eo me ej lol̦o̦k eklejia ko, im em̦m̦aan in ear rõjañ eklejia ko ej lol̦o̦k bwe ren kwal̦o̦k naan ilo jikin jikuul̦ ko. Joñan an kar lukkuun lõñ armej rar kõn̦aan aer copy in bok in, ra eo ilo jikin in ear aikuj bar print!
4. Etke jej aikuj kate kõj ñan leto letak Naan in Keeañ im Awake! ko ñan aolep armej ro?
4 Bok ko ad rej kõmel̦el̦eik armej ro kõn unin an wal̦o̦k jorrããn im poktak ko ilo lal̦ in im wãween ko jet. Bok kein rej jipañ armej ro bwe ren jel̦a kõn Baibõl̦ eo im kõn Aelõñ eo an Anij. Ejjel̦o̦k bar juon bok ilo lal̦ in ijello̦kun wõt bok kein rej “kwal̦o̦k kõn lo̦mo̦o̦r.” (Ais. 52:7, UBS) Kõn men in, jej aikuj kate kõj im lel̦o̦k bok kein ñan aolep armej ro jej iioon er. Eñin unin, ñe jej riiti bok kein, jej aikuj kajjitõk ippãd make, “Wõn ro me enaaj ekkar katak kein ñan er?”